လါအ့ဖြ့ၣ်(၉)သီ,၂၀၂၅နံၣ်
အမဲကၤဒီးအံၣ်ရၣ် ကတၢၣ်ပီၣ်တဲသကိးလိၤလိၤ ဘၣ်ထွဲဒီးနူကလံယါဂ့ၢ်၀ီ တၢ်အၢၣ်လီၤလၢကဲထီၣ်သးသ့အဂ့ၢ် အမဲရကၤကီၢ်ခိၣ် ဒီၣ်နၢၤထရၢး တဲလီၤ၀ဲန့ၣ်လီၤ.
နူကလံယါတၢ်တၢၣ်ပီၣ်တဲသကိးအံၤန့ၣ် တၢ်ကမၤအီၤဖဲ လါအ့ဖြ့ၣ်(၁၂)သီအနံၤ၀ံၤ တၢ်အၢၣ်လီၤမ့ၢ်တန့ၢ်ဘၣ်ဒီး အံၣ်ရၣ်အဂီၢ် ကကဲထီၣ်မုၢ်နံၤလၢအၢသီအဂ့ၢ် ဒီၣ်နၢၤထရၢးဟ့ၣ်ပလီၢ်ဃၥ်၀ဲန့ၣ်လီၤ. ဒ်န့ၣ်အသိး မတၤတဖၣ် ကဟဲထီၣ်တၢ်အိၣ်ဖှိၣ်အံၤတခီ တတဲလီၤ၀ဲတၢ်ဂ့ၢ်တၢ်ကျိၤလီၤတံၢ်လီၤဆဲးဒံးဘၣ်.
အမဲရကၤအတၢ်ကွဲမုၥ်အံၣ်ရၣ်လၢ ကတၢၣ်ပီၣ်တဲသကိး နူကလံယါတၢ်ဂ့ၢ်အံၤအဖီခိၣ် အံၣ်ရၣ်တၢ်ဘူၣ်တၢ်ဘါခိၣ်နၢ် ခၣ်မ့ၣ်နံၣ် တတူၢ်လိၥ်၀ဲ၀ံၤအလီၢ်ခံ ထရၢးတဲဖျါထီၣ်၀ဲလၢ ကဟံးန့ၢ်အံၣ်ရၣ်ဂ့ၢ်၀ီလၢ သုးဂ့ၢ်၀ီတပၤန့ၣ်လီၤ. တၢ်အိၣ်ဖှိၣ်အံၤတၢ်ကမၤအီၤဖဲ အိၣ်မၣ်အဂ့ၢ် ထံဂုၤကီၢ်ဂၤကိတိၥ် အၣ်ဘဲးအၣ်ရၣ်ခၠံၣ် တဲပၥ်ဂၢၢ်ပၥ်ကျၢၤ၀ဲန့ၣ်လီၤ.
ဒီၣ်နၢၤထရၢးအံၤ သးအိၣ်လၢကတၢၣ်ပီၣ်တဲသကိး ခံခီယၥ်ဘးအဘၢၣ်စၢၤအဂ့ၢ် ဆှၢလံၥ်လံၥ်တဘ့ၣ်ဆူ ယူၣ်အ့ၣ်အံတဆီဆူအံၣ်ရၣ်အိၣ်လၢလါမးရှးအတီၢ်ပူၤန့ၣ်လီၤ.တၢ်ကကးတံၥ်အံၣ်ရၣ်နူကလံယါတၢ်ဟူးတၢ်ဂဲၤတဖၣ်အဂီၢ် ဖဲအပူၤကွံၥ်၂၀၁၅နံၣ်န့ၣ်ဟီၣ်ခိၣ်ထံကီၢ်အဂံၢ်ဆူတဖၣ်ဒီးအံၣ်ရၣ်အဘၢၣ်စၢၤမၤဃၥ်၀ဲတၢ်အၢၣ်လီၤတခါန့ၣ်လီၤ.
တၢ်ကးတံၥ်အံၣ်ရၣ်နူကလံယါတၢ်ဟူးတၢ်ဂဲၤအံၤအဃိ ဟီၣ်ခိၣ်ထံကီၢ်တဖၣ် အတၢ်ကးတံၥ်လၢ အံၣ်ရၣ်ထံကီၢ်အဖီခိၣ် တၢ်မၤလီၤစှၤ၀ဲန့ၣ်လီၤ. ဘၣ်ဆၣ်ဒီး ဖဲလၢဒီၣ်နၢၤထရၢးကဲကီၢ်ခိၣ်အဆိကတၢၢ်တဘျီအခါန့ၣ် အၣ်ရ့ၣ်ဟးထီၣ်လၢ နူကလံယါတၢ်အၢၣ်လီၤအံၤအပူၤ၀ံၤအလီၢ်ခံ အမဲရကၤပၥ်လီၤ၀ဲတၢ်ကးတံၥ်တဖၣ်ဆူ အံၣ်ရၣ်အဖီခိၣ်အသိး အံၣ်ရၣ်စ့ၢ်ကီး မၤအါထီၣ်၀ဲ နူကလံယါတၢ်ဟူးတၢ်ဂဲၤတဖၣ်န့ၣ်လီၤ.
Ref:VOM
