လါအ့ဖြ့ၣ်(၈)သီ,၂၀၂၅နံၣ်
ပှၤထၢတၫ်မၤဘူၣ်လၢ ဟီၣ်ခိၣ်ဟူးတၫ်ဘၣ်ဒိဘၣ်ထံးအဂီၫ်တဖၣ်န့ၣ် သုးကီၣ်ကးပာ်ပနီၣ်ဃာ် လံာ်တၫ်အုၣ်ကီၤ(၄)ကလုာ်မ့ၫ်ပာ်ဃုာ်မး ကဘၣ်ထၢတၫ်မၤဘူၣ်ဒီးမၤဘူၣ်တၫ်အဂ့ၫ် တၫ်သ့ၣ်ညါဘၣ်လၢပှၤတ၀ၢတၫ်မၤစၢၤကရၢအိၣ်န့ၣ်လီၤ.
ပှၤလၢထၢတၫ်မၤဘူၣ်တဖၣ် ကဘၣ်မၤ၀ဲ တၫ်အုၣ်ကီၤလၢက၀ီၤဒ့,ပၢၤကီၫ်,ကီၫ်ဆၣ်ပၢပြး၀ဲၤဒၢးဒီး ကီၫ်ဆၣ်တၫ်ကတီၤ မၤကဆှီ၀့ၫ်၀ဲၤဒၢးတဖၣ် မ့ၫ်၀ံၤမးဒီးထၢတၫ်မၤဘူၣ်ဒီးမၤဘူၣ်တၫ်ကန့ၫ်၀ဲအဂ့ၫ် ပှၤတ၀ၢတၫ်မၤစၢၤကရၢဖိတဂၤတဲ၀ဲလီၤ.
“ဘၣ်လဲၤဆိလၢက၀ီၤဒ့၀ဲၤဒၢး,ဟံးန့ၫ်လံာ်အုၣ်ကီၤဖဲန့ၣ်၀ံၤ ဘၣ်လဲၤဆူကီၫ်ဆၣ်ပၢပြး၀ဲၤဒၢး,မ့ၫ်၀ံၤန့ၣ် ဘၣ်လဲၤကဒီး ဆူကီၫ်ဆၣ်တၫ်ကတီၤမၤကဆှီ၀့ၫ်၀ဲၤဒၢး တဆီဘၣ်ဆီဒီးတၫ်ဘၣ်မၤ၀ဲယံာ်လၢ(၅)နၣ်ရံၣ်ဃၣ်ဃၣ်ညါလီၤ.”
သုးကီၣ်ကးပာ်ပနီၣ်ဃာ်တၫ်ဘျၢအပူၤ တၫ်လီၫ်လၢတၫ်ကထၢတၫ်မၤဘူၣ်,တၫ်လီၫ်လၢတၫ်ကလဲၤဟ့ၣ်တၫ်မၤဘူၣ်ဒီး ပှၤပာ်ဃုာ်အနီၫ်ဂံၫ်နီၫ်ဒွးလီၤတံၫ်လီၤဆဲး တၫ်ဟ့ၣ်အီၤစရီမ့ၫ်၀ံၤဒီး ထုးထီၣ်ဟ့ၣ်၀ဲလံာ်အုၣ်ကီၤ၀ံၤ လၢတၫ်လဲၤဟ့ၣ်မၤဘူၣ်တၫ်အပူၤပာ်ပနီၣ်န့ၫ်၀ဲ တၫ်ဆၢကတီၫ်အိၣ်၀ဲအဂ့ၫ် အ၀ဲတဲဘၣ်၀ဲလီၤ.
တၫ်မၤ၀ဲဒ်သိးအံၤန့ၣ် မ့ၫ်လၢတၫ်ပာ်ဖျါထီၣ်တၫ်ဂ့ၫ်လၢ န့ဆၢၣ်တၫ်မၤဘၣ်ဒိဘၣ်ထံး၀ံၤ ပှၤလီထၢတၫ်မၤဘူၣ် အိၣ်အါ ထီၣ်အဃိ ပာ်ပနီၣ်န့ၫ်၀ဲအဒူၣ်အဆၢဒ်သိးအံၤအဂ့ၫ် ပှၤလၢအိၣ်ဘူးဒီးပၢပြးခိၣ်တဂၤတဲ၀ဲလီၤ.
“ပှၤတနီၤ ဟးလူၤထၢတၫ်မၤဘူၣ်အိၣ်၀ဲလီၤ.တလဲၤမၤဘူၣ်၀ဲလၢတၫ်လီၫ်နီတတီၤဘၣ်.ပှၤလၢမၤတၫ်နီၫ်ကီၫ်တဖၣ် ထံၣ်ဘၣ်တၫ်ကီတၫ်ခဲလီၤ.လၢအပူၤကွံာ် ထံဒိၣ်အကတီၫ်စ့ၫ်ကီး ထံတၫ်မၤဘၣ်ဒိဘၣ်ထံးတဖၣ်၀ံၤလံ ကရၢလၢထၢ တၫ်မၤဘူၣ်တဖၣ်အိၣ်ဒံးအဖၢမုၫ်လီၤ.တၫ်အဃိ ပာ်ပနီၣ်ဃာ်၀ဲဒ်သိးအံၤလီၤ.”
လၢကတီၫ်အံၤ ထံဂုၤကီၫ်ဂၤပဒိၣ်တဖၣ်ဒီးတၫ်ကရၢကရိခဲလၢာ်ပာ်ဖှိၣ် (၂၃)ဖု ဟ့ၣ်မၤစၢၤ၀ဲအမဲရကၤဒီလၣ် ၁၃၆.၈၈ ကကွဲၫ်ဘၣ်ဆၣ် ပှၤလၢသံတဖၣ် (၁)န့ၣ် သုးကီၣ်ကးဟ့ၣ်အီၤထဲဒၣ်ကၠးအကလီၫ်(၁၀)ဧိၤလီၤ.
လါမးရှး(၂၈)သီနံၤ ကီၫ်ပယီၤပူၤဟီၣ်ခိၣ်ဟူးအဃိ ပှၤဘၣ်သံ ၃,၄၅၅ ဂၤ,ဘၣ်ဒိ ၄,၈၄၀ ဂၤဒီး ပှၤဟါမၫ်အိၣ်၀ဲ ၂၂၀ ဂၤအဂ့ၫ် ဖဲလါအ့ဖြ့ၣ်(၆)သီနံၤ,ဂီၤအကတီၫ်န့ၣ် သုးကီၣ်ကးဘိးဘၣ်ရၤလီၤ၀ဲလီၤ.
Ref:
