လါအ့ဖြ့ၣ်(၇)သီ,၂၀၂၅နံၣ်
ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်ပၥ်ဖျါဃၥ်၀ဲလၢ ၂၀၂၅နံၣ်, လါအ့ဖြ့ၣ်(၂)သီအနံၤ ဟါ(၄)နၣ်ရံၣ်ဘျဲၣ်အဆၢကတီၢ် သုးကီၣ်ကးအသုး ကဘီယူၤဟဲတ့ၢ်လီၤမ့ၣ်ပိၢ်သၢဖျၢၣ်ဆူ နဲကးသ၀ီ, ထ့ဖိထၣ်သ၀ီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ နဲကးသ၀ီအိၣ် ဖိသၣ်(၂)ဂၤဘၣ်သံ၀ဲအသိး ဖိသၣ်တဂၤဒီးကမျၢၢ်(၂)ဂၤဘၣ်ဒိ၀ဲဒီး ကမျၢၢ်ဟံၣ်ဃီ(၃)ဖျၢၣ် ဟးဂီၤကွံၥ်၀ဲန့ၣ်လီၤ.
ခီဖျိသုးကီၣ်ကးအသုး ဟဲတ့ၢ်လီၤမ့ၣ်ပိၢ်အဃိ နဲကးသ၀ီဖိလၢအမ့ၢ် ဖိသၣ်စီၤခ့ၣ်မီၣ်လွ့ၣ် သးနံၣ်အိၣ်(၃)လါဘၣ်အသးနါပှၢ်ဘၣ်သံ၀ဲဒီး နီၢ်၀ါဆိၣ်ဖီ သးနံၣ်အိၣ်(၁၂)နံၣ်ဘၣ်အသးနါပှၢ်ဒီးဘၣ်သံ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး နီၢ်သီရံၣ်ဖီ သးနံၣ်အိၣ်(၁၀)နံၣ်တဂၤ, စီၤမ့သးနံၣ်အိၣ်(၅၄)နံၣ်တဂၤ, နီၢ်မုၢ်ဆံးသနံၣ်(၅၀)အိၣ်တဂၤ ခဲလၢၥ်ပၥ်ဖှိၣ်သၢဂၤဘၣ်ဒိ၀ဲဒီး စီၤပ့ၣ်ထူ, နီၢ်ဖီဖီဒီး နီၢ်မုၢ်စိတဖၣ် အဟံၣ်ဃီဘၣ်ဟးဂီၤကွံၥ်၀ဲန့ၣ်လီၤ.
ဖဲလၢထံဖိကီၢ်ဖိကမျၢၢ်တဖၣ် ဘၣ်ကွၢ်ဆၢၣ်မဲၥ်ဘၣ်ဒီး ဟီၣ်ခိၣ်ဟူး၀းတၢ်တတဲၥ်တနါအဆၢကတီၢ် ခီဖျိ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ပညိၣ်ဒုးလီၢ်က၀ီၤကမျၢၢ်တဖၣ်လၢ ခးလီၤကျိဖးဒိၣ်, ဒီးမၤကလံၤကျါတၢ်ဒုးတဖၣ်အဃိ လီၢ်က၀ီၤကမျၢၢ်တဖၣ် ဘၣ်အိၣ်၀ဲဒၣ်လၢတၢ်လီၤဘၣ်ယိၣ်အပူၤအဂ့ၢ် ပၥ်ဖျါဃၥ်၀ဲန့ၣ်လီၤ.
