လါအ့ဖြ့ၣ်(၇)သီ,၂၀၂၅နံၣ်
မါတလ့ကီၫ်ခီ,လၢ၀့ၫ်ကၠီးဆဲၣ် ဟီၣ်ခိၣ်ဟူးကဒီးအဃိ ပှၤကိးဂၤဒဲးဃၣ်ဃၣ် ဘၣ်ထွဲသးဂ့ၫ်၀ီဘၣ်ဒိဘၣ်ထံး၀ဲအဂ့ၫ် ပှၤတ၀ၢတၫ်မၤစၢၤကရၢ ဘၣ်မူဘၣ်ဒါတဲ၀ဲလီၤ.
ဟီၣ်ခိၣ်ဟူးလၢစးထီၣ်ကဲထီၣ်အသးဖဲစကဲကီၫ်ခီအံၤအဃိ ဒ်စကဲ,မါတလ့၀ၫ်ဖးဒိၣ်တဖၣ် တၫ်ဟးဂုၤဟးဂီၤအသိး ၀့ၫ်ကၠီးဆဲၣ်စ့ၫ်ကီး ဟံၣ်ဃီ,တၫ်သူၣ်ထီၣ်တဖၣ်ပာ်ဃုာ် ဒီတ၀့ၫ်ဃၣ်ဃၣ် ဘၣ်ဒိဘၣ်ထံးဟးဂီၤ၀ဲလီၤ.
၀့ၫ်ကၠီးဆဲၣ်အပူၤ တၫ်မၤပူၤဖျဲးထီၣ်သးသမူတၫ်ဖံးတၫ်မၤတဖၣ် တုၤအ့ဖြ့ၣ်(၃)သီနံၤ ပှၤဘၣ်သံ(၁၀၈)ဂၤ, ဘၣ်ဒိဘၣ် ထံး(၂၀၀)ဂၤ တၫ်မၤပူၤဖျဲးထီၣ်န့ၫ်၀ဲလီၤ. ဖဲလါအ့ဖြ့ၣ်(၄)သီ,ဟါ(၉း၅၅)နၣ်ရံၣ်ဃၣ်ဃၣ်အကတီၫ် ဟီၣ်ခိၣ်ဟူးကဒီးဖဲ၀့ၫ်ကၠီးဆဲၣ်န့ၣ်လီၤ.
ပှၤတ၀ၢတၫ်မၤစၢၤကရၢ ဘၣ်မူဘၣ်ဒါတဂၤတဲ၀ဲလၢ”ပှၤကမျၢၫ်တဖၣ်န့ၣ် အပူၤကွံာ်တၫ်ဘၣ်ဒိဘၣ်ထံးတဖၣ်အဃိ ဘၣ်ဒိ၀ံၤဒီးတနီၤအိၣ်(၁)သီ,(၂)သီဒံးလီၤ.ဘူးကက့ၤနုာ်လီၤလၢဟံၣ်ပူၤဒီးပျံၤတၫ်အဃိ ဟးထီၣ်မံလၢတၫ်ချၢလီၤ. တုၤ လၢကတီၫ်အံၤ ပှၤကမျၢၫ်တဖၣ် အိၣ်လၢတၫ်ပျံၤတၫ်ဖုးအပူၤလီၤ.ဟီၣ်ခိၣ်မ့ၫ်ဟူးဆံးဆံးဒၣ်လဲၣ် ပျံၤတၫ်လီၤ.တၫ်ပျံၤ တၫ်ဖုးတဖၣ်အံၤအိၣ်တ့ၫ်လၢအသးပူၤအဂ့ၫ်”တဲ၀ဲလီၤ.
ဟီၣ်ခိၣ်ဟူးကဒီးအဃိ တၫ်ဘၣ်ဒိဘၣ်ထံးတၫ်သံတၫ်ပှၫ်တအိၣ်ဘၣ်ဆၣ် ဟံၣ်ဒီးတၫ်သူၣ်ထီၣ်တနီၤ လီၤပှီၫ်ဟးဂီၤ ၀ဲအိၣ်လီၤ. တၫ်မ့ၫ်တဲလၢဟီၣ်ခိၣ်ဟူးန့ၣ် ပှၤကိးဂၤဒဲးဃၣ်ဃၣ် တူၫ်ဘၣ်သးတၫ်ဆါလီၤအဂ့ၫ် ပှၤ၀့ၫ်ဖိတဂၤတဲ၀ဲလီၤ.
“ဘၣ်ယိၣ်ဘၣ်ဘှီဒုတဲလၢၤတဂ့ၤ.မ့ၫ်နၫ်ဟူတၣ်ကလုၫ်၀ဲန့ၣ် ပှၤကိးဂၤ ကနိးကစုာ်လီၤ.တၫ်မ့ၫ်တဲလၢဟီၣ်ခိၣ်ဟူးန့ၣ် ပှၤကိးဂၤဃၣ်ဃၣ် ဒိးန့ၫ်ဘၣ်သးတၫ်ဆါလီၤ.နီၫ်ကစၫ်ဟံၣ်ဒၣ်လဲၣ် မံတဘူၣ်ဘၣ်.ဘၣ်ဟးထီၣ်မံလၢ ကျဲမုၫ်ခိၣ်လီၤ.ဖဲ မဟါနံၤန့ၣ် တၫ်စူၤလီၤ.သးတၫ်ဘၣ်ယိၣ်တဖၣ်အိၣ်အါထီၣ်လီၤ.မူခိၣ်ကလံၤသီၣ်ဂီၤ တဘၣ်လိာ်ဖိးဒ့အဃိ သးပှၫ်ဒီးဖိသၣ်တဖၣ်ထံၣ်ဘၣ်တၫ်ကီတၫ်ခဲအဂ့ၫ်”တဲ၀ဲလီၤ.
ကီၫ်ပယီၤပူၤ ဟီၣ်ခိၣ်ဟူးလၢအသဟီၣ်ဆူၣ်ဆူၣ်အဃိ ပှၤခဲလၢာ်ပာ်ဖှိၣ်အနီၫ်ဂံၫ်နီၫ်ဒွး ဘၣ်သံ ၄,၂၁၂ ဂၤ, ဘၣ်ဒိဘၣ်ထံး ၆,၅၈၈ ဂၤ,ပှၤ ၄၄၈ဂၤ ဟါမၫ်အဖၢမုၫ်၀ံၤ ပှၤလၢတၫ်မၤပူၤဖျဲးထီၣ်န့ၫ် အိၣ်၀ဲ ၄၉၈ ဂၤလံအဂ့ၫ် ဖဲလါအ့ဖြ့ၣ်(၆)သီနံၤ တုၤမုၫ်ထူၣ် (၁)နၣ်ရံၣ် DVBအတၫ်မၤနီၣ်ထၢဖှိၣ်တၫ်ဂ့ၫ်တၫ်ကျိၤအဖီခိၣ် တၫ်သ့ၣ်ညါဘၣ်လီၤ.
Ref: DVB
