လါမးရှး(၂၆)သီ,၂၀၂၅နံၣ်
၂၀၂၅နံၣ်, လါမးရှး(၂၆)သီအနံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးချၢၣ်ဒ့သုးကလၢၤလၢအိၣ်ဖဲ လူပျဲၢ်ကီၢ်ဆၣ်, သုးက့(၇)ဟီၣ်က၀ီၤပူၤအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်ပၥ်ဖျါဃၥ်၀ဲန့ၣ်လီၤ.
စးထီၣ်လၢ လါမးရှး(၂၂)သီအနံၤန့ၣ် KNLAသုးရ့ၣ်(၂၂)ဒီးသုးရ့ၣ်အဂၤတဖၣ်ပၥ်ဖှိၣ်ဒုး၀ဲ သုးကီၣ်ကးချၢၣ်ဒ့သုးကလၢၤအံၤန့ၣ်လီၤ.
တၢ်ဒုးမၤန့ၢ်သုးကီၣ်ကးချၢၣ်ဒ့သုးကလၢၤအပူၤ သုးကီၣ်ကးအပှၤသုးဖိလၢ ဃ့ၢ်ပူၤဖျဲးကွံၥ်သးဆူ ကၠီၣ်တဲၣ်တပၤအိၣ်အဂ့ၢ် တၢ်ကစီၣ်တဖၣ်ပၥ်ဖျါဃၥ်၀ဲန့ၣ်လီၤ.
ဘၣ်ဆၣ်ဘၣ်ထွဲဒီးတၢ်ထီၣ်ဒုးမၤန့ၢ် သုးကီၣ်ကးချၢၣ်ဒ့သုးကလၢၤအဖီခိၣ် ခ့ၣ်အဲၣ်ယူၣ်-လီၢ်ခၢၣ်သးတခီ ဘိးဘၣ်ပၥ်ဖျါဃၥ်၀ဲတအိၣ်နီတမံၤဒံးဘၣ်.
ခီဖျိတၢ်ဒုးအံၤအဃိ ပိၥ်မုၣ်,ဖိသၣ်ဒီး သူၣ်က့သးပှၢ်ခဲလၢၥ်ပၣ်ဃုၥ် ပှၤလီၢ်အိၣ်ကမှံဖိ(၁၁၀)ဃၣ်ဃၣ် ဘၣ်လဲၤဃ့ၢ်ပူၤဖျဲးသးဆူ ကၠီၣ်တဲၣ်, တးကီၢ်ရ့ၣ်တပၤဖဲ လါမးရှး(၂၃)သီအနံၤအဂ့ၢ် ကၠီၣ်တဲၣ်တၢ်ကစီၣ်လၢ အမ့ၢ် Khaosod ပၥ်ဖျါဃၥ်၀ဲန့ၣ်လီၤ.
