လါမးရှး(၅)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,၀့ၫ်အ့ၣ်မဲ သးစၫ်(၁၅)ဂၤလၢ တဆဲးလီၤကမျၢၫ်တၫ်ဘၣ်ကဲသုးတၫ်ဘျၢဒီးဃ့ၫ်ဖျိးကွံာ်တဖၣ် ဘၣ်တၫ်တဲပျံၤတဲဖုး အမိၫ်အပၫ်လၢတၫ်ကဖီၣ်၀ဲအဂ့ၫ် တၫ်သ့ၣ်ညါဘၣ်လၢပှၤလီၫ်က၀ီၤဖိတဖၣ်အိၣ်န့ၣ်လီၤ.
အ့ၣ်မဲကီၫ်ဆၣ်,ပၠ့မးငူၣ်သ၀ီ,ဖဲလဲၣ်တဆီန့ၣ် သုးကီၣ်ကးအပှၤသုးဖိတဖၣ်ဟဲတုၤဒီး ဖဲလါဖ့ၤဘြူၤအါရံၤအလၢာ်န့ၣ် မၤတၫ်အိၣ်ဖှိၣ်၀ံၤ တဲပျံၤတဲဖုး၀ဲလၢ ကမျၢၫ်တၫ်ဘၣ်ကဲသုးအဂီၫ် တၫ်ကဘၣ်မၤပှဲၤ(Form)အဃိ သးစၫ်တဖၣ်န့ၣ် ဃ့ၫ်ဖျိးကွံာ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“မၤတၫ်အိၣ်ဖှိၣ်၀ံၤအလီၫ်ခံ သးစၫ်တဖၣ်ဃ့ၫ်ဖျိးကွံာ်၀ဲလီၤ.တၫ်ဘၣ်လဲၤမၤပှဲၤ(Form)လၢ အ့ၣ်မဲကီၫ်ဆၣ်,ပၢပြး၀ဲၤဒၢး လီၤ.မ့ၫ်တဟဲဘၣ်ဒီးမ့ၫ်ဃ့ၫ်ဖျိးကွံာ်ဒ်သိးအံၤန့ၣ် မ့ၫ်ထံၣ်အမိၫ်အပၫ်တဂၤလၫ်လၫ်ကဖီၣ်၀ဲအဂ့ၫ် လူၣ်ကီကၠိပၢၤကီၫ်ခိၣ် တဲ၀ဲအဂ့ၫ်”အ့ၣ်မဲလီၫ်က၀ီၤဖိတဂၤတဲ၀ဲလီၤ.
မ့ၫ်သးစၫ်(၁၅)ဂၤလၢ က၀ီၤဒ့ခိၣ်,ဟံၣ်(၁၀၀)ဖျၢၣ်အခိၣ်ဒီးပၢၤကီၫ်တဖၣ် ဖီၣ်န့ၫ်တၫ်ဖးလၢအလီၫ်၀ံၤ တဲ၀ဲလၢဖီၣ်တၫ်ဖး ဘၣ်လၢ တၫ်ကဘၣ်ကဲသုးဒီး ဘၣ်တၫ်မၢန့ၫ်ဆူၣ်အီၤလၢကဆဲးလီၤစုမုၫ်ကျၢၫ် လၢတၫ်ဘၣ်ကဲသုးအဂီၫ်တဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
ဒ်န့ၣ်အသိး,အ့ၣ်မဲကီၫ်ဆၣ် ကၠိၣ်စ့ၣ်သ၀ီ,ခၠီးအ့ၣ်တါသ၀ီတဖၣ်လၢအိၣ်ဘူးလိာ်သးဒီး ပၠ့မးငူၣ်သ၀ီအံၤအပူၤ သးစၫ် တဖၣ်စ့ၫ်ကီး တအဲၣ်ဒိးကဲသုးဘၣ်အဃိ ဃ့ၫ်ဖျိးကွံာ်အိၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
လၢကတီၫ်အံၤ အ့ၣ်ယၣ်၀တံၣ်ကီၫ်ခီပာ်ဃုာ် လၢဟီၣ်က၀ီၤလၢအဂၤတဖၣ်အပူၤစ့ၫ်ကီး သုးကီၣ်ကးကးအပၢပြး ဘၣ် မူဘၣ်ဒါဒီးပှၤသုးဖိတဖၣ် ဖီၣ်ခူသူၣ်တၫ်ဖးလၢသးစၫ်တဖၣ်အလီၫ်၀ံၤမၢန့ၫ်ဆူၣ်၀ဲလၢကကဲသုးအဂီၫ်အိၣ်၀ဲအဂ့ၫ် လီၫ် က၀ီၤဖိတဖၣ်တဲ၀ဲလီၤ.
Ref: Ayeyarwaddy Times
