လါမးရှး(၅)သီ,၂၀၂၅နံၣ်
ကၠီၣ်တဲၣ်-ပယီၤကီၢ်ဆၢ ကညီကီၢ်စဲၣ်, လူပျဲၢ်ကီၢ်ဆၣ်အပူၤ တၢ်ဒုးဆူၣ်ထီၣ်လၢ သုးကီၣ်ကးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအဃိ လီၢ်က၀ီၤကမျၢၢ်လွံၢ်ကယၤဘျဲၣ် ဘၣ်ဃ့ၢ်ပူၤဖျဲးသးဆူ ကီၢ်ကၠီၣ်တဲၣ်တပၤအဂ့ၢ် ပှၤလၢမၤစၢၤ၀ဲတဖၣ် စံး၀ဲန့ၣ်လီၤ.
စးထီၣ်လၢ လါဖ့ၤဘြူၤအါရံၤ(၂၇)သီအနံၤန့ၣ် (KNLA)ဒီးသုးပၥ်ဖှိၣ်တဖၣ် နုၥ်လီၤဒုး၀ဲ သုးကီၣ်ကးအသုး (ခလရ-၃၁)အစုတီၤဖီလၥ် ပွဲး-၁၂၄၈သုးကလၢၤလၢအိၣ်ဖဲ လၢၢ်ပီၣ်ဟဲသ၀ီ, လူပျဲၢ်ကီၢ်ဆၣ်ပူၤအဃိ တၢ်ဒုးတဖၣ်ဆူၣ်ထီၣ်၀ဲတုၤမုၢ်တနံၤအံၤန့ၣ်လီၤ.
ခီဖျိတၢ်ဒုးဆူၣ်ဒီး သုးကီၣ်ကးအသုးဟဲဒုးတၢ်လၢ ကလံၤကျါဒီး ခးလီၤကျိဖးဒိၣ်တဖၣ်ဆူ (KNLA)သုးအိၣ်တၢ်လီၢ်တဖၣ်လၢ ကိးမုၢ်နံၤအဃိ လီၢ်က၀ီၤကမျၢၢ်လွံၢ်ကယၤဘျဲၣ်လၢအိၣ်ဖဲ လၢၢ်ပီၣ်ဟဲသ၀ီဒီးသ၀ီလၢအဘူးဒီးဖဲန့ၣ်ပူၤတဖၣ် ဘၣ်ဃ့ၢ်ပူၤဖျဲးသးအဂ့ၢ် စံး၀ဲန့ၣ်လီၤ.
တၢ်ဒုးစးထီၣ်ကဲထီၣ်သး လါဖ့ၤဘြူၤအါရံၤ(၂၇)သီအနံၤန့ၣ် လီၢ်က၀ီၤကမျၢၢ်ဖိတဖၣ် ဘၣ်ဃ့ၢ်ပူၤဖျဲးသးအဂ့ၢ် (KNU)ပှၤကတိၤတၢ်ပၢ ပဒိၣ်စီၤတီနံ စံးဘၣ် RFAတၢ်ကစီၣ်အဂ့ၢ် တၢ်ကစီၣ်ပၥ်ဖျါဃၥ်၀ဲန့ၣ်လီၤ.
“မ့ၢ်လီၤ တၢ်ဟဲဃ့ၢ်လၢကၠီၣ်တဲၣ်တပၤန့ၣ်. ယတယၥ် ကအိၣ်ယဲၢ်ကယၤဘျဲၣ်ညါ. အပူၤကွံၥ်အနံၤ ၂၇သီအနံၤန့ၣ် ဟဲတုၤအိၣ်သၢကယၤဘျဲၣ်လံ. ပှၤဃ့ၢ်ပူၤဖျဲးသန့ၣ် အစှၤကတၢၢ်ကအိၣ်လွံၢ်ကယၤ”အဂ့ၢ် စံး၀ဲန့ၣ်လီၤ.
တၢ်ဒုးတဖၣ်ဆူၣ်ထီၣ်လၢ သုးကီၣ်ကးအသုးဒီး(KNLA)အဘၢၣ်စၢၤ ဖဲပူးတူးလူးသုးကလၢၤဒီးကီးနွဲးသုးကလၢၤလၢအိၣ် ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဆၢဟီၣ်က၀ီၤ လူပျဲၢ်ကီၢ်ဆၣ်ဒီးကီးတရံးကီၢ်ဆၣ်ပူၤန့ၣ်လီၤ.
ကတီၢ်ခဲအံၤန့ၣ် လီၢ်က၀ီၤကမျၢၢ်ဖိတဖၣ် အိၣ်ကဒုသးတစိၢ်တလီၢ် ဖဲကီၢ်ကၠီၣ်တဲၣ်, ထးစီၣ်ယါကီၢ်ဆၣ်, မဲးအူးစူကရူၢ်, နီၣ်ဘိၣ်သ၀ီအပူၤ၀ံၤ ကၠီၣ်တဲၣ်ဘၣ်မူဘၣ်ဒါတဖၣ် ရဲၣ်ကျဲၤန့ၢ်အီၤတၢ်အီၣ်တၢ်အီတဖၣ်အဂ့ၢ် စံး၀ဲန့ၣ်လီၤ.
သုးကီၣ်ကးအသုး ဟဲဒုးတၢ်လၢကလံၤကျါအဃိ လီၢ်က၀ီၤကမျၢၢ်ပိၥ်ခွါ(၂)ဂၤဘၣ်သံ၀ဲ၀ံၤ တစှၤန့ၣ်ပှၤ(၅)ဂၤဘၣ်ဒိ၀ဲအဃိ ဘၣ်လဲၤကူစါယါဘျါသးအဂ့ၢ် စံး၀ဲန့ၣ်လီၤ.
Ref:RFA
