လါဖ့ၤဘြူၤအါရံၤ(၂၅)သီ,၂၀၂၅နံၣ်
ဖဲအပူၤကွံၥ်လါယနူၤအါရံၤ(၂၇)သီအနံၤန့ၣ် (IRC)ပတုၥ်ကွံၥ် တၢ်ဆီၣ်ထွဲမၤစၢၤတဖၣ်လၢ ကၠီၣ်တဲၣ်-ပယီၤကီၢ်ဆၢဘၣ်ကီဘၣ်ခဲဒဲက၀ီၤဃိးဘ့ၣ်အပူၤအံၤ ကဒိးန့ၢ်က့ၤဘၣ်ဆၣ် သၢလါမ့ၢ်ပူၤန့ၣ် ကဒိးန့ၢ်ဒံးဧါ, တန့ၢ်လၢၤဘၣ်ဧါန့ၣ်တလီၤတံၢ်ဘၣ်အဂ့ၢ် တၢ်သ့ၣ်ညါဘၣ်လၢ ဒဲက၀ီၤပှၤဘၣ်မူဘၣ်ဒါအအိၣ်န့ၣ်လီၤ.
“လၢဒဲက၀ီၤပူၤန့ၣ် တၢ်ဖံးတၢ်မၤခဲလၢၥ် က့ၤလဲၤသရံးသလံန့ၣ်လီၤ. ဒ်အပူၤကွံၥ် တၢ်မၤကျဲအသိးမီၤ. ဘၣ်ဆၣ်ကန့ၢ်ဒၣ်သၢလါလီၤ. သၢလါမ့ၢ်ပူၤန့ၣ် တလီၤတံၢ်ဘၣ်. ခီဖျလၢ စ့တိၥ်ပၥ်အဃိဧါ တၢ်မနုအဃိတခီ တသ့ၣ်ညါလီၤတံၢ်ဘၣ်. ပသံကွၢ် ဒဲက၀ီၤပှၤဘၣ်မူဘၣ်ဒါတဖၣ်၀ံၤလံအဖီခိၣ် က့ၤန့ၢ်က့ၤခဲလၢၥ်လံ”အဂ့ၢ် ကညီပှၤဘၣ်ကီဘၣ်ခဲကမံးတံၥ် နဲၣ်ရွဲၣ်စံး၀ဲန့ၣ်လီၤ.
မဲၢ်လးဒဲက၀ီၤအပူၤ စးထီၣ်ဖဲ လါဖ့ၤဘြူၤအါရံၤ(၂၁)သီအနံၤန့ၣ် (IRC)တၢ်ဆီၣ်ထွဲမၤစၢၤတဖၣ်ဒ်အမ့ၢ် ဆူၣ်ချ့,တၢ်ကဆှဲကဆှီဒီးထံကဆှီတၢ်မၤတဖၣ်က့ၤသရံးသးအသိး အူဖၠၣ်ဒဲက၀ီၤပူၤစ့ၢ်ကီး တၢ်ဆီၣ်ထွဲမၤစၢၤတဖၣ်ကလဲၤသရံးက့ၤသးစးထီၣ်ဖဲ လါဖ့ၤဘြူၤအါရံၤ(၂၁)သီအနံၤဘၣ်ဆၣ် တၢ်ဖံးတၢ်မၤတဖၣ် က့ၤစးထီၣ်က့ၤ၀ဲဖဲလါဖ့ၤဘြူၤအါရံၤ(၂၄)သီအနံၤလီၤအဂ့ၢ်ဒီးဒဲက၀ီၤအဂၤတဖၣ်အပူၤစ့ၢ်ကီး က့ၤန့ၢ်က့ၤ ဆူၣ်ချ့ဒီးတၢ်ဆီၣ်ထွဲမၤစၢၤအဂုၤအဂၤတဖၣ်လံအဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်ဖဲလါဖ့ၤဘြူၤအါရံၤ(၂၀)သီအနံၤန့ၣ် တၢ်ကစးထီၣ်န့ၢ်က့ၤ IRCတၢ်ဆီၣ်ထွဲမၤစၢၤဒ်အပူၤကွံၥ်သိးဘၣ်ဆၣ် မ့မ့ၢ်လၢလီၢ်ခံတခီ တလီၤတံၢ်ဘၣ်အဂ့ၢ် စံး၀ဲန့ၣ်လီၤ.
“တၢ်အဘၢၣ်စၢၤဒု ပကမၤဒၣ်လၢပနီၢ်ကစၢ်လီၤ. တချူးတုၤတလါအံၤ၂၁သီအနံၤတခီ တၢ်ဟံးတၢ်နၢ်ပၢၢ်ဒီးကၠီၣ်တဲၣ်ဆူၣ်ချ့၀ဲၤကျိၤ၀ံၤ တၢ်မၤအီၤန့ၣ်လီၤ. ဘၣ်ဆၣ်မ့မ့ၢ်လၢ ပှၤဘၣ်တၢ်ဆါဒိၣ်ဒီးပှၤလၢဘၣ်သါအီၣ်စံၣ်ကၠံၣ်တဖၣ်, မိၢ်ဒၢတဖၣ်အဂီၢ်တခီကီခဲဒိၣ်မးန့ၣ်လီၤ. ကတီၢ်ခဲအံၤတခီ က့ၤဘၣ်က့ၤအလီၢ်လီၢ်အသိးလံ”အဂ့ၢ် ကညီဘၣ်ကီဘၣ်ခဲဒဲက၀ီၤ နဲၣ်ရွဲၣ်တဲ၀ဲန့ၣ်လီၤ.
ဖဲလၢတၢ်ပတုၥ်ကွံၥ် (IRC)ဆူၣ်ချ့တၢ်ဆီၣ်ထွဲမၤစၢၤတဖၣ်အဆၢကတီၢ် ကညီဘၣ်ကီဘၣ်ခဲဖိလၢအမ့ၢ် ဒီၣ်ဖံးခးလၢသနံၣ်အိၣ်(၇၁)နံၣ်အံၤ ခီဖျိဘၣ်စံၣ်လီၤလၢတၢ်ဆါဟံၣ်၀ံၤယံၤ(၄)သီ, ဖ့ၤဘြူၤအါရံၤ(၂)သီအနံၤန့ၣ် ဘၣ်သံ၀ဲဒၣ်လၢ ပသိၣ်တၢ်ဆါန့ၣ်လီၤ.
“ဒဲက၀ီၤပူၤတခီ တၢ်လဲၤကူစါယါဘျါသးလၢ တၢ်ဆါဟံၣ်န့ၢ်လံ. ဘၣ်ဆၣ်ဒီး မ့မ့ၢ်လၢတၢ်ဆါဒိၣ်တခီ ဘၣ်လဲၤလၢ၀့ၢ်ပူၤအဃိ ဘၣ်ခီၣ်လဲၤဘူၣ်လဲၤစ့ၤနီၢ်ကစၢ်လီၤ. ၀့ၢ်ပူၤတခီ ဘၣ်ဟ့ၣ်ကျိၥ်စ့န့ၣ်လီၤ. ဒဲက၀ီၤပူၤ အါတၢ်တက့ၢ် တၢ်မၤသကိး တၢ်ဘူၣ်ဆၣ်ဖိကီၢ်ဖိဒီးထါတၢ်လီၤအဃိ တၢ်အံၤတဖၣ် တၢ်ပှ့ၤအီၤတအိၣ်အဃိ ကီခဲ၀ဲအဂ့ၢ်” ကၠီၣ်တဲၣ်-ပယီၤကီၢ်ဆၢ ကရ့ၣ်နံၣ်ဘၣ်ကီဘၣ်ခဲဒဲက၀ဲၤနီၣ်ဂံၢ်(၁)ဒီး(၂)ပှၤဘၣ်မူဘၣ်ဒါ စံး၀ဲန့ၣ်လီၤ.
ကၠီၣ်တဲၣ်-ပယီၤကီၢ်ဆၢ, ကရ့ၣ်နံၣ်ဘၣ်ကီဘၣ်ခဲဒဲက၀ီၤနီၣ်ဂံၢ်(၁)ဒီး(၂)အပူၤ ပှၤဘၣ်ကီဘၣ်ခဲဖိနီၣ်ဂံၢ်အိၣ်၀ဲ(၁၃,၀၀၀)ဘျဲၣ်၀ံၤ မ့မ့ၢ်လၢ ကညီဘၣ်ကီဘၣ်ခဲဒဲက၀ီၤတဖၣ်အပူၤတခီ ပှၤဘၣ်ကီဘၣ်ခဲဖိနီၣ်ဂံၢ်နီၣ်ဒွးအိၣ်၀ဲ (၇၃,၀၀၀)ဃၥ်ဃၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကၠီၣ်တဲၣ်ပှၤဘၣ်မူဘၣ်ဒါတဖၣ်, IRCပှၤဘၣ်မူဘၣ်ဒါတဖၣ်ဒီး ဒဲက၀ီၤခိၣ်နၢ်တဖၣ် ထံၣ်လိၥ်တဲသကိးတၢ်၀ံၤအလီၢ်ခံ စးထီၣ်လၢတလါအံၤလါဖ့ၤဘြူၤအါရံၤ(၂၁)သီအနံၤန့ၣ် တၢ်ကစးထီၣ်န့ၢ်က့ၤတၢ်ဆီၣ်ထွဲမၤစၢၤတဖၣ်ဘၣ်ဆၣ် သၢလါမ့ၢ်ပူၤ၀ံၤအလီၢ်ခံတခီ တၢ်မၤစၢၤတဖၣ်ကန့ၢ်ဒံးဆူညါတခီ တလီၤတံၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Mizzima
