လါဖ့ၤဘြူၤအါရံၤ(၂၀)သီ,၂၀၂၅နံၣ်
ဖဲတရူး-ပယီၤ ထံကီၫ်ခံဘ့ၣ် ရဲၣ်ကျဲၤ၀ဲလၢ ကပာ်ဖှိၣ်မၤ၀ဲတၫ်ဘံၣ်တၫ်ဘၢခီပနံာ်(Joint Venture Security Company) အကတီၫ် ဘၣ်ထွဲကရၢသဘျ့တၫ်ဘံၣ်တၫ်ဘၢတၫ်ဘျၢလၢ ထံဂုၤကီၫ်ဂၤခီပနံာ်တဖၣ် ဖီၣ်တၫ်စုက၀ဲၤသ့န့ၣ် ပာ်လီၤ၀ဲ အဂ့ၫ် ဖဲလါဖ့ၤဘြူၤအါရံၤ(၁၈)သီအနံၤန့ၣ် သုးကီၣ်ကးဘိးဘၣ်ရၤလီၤ၀ဲလီၤ.
တၫ်ဘျၢအံၤအပူၤ ထံဂုၤကီၫ်ဂၤတၫ်ဘံၣ်တၫ်ဘၢခီပနံာ်ဒီးကီၫ်ပူၤတၫ်ဘံၣ်တၫ်ဘၢခီပနံာ်တဖၣ် ကဖီၣ်၀ဲတၫ်စုက၀ဲၤအခွဲး န့ၣ် ထံလီၫ်ကီၫ်ပူၤကိတိာ် တီခိၣ်ရိၣ်မဲ တၫ်ပၢဆှၢရဲၣ်ကျဲၤ ကရၢသဘျ့တၫ်ဘံၣ်တၫ်ဘၢ လီၫ်ခၢၣ်သးကမံတံာ်အတၫ်ဟ့ၣ် ခွဲးအဖီခိၣ် တၫ်ဖီၣ်စုက၀ဲၤခွဲးယာ်န့ၣ် ကမၤထွဲ၀ဲလၢတၫ်ဘျၢအဖီခိၣ်အဂ့ၫ် ပာ်ဖျါ၀ဲလီၤ.
ထံဂုၤကီၫ်ဂၤတၫ်ဘံၣ်တၫ်ဘၢဂ့ၫ်၀ီခီပနံာ်တဖၣ်အပူၤ ပှၤကီၫ်ပယီၤဖိ ကဘၣ်ပာ်ဃုာ်(၇၅)မျးကယၤ၀ံၤ ပှၤလၢပတံထီၣ် လဲၣ်စ့ၣ်တဖၣ်န့ၣ် အတၫ်ကစီၣ်မ့ၫ်ဟူထီၣ်တ့ၫ်လၢ မၤဘၣ်ဒိတၫ်ဘံၣ်တၫ်ဘၢဒီးတၫ်ပၢတၫ်ပြးတဖၣ်န့ၣ် တမ့ၫ်တၫ်က ဟ့ၣ်ခွဲးဘၣ်အဂ့ၫ် တဲ၀ဲလီၤ.
တၫ်ဘျၢအံၤအတၫ်ပညိၣ်အပူၤ ကကဲထီၣ်တၫ်မၤစၢၤလၢ ထံကီၫ်တၫ်ဘံၣ်တၫ်ဘၢဒီးသဲစးတၫ်ဘျၢတၫ်လုၫ်ဘၢအဂီၫ် ,ကရၢသဘျ့တၫ်ဘံၣ်တၫ်ဘၢကရၢတဖၣ် ပာ်ဖှိၣ်မၤသကိးတၫ်ဒီးထံကီၫ်အတၫ်ဘံၣ်တၫ်ဘၢတၫ်ကရၢကရိတဖၣ်ကန့ၫ် အဂီၫ်,ဘၣ်ထွဲကရၢသဘျ့တၫ်ဘံၣ်တၫ်ဘၢဂ့ၫ်၀ီတဖၣ်န့ၣ် ပာ်ဖှိၣ်မၤသကိးတၫ်ဒီးကီၫ်ချၢတၫ်ကရၢကရိတဖၣ် ကန့ၫ်အ ဂီၫ်စ့ၫ်ကီး ကွဲးဖျါဃာ်၀ဲလီၤ.
ပှၤလၢမၤကရၢသဘျ့တၫ်ဘံၣ်တၫ်ဘၢတၫ်ဖံးတၫ်မၤတဖၣ်န့ၣ် တၫ်မ့ၫ်ဟ့ၣ်ဒုးသ့ၣ်ညါအီၤလၢ ကဘၣ်ပာ်ဖှိၣ်မၤသကိး တၫ်ဒီးသုးကီၣ်ကးအတၫ်ဘံၣ်တၫ်ဘၢတၫ်ကရၢကရိတဖၣ်လံန့ၣ်ဒီး တၫ်တဟ့ၣ်ခွဲးလၢတၫ်ကဂ့ၫ်လိာ်၀ဲစ့ၫ်ကီး တၫ်ဘျၢ အပူၤ ကွဲးလီၤဃာ်၀ဲလီၤ.ဖဲမၤတၫ်ဘံၣ်တၫ်ဘၢတၫ်ဖံးတၫ်မၤအကတီၫ် မ့ၫ်ဒိးန့ၫ်တၫ်ကစီၣ်လၢ ကမၤဘၣ်ဒိဘၣ်ထံး တၫ် ဘံၣ်တၫ်ဘၢဒီးသဲစးတၫ်ဘျၢတၫ်ဒိၣ်စိအဂီၫ်တဖၣ်န့ၣ် တၫ်ကဘၣ်ဆှၢတၫ်ကစီၣ်ဆူသုးကီၣ်ကးအပၢၤကီၫ်၀ဲၤဒၢးအိၣ် န့ၣ်လီၤ.
သုးခိၣ်စိစ့ၣ်ယီၣ်လၢပာ်ဃုာ်လၢ(CDM)ပူၤတဲ၀ဲလၢ တၫ်အိၣ်သးအံၤ မ့ၫ်ဒ်သိးသုးကီၣ်ကးကိး၀ဲသုးတၫ်မၤစၢၤလၢ တၫ်ဘံၣ်တၫ်ဘၢခီပနံာ်တဖၣ်န့ၣ်လီၤ.
“တၫ်ဘျၢအံၤန့ၣ် မ့ၫ်တၫ်ဘျၢလၢတၫ်ကိးထံဂုၤကီၫ်ဂၤ သုးတၫ်မၤစၢၤန့ၣ်လီၤ.သုးကီၣ်ကးတကပၤ မ့ၫ်ဃ့တၫ်မၤစၢၤန့ၣ် တၫ်ဂ့ၫ်လိာ်ခွဲးယာ်တအိၣ်စံးတၫ်န့ၣ် တၫ်ကဘၣ်ပာ်ဖှိၣ်မၤသကိးတၫ်ဒီးအ၀ဲသ့ၣ်၀ံၤ တၫ်ဒုးမ့ၫ်အိၣ်န့ၣ်ကဘၣ်ဒုးတၫ် အဂ့ၫ်န့ၣ်လီၤ.”
တၫ်ကဒုးအိၣ်ထီၣ် တရူး-ပယီၤထံကီၫ်ခံဘ့ၣ် တၫ်ပာ်ဖှိၣ်မၤသကိးတၫ်ဘံၣ်တၫ်ဘၢခီပနံာ်အဂီၫ်(Joint Venture Security Company)သုးကီၣ်ကးဃ့ထီၣ်ဃာ်၀ဲ၀ံၤ တၫ်ဃ့ထီၣ်အံၤ တၫ်ဆဲးလီၤစုမုၫ်ကျၢၫ်ကန့ၫ်အဂီၫ် သုးကီၣ်ကး ကရၢကရိဒုးအိၣ်ထီၣ် တၫ်ဖံးတၫ်မၤကမံတံာ်အဂ့ၫ် လၢကီၫ်ပယီၤထံကီၫ်တၫ်ပာ်ဖျါအပူၤ ပာ်ဖျါ၀ဲလၢ ၂၀၂၄နံၣ်, လါနိၣ်၀့ဘၢၣ်(၈)သီအနံၤ မုၫ်နံၤမုၫ်သီန့ၣ်လီၤ.
Ref: RFA
