လါယနူၤအါရံၤ(၂၉)သီ,၂၀၂၅နံၣ်
ဖဲလါယနူၤအါရံၤ(၂၇)သီအနံၤ, မုၢ်ထူၣ်(၂)နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးအJet Fighter လဲၤတ့ၢ်မ့ၣ်ပိၢ်ဆူ ယိၤဒိၣ်ကီၢ်စဲၣ်, ကၠီးမဲ၀့ၢ် ဟါလီၤခီတၢ်ဆါအီၣ်အလီၢ်ဒီးကီၢ်ရ့ၣ်၀ဲၤဒၢးအဃိ လီၢ်က၀ီၤကမျၢၢ်ဘၣ်သံ၀ဲ(၁)ဂၤဒီး ဘၣ်ဒိ၀ဲ(၃)ဂၤအဂ့ၢ် တအီသုးမုၢ်ဒိၣ်(TNLA) ပၥ်ဖျါဃၥ်၀ဲလၢတၢ်ကစီၣ်အပူၤန့ၣ်လီၤ.
သုးကီၣ်ကးအJet Fighter လဲၤတ့ၢ်မ့ၣ်ပိၢ်အပူၤ လီၢ်က၀ီၤကမျၢၢ်ဟံၣ်ဘၣ်ဟးဂီၤကွံၥ်၀ဲစ့ၢ်ကီး တစှၤန့ၣ်(၅)ဖျၢၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးအံၤ လဲၤတ့ၢ်လီၤမ့ၣ်ပိၢ်ဆူကၠီးမဲကမျၢၢ်တၢ်ဆါဟံၣ်၀ံၤအလီၢ်ခံ ယံၤ(၂)သီအနံၤ လါယနူၤအါရံၤ(၂၇)သီအနံၤန့ၣ် လဲၤတ့ၢ်ကဒီးမ့ၣ်ပိၢ်ဆူ ကမျၢၢ်လ့ၤလိၤဟးထီၣ်အါတၢ်လီၢ်လၢအမ့ၢ် ဟါလီၤခီတၢ်ဆါအီၣ်အလီၢ်ဒီးကီၢ်ရ့ၣ်၀ဲၤဒၢးတဖၣ်န့ၣ်လီၤ.
ဖဲအပူၤကွံၥ် လါယနူၤအါရံၤ(၂၅)သီအနံၤ သုးကီၣ်ကးအသုးလဲၤတ့ၢ်လီၤမ့ၣ်ပိၢ်ဆူ ကၠီးမဲကမျၢၢ်တၢ်ဆါဟံၣ်ပူၤတခီ CDMကသံၣ်သရၣ်မုၣ် ဘၣ်သံ၀ဲ(၂)ဂၤဒီးပှၤဆါ(၁)ဂၤ၀ံၤ တၢ်ဆါဟံၣ်ပှၤမၤတၢ်ဖိတဖၣ်, CDM ပှၤမၤတၢ်ဖိတဖၣ်, ပှၤဆါလၢဟဲကူစါယါဘျါသးတဖၣ်ပၥ်ဃုၥ် လီၢ်က၀ီၤကမျၢၢ်(၂၀)ဘျဲၣ် ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်သိးကပူၤဖျဲးဒီး သုးကီၣ်ကးအသုး ကလံၤကျါတၢ်လီၤဘၣ်ယိၣ်တဖၣ်အဂီၢ် တၢ်ကအိၣ်ပလီၢ်သူၣ်ပလီၢ်သးထီဘီအဂီၢ်ဒီး တၢ်ကလူၤပိၥ်မၤထွဲဘၣ် ကလံၤကျါတၢ်ဒီသဒၢအကျိၤအကျဲတဖၣ်အဂ့ၢ်န့ၣ် တအီသုးမုၢ်ဒိၣ်(TNLA) ဒုးသ့ၣ်ညါဆီၣ်တခူထီၣ်ဃၥ်၀ဲ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.
