လါယနူၤအါရံၤ(၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,မုၫ်တြီၫ်ကီၫ်ရ့ၣ်ဟီၣ်က၀ီၤ,သုးကီၣ်ကးအကတၢတံးသုးကလၢၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA) သုးပာ်ဖှိၣ်တဖၣ် က၀ီၤကးတံာ်ဒုးအီၤအဃိ သုးကီၣ်ကးအသုးဘၣ်ခးစၢၤဒီသဒၢန့ၫ်၀ဲ ဆူၣ်ဆူၣ်ကိၤကိၤလၢကဘီယူၤအဂ့ၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် သုးက့နီၫ်ဂံၫ်(၅)ပှၤတဲတၫ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်တဲ၀ဲန့ၣ်လီၤ.
စးထီၣ်ဖဲလါဒံၣ်စ့ဘၢၣ်(၂၉)သီနံၤ မုၫ်တြီၫ်ကီၫ်ရ့ၣ်ပူၤ သုးကီၣ်ကးအကတၢတံးသုးကလၢၤန့ၣ် KNLAသုးပာ်ဖှိၣ်တဖၣ် က၀ီၤကးတံာ်ဒုးအီၤအဃိ တၫ်ဒုးဆူၣ်ထီၣ်၀ဲလီၤ.လၢသုးကီၣ်ကးအသုးန့ၣ်ဘၣ်ခးစၢၤ၀ဲလၢကျိဖးဒိၣ်တဖၣ် တကးဘၣ် ခးစၢၤတၫ်ဆူၣ်ဆူၣ်ကိၤကိၤလၢကဘီယူၤတဖၣ်န့ၣ်လီၤ.
သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်တဲ၀ဲလၢ “လဲၤဒုးသုးကလၢၤအဃိ ကဘီယူၤဟဲခးစၢၤတၫ်ဆူၣ်ဆူၣ်ကိၤကိၤလီၤ. ကလံၤကျါ တၫ်ခးလီၤတၫ်အဃိ သုးပာ်ဖှိၣ်တကပၤ တၫ်ဘၣ်ဒိဘၣ်ထံးတအိၣ်ဘၣ်.သုးကီၣ်ကးတကပၤ တၫ်အိၣ်သးစ့ၫ်ကီး တသ့ၣ်ညါဘၣ်ဒံးဘၣ်.တၫ်ဒုးတၫ်အိၣ်သးဒုကဲထီၣ်အဖၢမုၫ်လီၤ.တပတုာ်ဒံးဘၣ်အဂ့ၫ်”န့ၣ်လီၤ.
တကးဘၣ်သုးကျိၤလၢ ဟဲမၤစၢၤတၫ်လၢဟဲထီၣ်ဖဲကမးမီတကပၤန့ၣ် ဟဲဆီလီၤအသး ဖဲကတၢတံးသုးကလၢၤဒီးသ၀ီပူၤအဃိ သုးပာ်ဖှိၣ်တကပၤ ဟ့ၣ်ပလီၫ်ဃးကတၢတံာ်သ၀ီဖိဒီးသ၀ီဖိလၢအိၣ်ဘူးဖဲန့ၣ်တဖၣ် လၢကပဒ့ၣ်ဟးဆှဲးအသးန့ၣ်လီၤ.
ကတၢတံး,နးကၠီး,ဘီထံး,ဘီကၠိလဲၣ်,ဘီကထးဒူသ၀ီတဖၣ် သုးကီၣ်ကး အကဘီယူၤ လဲၤတ့ၫ်လီၤဆိမ့ၣ်ပိၫ်တဖၣ် အဂ့ၫ် လီၤက၀ီၤဖိတဖၣ်တဲ၀ဲလီၤ.
ကတၢတံးလီၫ်က၀ီၤဖိတဂၤတဲ၀ဲလၢ”ကတၢတံးအဃၢၤ၀း၀းဘၣ်ဃ့ၫ်ခဲလၢာ်လီၤ.အဆိကတၢၫ် ခးလီၤသ၀ီလၢ ကဘီ ယူၤလီၤ.သ၀ီတဖၣ်န့ၣ်ခး၀ဲခဲလၢာ်လီၤ.သီခါဖၠၣ်ဒၣ်လဲၣ်လီၤကလဲကွံာ်လီၤ.ဟဲခးဆိ၀ဲလၢကလံၤကျါလီၤ.၀ံၤအလီၫ်ခံမးဒီးသုးပာ်ဖှိၣ်တကပၤ လဲၤတ့ၫ်လီၤမ့ၣ်ပိၫ်လၢဒြိအဂ့ၫ်”န့ၣ်လီၤ.
ကတၢတံးသ၀ီပာ်ဃုာ် အကပိာ်ကပၤသ၀ီ, သ၀ီဖိလၢအကလးဂၤတဖၣ် ဘၣ်လဲၤဃ့ၫ်အိၣ်ကဒုလၢကမးမီန့ၣ်လီၤ.
ဖဲအပူၤကွံာ် လါဒံၣ်စ့ဘၢၣ်(၁၁)သီနံၤ ဖၣ်ပူၣ်-ကမးမီကျဲမုၫ်ဖီခိၣ် သုးကီၣ်ကးအကစၢၫ်သၢဖျၢၣ်ကျိဖးဒိၣ်သုးကလၢၤ ဒီးကဆီမဲကျိဖးဒိၣ်သုးကလၢၤ လၢအရ့ဒိၣ်လၢဒုးယၤအဂီၫ်အံၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီးသုးပာ်ဖှိၣ်တ ဖၣ် ထီၣ်ဒုးမၤန့ၫ်ဃာ်၀ဲလီၤ.
Ref: DVB
