လါဒံၣ်စ့ဘၢၣ်(၉)သီ,၂၀၂၄နံၣ်
ကၠီၣ်တဲၣ်-ပယီၤကီၫ်ဆၢအပူၤ ဘၣ်ထွဲတၫ်ဖ့ၣ်ဆၢကဲထီၣ်ဒီး၀းသွံၣ်စၢဖှိၣ်သုးမုၫ်ဒိၣ် တၫ်ဂ့ၫ်အဖီခိၣ် ကၠီၣ်တဲၣ်ဒီကလုာ် တၫ်ဘံၣ်တၫ်ဘၢဂ့ၫ်၀ီ,ကီၫ်ဆၢဂ့ၫ်၀ီ,ဒီကလုာ်ပတီၫ် တၫ်တိာ်ကူၣ်ကျဲၤဒီးတၫ်ဘှီဘၣ်ဆီတလဲကမံးတံာ်တကပၤ ဖဲလါဒံၣ်စ့ဘၢၣ်(၁၃)သီအနံၤန့ၣ် ရဲၣ်ကျဲၤ၀ဲလၢကဟံးထီၣ်ဖီၣ်ထီၣ် တၢၣ်ပီၣ်တဲသကိး၀ဲအဂ့ၫ် Bangkok Post ပာ်ဖျါ၀ဲလီၤ.
ကီၫ်ကၠီၣ်တဲၣ်ကပၤ UWSA အိၣ်ဆီလီၤအသးန့ၣ် ကဲထီၣ်တၫ်ဘၣ်ယိၣ်အဂ့ၫ် ကမျၢၫ်ပၣ်တံၣ် ခိၣ်နၫ်ခံဂၤတဂၤ, ကမံးတံာ်ပှၤပၢၤလီၫ်ဆ့ၣ်နီၤ Rangsiman Romeတဲ၀ဲလီၤ.
ကီၫ်ဆၢဒီတကျိၤ လၢအနံၣ်တဖၣ်ယံာ်အပူၤ တၫ်သဘံၣ်သဘုၣ်တဖၣ်,လီၤဆီဒၣ်တၫ် သုးကီၣ်ကးခးလီၤတၫ်လၢ ကဘီယူၤတဖၣ်အဃိ ကမျၢၫ်လၢတၫ်ကမၣ်တအိၣ် ဘၣ်ဒိဘၣ်ထံးဘီဘိ၀ံၤ ကီၫ်ကၠီၣ်တဲၣ် ပှၤလီၫ်အိၣ်ကမှံဖိ ဟဲအိၣ်ကဒု အိၣ်ထီၣ်(၂)ကကွဲၫ်ဘျဲၣ်လံအဂ့ၫ် ဖဲလါဒံၣ်စ့ဘၢၣ်(၄)သီအနံၤန့ၣ် တဲ၀ဲလီၤ.
ဘၣ်ဆၣ်သနာ်က့ ကီၫ်ကၠီၣ်တဲၣ်တကပၤ တူၫ်လိာ် ပှၤလီၫ်အိၣ်ကမှံဖိန့ၫ်ဒၣ်ထဲ(၁)ကလီၫ်ဃၣ်ဃၣ်ဧိၤလီၤအဃိ ပှၤလီၫ် အိၣ်ကမှံဖိ အတၫ်ဟဲနုာ်လီၤမ့ၫ်အါထီၣ်န့ၣ် ဟံးထီၣ်ဖီၣ်ထီၣ်၀ဲတန့ၫ်ဘၣ်အဂ့ၫ် Bangkok Post ပာ်ဖျါ၀ဲလီၤ.
ကီၫ်ပယီၤပူၤ တၫ်သဘံၣ်သဘုၣ်အတၫ်ဘၣ်ဒိဘၣ်ထံးတဖၣ်န့ၣ် ကၠီၣ်တဲၣ်တကပၤဟးဆှဲး၀ဲတန့ၫ်ဘၣ်အဂ့ၫ်, တၫ်စု ဆူၣ်ခီၣ်တကးတဖၣ်မ့ၫ်ဆူၣ်ထီၣ်န့ၣ် ကမျၢၫ်တဖၣ်န့ၣ် ကခီဂာ်ကီၫ်ဆၢ၀ံၤ ကဟဲဃ့ၫ်ဒၣ်ဆူ ကီၫ်ကၠီၣ်တဲၣ်ပူၤအဂ့ၫ်, မ့ၫ်တတူၫ်လိာ်ပှၤဘၣ်ကီဘၣ်ခဲဖိတဖၣ်န့ၣ် ဒ်ဘီမုၫ်စၢဖှိၣ်ကရၢ ပှၤဂ့ၫ်၀ီထံကီၫ်ကရၢဖိအသိး ကဘၣ်ဒိကီၫ်ကၠီၣ်တဲၣ် အသုးသ့ၣ်လၤကပီၤသ့အဂ့ၫ် Mr Ransimanတဲလီၤ၀ဲလီၤ.
ဖဲလါဒံၣ်စ့ဘၢၣ်(၁၃)သီအနံၤ ဘၣ်ထွဲ UWSA တၫ်ဂ့ၫ် ကမံးတံာ်ကတၢၣ်ပီၣ်တဲသကိးအပူၤ အပူၤကွံာ် ကၠီၣ်တဲၣ် ကဘီဖီၣ်ညၣ်တဖၣ် တၫ်ခးအီၤဖဲပယီၤပီၣ်လဲၣ်တၫ်ပၢပူၤ တၫ်ဂ့ၫ်စ့ၫ်ကီး ကတၢၣ်ပီၣ်တဲသကိး၀ဲအဂ့ၫ် တဲ၀ဲလီၤ.
ကီၫ်ရ့ၣ်မဲဟီၣ်စီၣ်အပူၤ UWSAသုးကလၢၤတနီၤ နုာ်လီၤဆီလီၤအသးလၢ ကၠီၣ်တဲၣ်ကီၫ်ပူၤအဂ့ၫ် ကၠီၣ်တဲၣ်တၫ်ကစီၣ် သန့တဖၣ် ပာ်ဖျါ၀ဲလီၤ.ကၠီၣ်တဲၣ်သုးတခီ ဘၣ်ထွဲတၫ်ဂ့ၫ်အံၤ ဂ့ၫ်လိာ်ဃာ်၀ဲ၀ံၤ တဲဃာ်၀ဲလၢ ခံခီခံကပၤတၫ်ရ့လိာ်ဘၣ် ထွဲဂ့ၤ၀ဲအဂ့ၫ် တဲ၀ဲလီၤ. UWSAစ့ၫ်ကီးတဲခီၣ်ဆၢက့ၤ၀ဲလၢ တၫ်လီၫ်လၢအ၀ဲသ့ၣ်ဆီလီၤသုးကလၢၤအလီၫ်တဖၣ် တၫ်တဲလၢကၠီၣ်တဲၣ်တၫ်ပၢတန့ၫ်ဘၣ်အဂ့ၫ်န့ၣ်လီၤ.
“၀းန့ၣ် တၫ်ခီဂာ်ထံကီၫ်မၤကမၣ်ကွီၫ်မ့ၣ်တဖၣ် လီၤဆီဒၣ်တၫ် အမံၤဟူလၢ ကူၣ်လဲၤမၤကၤတၫ်မူၤတၫ်ဘှီးတဖၣ် လီၤ.တၫ်ထုးထီၣ်တၫ်မူၤတၫ်ဘှီးအဖီခိၣ် ပာ်ဖျါထီၣ် အတၫ်စိကမီၤ တၫ်အုၣ်ကီၤတဖၣ်စ့ၫ်ကီးအိၣ်၀ဲ၀ံၤ တၫ်ခီဂာ် ကီၫ်ဆၢ ဒ်သိးအံၤန့ၣ် တူၫ်လိာ်၀ဲတသ့ဘၣ်အဂ့ၫ်” Mr Rangsiman တဲ၀ဲလီၤ.
“တၫ်နုာ်လီၤန့ၫ်ဆူၣ်ဒ်သိးအံၤန့ၣ် ဘၣ်ထွဲလိာ်အသးဒီး အပူၤကွံာ်နံၣ်တဖၣ်အပူၤ ကၠီၣ်တဲၣ်ကွၫ်ဆၢၣ်မဲာ်ဘၣ် တၫ်မူၤ တၫ်ဘှီးတၫ်ဂ့ၫ်ကီသ့အဂ့ၫ်”တဲဃာ်၀ဲ၀ံၤ တတဲဖျါ၀ဲတၫ်ဂ့ၫ်လီၤတံၫ်ဘၣ်.
လၢကီၫ်ပယီၤ၀့ၫ်တၣ်ခၠံၣ်လ့း ၀းအတၫ်ပၢဟီၣ်က၀ီၤတဖၣ်အပူၤ ကၠီၣ်တဲၣ်အတၫ်ဟ့ၣ်လီမ့ၣ်အူန့ၣ် မ့ၫ်ဒ်သိး တၫ်ဆီၣ်ထွဲ မၤစၢၤ တၫ်ထုးထီၣ်တၫ်မူၤတၫ်ဘှီးသ့အဂ့ၫ် တဲ၀ဲလီၤ.
လၢတၫ်ထုးထီၣ်တၫ်မူၤတၫ်ဘှီးအပူၤ တၫ်သူကၠီၣ်တဲၣ်လီမ့ၣ်အူအိၣ်တအိၣ် တၫ်ပာ်ဂၢၫ်ပာ်ကျၢၤတန့ၫ်ဘၣ်ဆၣ် လၢတၫ် ထုးထီၣ်အကျိၤအကျဲအပူၤ လိၣ်ဘၣ်လီမ့ၣ်အူဂံၫ်ဘါအဃိ တၫ်သူလီမ့ၣ်အူဧါန့ၣ် ကဲထီၣ်တၫ်သံကွၫ်အဂ့ၫ် Bangkok ကွဲးဖျါဃာ်၀ဲလီၤ.
Ref:မောင်း
