လါနိၣ်၀့ဘၢၣ်(၁၂)သီ,၂၀၂၄နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ (၃)နံၣ်ဘျဲၣ်အတီၢ်ပူၤ သုးကီၣ်ကးအစုတီၤဖီလၥ်သုးတဖၣ် ဒွဲၣ်အူမၤဟးဂီၤကွံၥ်ကမျၢၢ်အိၣ်ဟံၣ်ဃီတဖၣ်အဃိ ထံကီၢ်ဒီတဘ့ၣ်ဟံၣ်ဃီလၢဘၣ်တၢ်ဒွဲၣ်အူကွံၥ်အီၤအိၣ်ထီၣ်၀ဲ(၁)ကလီၢ်ယဲၢ်ကထိဘျဲၣ်လံအဂ့ၢ် Data for Myanmar ထုးထီၣ်ပၥ်ဖျါဃၥ်၀ဲဖဲ လါနိၣ်၀့ဘၢၣ်(၁၀)သီအနံၤန့ၣ်လီၤ.
ဟံၣ်ဃီလၢဘၣ်တၢ်ဒွဲၣ်အူမၤဟးဂီၤကွံၥ်အီၤအနီၣ်ဂံၢ်နီၣ်ဒွးအံၤ စးထီဖဲ၂၀၂၁နံၣ် လါမ့ၤတုၤ၂၀၂၄နံၣ် လါအီးကၢးအတီၢ်ပူၤ တၢ်ဂ့ၢ်တၢ်ကျိၤတဖၣ်အဂ့ၢ် စံး၀ဲန့ၣ်လီၤ. ဟံၣ်ဃီ(၁)ကလီၢ်ဘျဲၣ်တခီ သုးကီၣ်ကးအသုးအစုတီၤဖီလၥ်တၢ်ကရၢကရိတဖၣ် ဒွဲၣ်အူမၤဟးဂီၤကွံၥ်၀ဲ၀ံၤ မ့မ့ၢ်(၃၈၀၀)ဘျဲၣ်တခီ တၢ်ကရၢကရိမတၤဒွဲၣ်အူမၤဟးကွံၥ်လဲၣ်န့ၣ် တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
စကဲကီၢ်ခီ, ဒံၣ်ပဲယ့ကီၢ်ဆၣ်အပူၤစ့ၢ်ကီး သုးကီၣ်ကးအသုးဒွဲၣ်အူမၤဟးဂီၤကွံၥ်အဃိ ဟံၣ်ဃီ(၆)ကထိဘျဲၣ် ဘၣ်ဟးအီၤကွံၥ်၀ဲန့ၣ်လီၤ.
Data For Myanmar အတၢ်ပၥ်ဖျါအဖီခိၣ် ဘၣ်တၢ်ဒွဲၣ်အူမၤဟးဂီၤကွံၥ်အကျါ စကဲကီၢ်ခီအပူၤ ဘၣ်တၢ်ဒွဲၣ်အူကွံၥ်အီၤ (၇)ကလးဘျဲၣ်(၇၃,၃၅၁ ဖျၢၣ်)အအါကတၢၢ်လီၤဒီး မကွ့, မါတလ့, ရၢၢ်ခၢၣ်ဒီးခၠီကီၢ်စဲၣ်တဖၣ်အပူၤ ဘၣ်တၢ်ဒွဲၣ်အူမၤဟးဂီၤကွံၥ်(၂)ကလးဘျဲၣ်(၂၆,၅၈၃ ဖျၢၣ်)အဂ့ၢ် ပၥ်ဖျါဃၥ်၀ဲန့ၣ်လီၤ.
လါအီးကထိဘၢၣ်ဒီးလါနိၣ်၀့ဘၢၣ်အတီၢ်ပူၤစ့ၢ်ကီး စကဲကီၢ်ခီအပူၤ ဟံၣ်ဃီတဖၣ်တၢ်ဒွဲၣ်အူကွံၥ်အီၤ အိၣ်ထီၣ်၀ဲအဖၢမုၢ်န့ၣ်လီၤ.
Data For Myanmar အတၢ်ပၥ်ဖျါအဖီခိၣ် ခီဖျိလၢသုးကီၣ်ကးဒီးအစုတီၤဖီလၥ်တၢ်ကရၢကရိတဖၣ် ဒွဲၣ်အူမၤဟးဂီၤကွံၥ်အဃိ ၂၀၂၁နံၣ်အတီၢ်ပူၤ ကမျၢၢ်အိၣ်ဟံၣ်(၂)ကထိဘျဲၣ်(၂၁၁၁)ဖျၢၣ်, ၂၀၂၂နံၣ်အတီၢ်ပူၤ ကမျၢၢ်အိၣ်ဟံၣ်(၄)ကလးဘျဲၣ်(၄၆,၈၅၆)ဖျၢၣ် မ့ၣ်အူအီၣ်ဟးဂီၤကွံၥ်၀ဲအသိး ၂၀၂၃နံၣ်အတီၢ်ပူၤ ဟံၣ်ဃီမ့ၣ်အူအီၣ်ဟးဂီၤကွံၥ် (၃)ကလးဘျဲၣ်(၃၁,၄၈၄)ဖျၢၣ် ဒီး ၂၀၂၄နံၣ်, လါအီကၢးအတီၢ်ပူၤ ဟံၣ်ဃီမ့ၣ်အူအီၣ်ကွံၥ်၀ဲ(၂)ကလးဘျဲၣ်(၂၁,၀၂၃)ဖျၢၣ်အဂ့ၢ် စံး၀ဲန့ၣ်လီၤ.
