လါနိၣ်၀့ဘၢၣ်(၁၁)သီ,၂၀၂၄နံၣ်
ပကိကီၢ်ခီ, တီအူကီၢ်ဆၣ်, သ၀ီ(၇)ဖျၢၣ်အပူၤ ထံလီၢ်ကီၢ်ပူၤပှၤဘၣ်ကီဘၣ်ခဲဖိ(၁၃၀၀)ဘျဲၣ် လိၣ်ဘၣ်တၢ်အီၣ်တၢ်အီတၢ်မၤစၢၤတဖၣ်အဂ့ၢ် တီအူ ပှၤတ၀ၢတၢ်မၤစၢၤကရၢတဖၣ် စံး၀ဲန့ၣ်လီၤ.
စးထီၣ်လၢလါနိၣ်၀့ဘၢၣ်(၈)သီအနံၤန့ၣ် တၢ်ဒုးကဲထီၣ်သးလၢ သုးကီၣ်ကးအသုးဒီးတၢ်ပၢၢ်ဆၢတဖၣ်အဘၢၣ်စၢၤ ဖဲတီအူကီၢ်ဆၣ်, ပရဲလိၥ်ကျိမုၢ်ထီၣ်တပၤန့ၣ်လီၤ.
“ထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ် လိၣ်ဘၣ် တၢ်အီၣ်တၢ်အီတဖၣ်လီၤ. (၂)သီအတီၢ်ပူၤ အိၣ်ထီၣ်ပှၤနီၣ်ဂံၢ်(၁၃၀၀)ဘျဲၣ်လံ. ခဲအံၤန့ၣ် ပှၤသီမီၢ်. ပှၤလီၢ်လံၤဖိလၢ အပူၤကွံၥ် (၂)နံၣ်တဖၣ် အိၣ်လၢ၀့ၢ်ပူၤဒံးန့ၣ်လီၤ. တၢ်မၤပူၤဖျဲးဒဲက၀ီၤ အိၣ်၀ဲ(၄)ဖျၢၣ်”အဂ့ၢ် ပှၤလၢရဲၣ်ကျဲၤမၤစၢၤတၢ်အီၣ်တၢ်အီတဂၤ စံး၀ဲန့ၣ်လီၤ.
တၢ်မၤပူၤဖျဲးဒဲက၀ီၤ(၄)ဖျၢၣ် အိၣ်၀ဲဒၣ်လၢ ၀့ၢ်တီအူအပူၤ, ရွ့ၣ်စၣ်တီၣ်, ပီၣ်တီၣ်မုၢ်, စံဖၠူၣ်ကွ့ဒီးမုၢ်ထီၣ်ကၠိကၠံသ၀ီတဖၣ်အပူၤ၀ံၤ ဖဲလၢတၢ်ဒုးစးထီၣ်ကဲထီၣ်(၁၀)နၣ်ရံၣ်လံၤလံၤန့ၣ် တၢ်ဆှၢထီၣ်ဂ့ၢ်ဂီၤအူလၢ တၢ်မၤပူၤဖျဲးသိလ့ၣ်တဖၣ်န့ၣ်လီၤ.
ထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ် အိၣ်၀ဲဒၣ်လၢ တၢ်ဒုးကဲထီၣ်သး ၀့ၢ်တီအူကလံၤစိး, မုၢ်ထီၣ်ကလံၤစိးဒီးပရဲလိၥ်ကျိမုၢ်ထီၣ်တပၤ သဖါပ့ၣ်, ကါနံၣ်, ခၠီးကါ, ငိးတီ, မလွးပ့ၣ်, ဖီၣ်ဆ့း, ကိၣ်မ့အဲၣ်သ၀ီတဖၣ်န့ၣ်လီၤ.
“တၢ်ထံၣ်ဘၣ် အါတက့ၢ်န့ၣ် ပှၤသူၣ်ခ့သးပှၢ်ဒီးဖိသၣ်ဆံးတဖၣ်လီၤ. အိၣ်ဒၣ်(၂)သီဒံးလီၤအဃိ တၢ်တမၤဘၣ်စရီဒံးဘၣ်. ကတီၢ်ခဲအံၤန့ၣ် တၢ်ဘှါရှဲအီၤလၢ ပှၤ၀့ၢ်ဖိအတၢ်မၤဘူၣ်တဖၣ်န့ၣ်လီၤ. တၢ်ဒုးစးထီၣ်ကဲထီၣ်သးအနံၤ, ပှၤဘၣ်ဒိသၢဂၤတခီ တၢ်လဲၤဆှၢဘၣ်ဆူ တီအူတၢ်ဆါဟံၣ်”အဂ့ၢ် ၀့ၢ်ပူၤတၢ်မၤပူၤဖျဲးကရၢဖိတဂၤ စံး၀ဲန့ၣ်လီၤ.
တၢ်ဒုးတၢ်အိၣ်သးတဖၣ်အဖီခိၣ် ထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ်ဟဲအိၣ်ထီၣ်အါသ့ၣ်အဃိ ၀့ၢ်ပူၤတၢ်မၤပူၤဖျဲးကရၢ(၇)ဖု ပၥ်ဖှိၣ်မၤသိးတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref:DVB
