လါနိၣ်၀့ဘၢၣ်(၄)သီ,၂၀၂နံၣ်
ယိၤဒိၣ်ကီၫ်စဲၣ်ကလံၤထံး,ပ့ၣ်လီဒီး၀့ၫ်ဖဲၣ်ခိၣ်အဆၢ သ၀ီတဖၣ်အပူၤ တၫ်ဒုးဆူၣ်ထီၣ်အဃိ သုးကီၣ်ကးတ့ၫ်လီၤဒြိမ့ၣ်ပိၢ် ဖဲလီၫ်က၀ီၤကမျၢၫ်လၢဃ့ၫ်ပူၤဖျဲးအသးတဖၣ်အဃိ ဖိသၣ်(၁)ဂၤပာ်ဃုာ် ပှၤဘၣ်သံအိၣ်ထီၣ်(၃) ဂၤလံန့ၣ်လီၤ.
ဖဲလါအီးကထိဘၢၣ်(၃၁)သီနံၤ ဂီၤ(၉)နၣ်ရံၣ်ဃၣ်ဃၣ်အကတီၫ် သုးကီၣ်ကးတ့ၫ်လီၤကျိချံ(၁၂၀-မမ) ၂ဖျၢၣ် လၢဒြိ ဆူကဟၣ်လွံၫ်ပၣ်တခိၣ်(ထော်လာဂျီတစီး) လၢအိၣ် ဟးထီၣ် ဖဲကီၫ်ဆၣ်ပ့ၣ်လီ,ဘါမီးသ၀ီလၢကဃ့ၫ်ပူၤဖျဲးသးအဂီၫ်အဃိ ဘၣ်သံကဒီး(၂)ဂၤန့ၣ်လီၤ.
Karenni Hopeပှၤမၤပူၤဖျဲးထီၣ်တၫ်ကရၢဖိတဂၤ တဲ၀ဲလၢ”ဖဲခီဂာ်ကျဲမုၫ်အကတီၫ် တၫ်ဒုးအီၤလၢဒြိလီၤ. ကျိချံလီၤတဲာ် ဘၣ်၀ဲဖဲ ကဟၣ်လွံၫ်ပၣ်(ထော်လာဂျီ)အဖီခိၣ်ဒီးပိၫ်ဖးထီၣ်အဃိ ပှၤဘၣ်သံ၀ဲ၀ံၤ ဘၣ်ဒိဘၣ်ထံး(၉)ဂၤအဂ့ၫ် တဲ၀ဲလီၤ.
သုးကီၣ်ကးအတၫ်ဒုးလၢြဒိအဃိ ကီၫ်ဆၣ်ပ့ၣ်လီ,ဘါမီးသ၀ီ(ဗန်းမောက်ရွာ) သးနံၣ်(၆၂)နံၣ်အိၣ် ဒီၣ်မူနါလီ(ဒေါ် မူနန်းလောဝ်)န့ၣ် သံဖဲအလီၫ်တဘျီဃီ၀ံၤ သးနံၣ်(၃၆)နံၣ်အိၣ် ဒီၣ်နါပိၣ်(ဒေါ်နန်းပုံ)ဒီး သးနံၣ်(၈)နံၣ်အိၣ် ဖိသၣ်လၢ တၫ်တသ့ၣ်ညါအမံၤ(၁)ဂၤတခီ ဖဲဒိးကူစါယါဘျါသးအကတီၫ် ဖဲလါနိၣ်၀့ဘၢၣ်(၁)သီဒီး(၂)သီနံၤန့ၣ် ဘၣ်သံ၀ဲအဂ့ၫ် တဲ၀ဲလီၤ.
Pekhon Health Community (PKHC)ဆူၣ်ချ့ကရၢ ကူစါယါဘျါ၀ဲ ပှၤဘၣ်ဒိဘၣ်ထံးတဖၣ် အသိး ပှၤလၢသံတဖၣ် စ့ၫ်ကီး ခူၣ်လီၤန့ၫ်၀ဲအဂ့ၫ် တၫ်သ့ၣ်ညါဘၣ်လီၤ.
ပှၤလီၫ်က၀ီၤဖိတဂၤတဲ၀ဲလၢ “တၫ်ဒုးဟီၣ်က၀ီၤန့ၣ် လဲၫ်ထီၣ်တသီ၀ံၤတသီန့ၣ်လီၤ.သ၀ီဖိတနီၤ သိလ့ၣ်တအိၣ်, မီၣ်တီၣ်တုးတအိၣ်အဃိ ဘၣ်အိၣ်တ့ၫ်လၢသ၀ီပူၤလီၤ. ပှၤလဲၤဃ့ၫ်အိၣ်ခူသူၣ် လၢသ၀ီကပၤ ပှၫ်ပူၤအိၣ်၀ဲလီၤ. တၫ်လၢအ၀ဲသ့ၣ်ပျံၤ၀ဲန့ၣ် မ့ၫ်ကျိဖးဒိၣ်,ကလံၤကျါတၫ်ခးလီၤတၫ် ကဘီယူၤတဖၣ် ဒီးဒြိတၫ်လီၤဘၣ်ယိၣ် တဖၣ်အဂ့ၫ်” န့ၣ်လီၤ.
သုးကီၣ်ကးအသုးခးလီၤနါစိၤကျိဖးဒိၣ်တဖၣ်,ဒုး၀ဲလၢကဘီယူၤတဖၣ်ဒီးလူၤတ့ၫ်လီၤမ့ၣ်ပိၫ်လၢြဒိတဖၣ်ဆူတၫ်လီၫ်လၢပှၤလီၫ်ကမှံဖိအိၣ်အလီၫ်အဃိ ကမျၢၫ်ဘၣ်ဒိဘၣ်ထံးဘၣ်သံဘၣ်ပှၫ်၀ံၤ လၢကတီၫ်အံၤ(၁)ဘျဲၣ်အတီၫ်ပူၤ သုးကီၣ်ကးအကျိဖးဒိၣ်ဒီးကလံၤကျါတၫ်ဒုးတဖၣ်အဃိ ကမျၢၫ်ဘၣ်ဒိဘၣ်ထံး အိၣ်ထီၣ်၀ဲတစှၤန့ၫ် (၂၀)ဂၤဘျဲၣ်အဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အိၣ်န့ၣ်လီၤ.
သုးကီၣ်ကးအသုးဒီး တၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ တၫ်ဒုးဆူၣ်ထီၣ် ဖဲဘါမီး(ဗန်းမောက်),နီၣ်၀ိ(နောင်ဝိုး) ,ပ့ၣ်စိၣ်(ပင်စုံ),လွဲၫ်၀ိ(လွယ်ဝန်း),ကိပီ(ကုန်းပေါ),နဖၣ်မူၤ(နမ့်ဖာမူ) သ၀ီတဖၣ်အပူၤအဃိ ကမျၢၢ်တဖၣ် ဘၣ်ဃ့ၫ်ပူၤ ဖျဲးသး၀ံၤ လဲၤသုးလီၫ်သုးကျဲအိၣ်ဆိး၀ဲဖဲပ့ၣ်လီ(ပင်လောင်း)ဒီးညီၣ်ရွှ့ၣ်(ညောင်ရွှေ)တကပၤအိၣ်အသိး ,အိၣ်ဆိးလၢ ပှၫ်ပူၤအိၣ်၀ဲအဂ့ၫ်န့ၣ်လီၤ.
လၢကတီၫ်အံၤ မ့ၫ်လၢတၫ်ဒုးဆူၣ်ထီၣ်အဃိ ဖဲၣ်ခိၣ်ဒီး၀့ၫ်ပ့ၣ်လီအပူၤ လီၫ်က၀ီၤကမျၢၫ်(၃)ကလးဂၤဘျဲၣ် ဘၣ်ဃ့ၫ်ပူၤ ဖျဲးအသး၀ံၤ လိၣ်ဘၣ်တၫ်မၤစၢၤအဂ့ၫ် တၫ်သ့ၣ်ညါဘၣ်လီၤ.
Ref: DVB
