လါနိၣ်၀့ဘၢၣ်(၄)သီ,၂၀၂၄နံၣ်
၂၀၂၄နံၣ်, လါနိၣ်၀့ဘၢၣ်(၃)သီအနံၤန့ၣ် တၢ်ဒုးကဲထီၣ်သးလၢ သုးကီၣ်ကးအပှၤသုးဖိလၢ ပၥ်တ့ၢ်ကွံၥ်ခီပူးသုးကလၢၤဃ့ၢ်ဖျိးကွံၥ်တဖၣ်ဒီးKNLAတၢ်ပၢၢ်ဆၢသုးပၥ်ဖှိၣ်အဘၢၣ်စၢၤ၀ံၤ ခံခီခံကပၤတၢ်ဘၣ်ဒိဘၣ်ထံးဒီးတၢ်သံတၢ်ပှၢ်အိၣ်ထီၣ်၀ဲန့ၣ်လီၤ.
တၢ်ဒုးအပူၤ သုးကီၣ်ကးအပှၤသုးဖိဘၣ်သံ၀ဲ(၁၄)ဂၤဒီး တၢ်ဖီၣ်န့ၢ်မူဒံးပှၤ(၁၇)ဂၤအဂ့ၢ် ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA)လၢ အပၥ်ဃုၥ်လၢတၢ်ဒုးအံၤအပူၤ ထုးထီၣ်ပၥ်ဖျါဃၣ်၀ဲ ဖဲလါနိၣ်၀့ဘၢၣ်(၃)သီအနံၤ, ဟါလီၤလီအဆၢကတီၢ်န့ၣ်လီၤ.
တၢ်ဒုးအပူၤ (BPLA)အပှၤသုးဖိ(၁)ဂၤစ့ၢ်ကီး ဘၣ်သံ၀ဲ၀ံၤ အပှၤသုးဖိတနီၤ ဘၣ်ဒိဘၣ်ထံး၀ဲန့ၣ်လီၤ. (BPLA) ထုးထီၣ်ပၥ်ဖျါဃၥ်၀ဲစ့ၢ်ကီး တၢ်ဂီၤမူလၢ တၢ်ဖီၣ်န့ၢ်သုးကီၣ်ကးအပှၤသုးဖိတဖၣ်ဒီးပှၤဘၣ်ဒိဘၣ်ထံးတဖၣ်န့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးခီပူးသုးကလၢၤ ဖဲလါအီးကထိဘၢၣ်(၂၉)သီအနံၤ,ဂီၤအဆၢကတီၢ်အဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကမျၢၢ်တၢ်ဒီသဒၢသုး(PDF),ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA)ဒီး Force for Federal Democracy(FFD)သုးတဖၣ် ပၥ်ဖှိၣ်ထီၣ်ဒုး၀ဲ သုးကီၣ်ကးခီပူးသုးကလၢၤန့ၣ်လီၤ.
သုးကီၣ်ကးခီပူးသုးကလၢၤအံၤ အိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်, ဘုသိၣ်ကီၢ်ဆၣ်ဟီၣ်က၀ီၤအပူၤန့ၣ်လီၤ.
