AAအတၫ်ထီၣ်ဒုး တၫ်ကစီၣ်တဖၣ်အဃိ ရခၢၣ်ရိမးကစၢၫ်ခီၣ်ထံးသ၀ီတဖၣ် သုးကီၣ်ကးနီဟးထီၣ်ကွံာ်

လါအီးကထိဘၢၣ်(၂၃)သီ,၂၀၂၄နံၣ်

ရခၢၣ်သုးမုၫ်ဒိၣ်AAအတၫ်ထီၣ်ဒုးသုတတုၤလၢ အ့ၣ်ယၣ်၀တံၣ်ကီၫ်ခီပူၤအဂီၫ် ရခၢၣ်ရိမးကစၢၫ်ခီၣ်ထံးသ၀ီတဖၣ်အပူၤ သ၀ီဖိတဖၣ် သုးကီၣ်ကးနီဟးထီၣ်ကွံာ်၀ဲန့ၣ်လီၤ.

သုးကီၣ်ကးန့ၣ် ဒူသ၀ီအဖျၢၣ်(၂၀)ဘျဲၣ်လၢအိၣ်ဘျးစဲဒီးရခၢၣ်ရိမးတဖၣ် လၢတလါအံၤအတီၫ်ပူၤ တဲပျံၤတဲဖုးမၢသုးကွံာ်အလီၫ်အဃိ ပှၤအါတက့ၫ် ဘၣ်ဃ့ၫ်ပူၤဖျဲးကွံာ်အိၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.

တလါအံၤ(၂၁)သီ ပာ်၀ဲလၢအလီၫ်ခံကတၢၫ်၀ံၤ အ့ၣ်ယၣ်ပတံၣ်ကီၫ်ခီ,ယ့ၣ်ကၠံၣ်ကီၫ်ဆၣ်အပူၤ သ၀ီအဖျၢၣ်(၂၀)ဃၣ်ဃၣ်ဒီးကွးကီၫ်ဆၣ်အပူၤ သ၀ီပာ်ဃုာ်တနီၤ ခဲလၢာ်ပာ်ဖှိၣ် ဟံၣ်ခိၣ်(၃၀၀)ဘျဲၣ်ဃၣ်ဃၣ် တၫ်မၢသုးကွံာ်အသးအဂ့ၫ် လီၫ်က၀ီၤဖိတဖၣ်တဲ၀ဲလီၤ.

တၫ်လီၫ်တဖၣ်န့ၣ် အိၣ်ဘူးဘျးစဲဒီးရခၢၣ်ကီၫ်စဲၣ်ကလံၤထံး ကွးကီၫ်ဆၣ်တၫ်လီၫ်၀ံၤ တၫ်မ့ၫ်တသုးအသးဘၣ်န့ၣ် ကတ့ၫ်လီၤမ့ၣ်ပိၫ်လၢကဘီယူၤအဂ့ၫ် တဲပျံၤတဲဖုး၀ဲအိၣ်န့ၣ်လီၤ.

တၫ်အိၣ်သးအိၣ်လၢ ရခၢၣ်သုးမုၫ်ဒိၣ်AAအတၫ်ထီၣ်ဒုး ဟဲတုၤဃီၤသ့ကိးဆၢကတီၫ်ဒဲးအဃိ သုးကီၣ်ကးန့ၣ် ဟီၣ်က၀ီၤခံခါအဘၢၣ်စၢၤသ၀ီတဖၣ် မၢသုးကွံာ်အသး၀ံၤ ကအိၣ်ခိးသဂၢၫ် AAအတၫ်ထီၣ်ဒုးဃီၤအဂီၫ် လီၤဂာ်လၢရဲၣ်ကျဲၤ၀ဲန့ၣ်လီၤ.

သုးကီၣ်ကးန့ၣ် လၢအ့ၣ်ယၣ်၀တံၣ်ကီၫ်ခီဆူ ရခၢၣ်ကီၫ်စဲၣ်တကပၤ တၫ်အီၣ်တၫ်အီပာ်ဃုာ် ပနံာ်တၫ်ဖိတၫ်လံၤတဖၣ် ကးတံာ်ကွံာ်၀ဲအသိး,ကွးပှၤလီၫ်အိၣ်ကမှံဖိလၢ ဟဲဃ့ၫ်အိၣ်ကဒုဆူအ့ၣ်ယၣ်၀တံၣ်ကီၫ်ခီတဖၣ်စ့ၫ်ကီး ခိၣ်ဂီၤပာ်ဃုာ် လံာ်လဲၫ်တၫ်အုၣ်ကီၤမ့ၫ်လၢပှဲၤမးဒီး ဟ့ၣ်ခီနုာ်၀ဲ၀ံၤ လံာ်လဲၫ်မ့ၫ်တလၢပှဲၤတခီ ညီနုၫ်ဃ့အီၣ်စ့န့ၣ်လီၤ.

လၢကတီၫ်အံၤ ကီၫ်ဆၢ၀့ၫ်မီတီ,မုၫ်နုာ်ကီၫ်ခီ သုး၀ဲၤလီၫ်ခိၣ်သ့ၣ်အိၣ်တၫ်လီၫ် အါ(အမ်း)ဒီးကွးကီၫ်ဆၣ်တဖၣ်အပူၤ ရခၢၣ်သုးမုၫ်ဒိၣ်AAဒီးသုးကီၣ်ကးအသုးတဖၣ်အဘၢၣ်စၢၤ တၫ်ဒုးဆူၣ်ထီၣ်၀ံၤ တီၣ်ကိး(တောင်ကုတ်), အါ(အမ်း) ဒီးမီတီတဖၣ်အပူၤ သုးကီၣ်ကးဟဲခးလီၤတၫ်လၢကလံၤကျါအိၣ်၀ဲန့ၣ်လီၤ.

ဖဲတလါအံၤ(၁၂)သီအနံၤ လၢကွးကီၫ်ဆၣ်,ကူတိးလ့သ၀ီကပၤ တၫ်လူၫ်ခိၣ်တၫ်ဒုးဆူၣ်ထီၣ်အကတီၫ် သုးကီၣ်ကးအသုးဟဲတ့ၫ်လီၤမ့ၫ်ပိၫ်လၢကမျၢၫ်အိၣ်တၫ်လီၫ်အဃိ ပိာ်မုၣ်(၁)ဂၤပာ်ဃုာ် လီၫ်က၀ီၤကမျၢၫ်ဘၣ်သံ(၃)ဂၤအဂ့ၫ် လီၫ်က၀ီၤတၫ်ကစီၣ်သန့တဖၣ်ပာ်ဖျါ၀ဲလီၤ.

ရခၢၣ်သုးမုၫ်ဒိၣ်AAလၢကိးသတြီထီၣ်ဃာ်၀ဲ လၢကထီၣ်ဒုးပၢဆှၢရခၢၣ်ကီၫ်စဲၣ်ဒီတဘ့ၣ်အံၤ ထီၣ်ဒုးမၤန့ၫ်ပၢဆှၢဃာ်၀ဲ မၠ့ၣ်ပိၣ်,မ့ပၠါ,မၠီးအူ,ကၠီးတီၣ်,ပီးတီ,ပိၣ်နါကၠိ,ယသ့းတီၣ်,ဘူသံတီၣ်,ယါပၠဲ,သၣ်တွဲဒီးခၠီကီၫ်စဲၣ် ပလဲး၀းတဖၣ်န့ၣ်လီၤ.

Ref: Myanmar Now