လါအီးကထိဘၢၣ်(၂၂)သီ,၂၀၂၄နံၣ်
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) က၀ီၤကးတံၥ်ဒုး အနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤ လၢအိၣ်ဖဲ လၢၢ်ကတံၤ-ဃိၣ်သၢဖျၢၣ်ကျဲမုၢ်အဖီခိၣ်အဃိ သုးကီၣ်ကးအပှၤသုးဖိ(၇၀)ဃၣ်ဃၣ် ဟဲပၥ်လီၤစုက၀ဲၤဆူ KNLAအအိၣ်အဂ့ၢ် တၢ်မဲၥ်ညါဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ခီဖျိလၢ KNLAသုးပၥ်ဖှိၣ်တဖၣ် က၀ီၤဒုး အနါကွ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအဃိ သုးကီၣ်ကးတပၤ ဟဲခးစၢၤတၢ်လၢ ကလံၤကျါတကးဘၣ် ခးစၢၤ၀ဲစ့ၢ်ကီး ကျိဖးဒိၣ်တဖၣ်န့ၣ်လီၤ. သုးကီၣ်ကးတပၤ ဒ်သိးအသုးကလၢၤသုတလီၤအဂီၢ် မူးဒိၣ်ကျိဖးဒိၣ်သုး, ၀ဲကလီကျိဖးဒိၣ်သုးဒီး တီၣ်ကလ့သ၀ီတဖၣ် ခးလီၤ၀ဲကျိဖးဒိၣ်အိၣ်ထီၣ်၀ဲ ကိးမုၢ်နံၤကိးမုၢ်နၤန့ၣ်လီၤ.
လါအီးကထိဘၢၣ်(၁၈)သီအနံၤန့ၣ် သုးကီၣ်ကးအနါကွံသုးတၢ်တိၥ်ကူၣ်ကျဲခိၣ်သ့ၣ်အပှၤသုးဖိ(၇၀)ဂၤဃၣ်ဃၣ် ဟဲပၥ်လီၤစုက၀ဲၤအဂ့ၢ်န့ၣ် တၢ်မဲၥ်ညါဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
“ကယီကယီန့ၣ် တယံၤလၢၤဘၣ် ကမၤန့ၢ်ဘၣ်လီၤ. တနီၤဟဲပၥ်လီၤစုက၀ဲၤလီၤ. ဟဲပၥ်လီၤစုက၀ဲၤ ကအိၣ်လံ(၇၀)ဃၣ်ဃၣ်လံ. တအိၣ်တ့ၢ်အါအါလၢၤလၢ သုးကလၢၤပူၤလၢၤဘၣ်. အဒုးယၤခိၣ်န့ၣ် အခိၣ်ကျၢၤဒိၣ်မးလီၤ. တတ့ၢ်စှၤလီၤအသးနီတစဲးဘၣ်. မ့ၢ်ဘၣ်တဲလိၤလိၤန့ၣ် သုးသ့ၣ်လၤကပီၤလၢတအိၣ်ဘၣ်န့ၣ် မၤဂ့ၤထီၣ်၀ဲဒံး. အခဲအံၤ ပ၀ဲတခီ(KNLA)သုးက့(၆)ဒုးယၤခိၣ်နီၢ်ကစၢ် ပၢဆှၢရဲၣ်ကျဲၤ၀ဲန့ၣ်လီၤ.”
ခီဖျိလၢ တၢ်က၀ီၤဒုး အနါကွ့သုးတၢ်တိၥ်ကူၣ်ကျဲၤခိၣ်သ့ၣ်အဃိ သုးကီၣ်ကးတပၤ ခးလီၤကျိဖးဒိၣ်တပယူၥ်ဃီအဃိ အနါကွ့, လိးရှါ, တည့ၣ်, ဖၣ်ယၣ်, ကၠါမံ, ဖါပၠးဒီး သ၀ီကပိၥ်ကပၤတဖၣ်အပူၤ လီၢ်က၀ီၤကမျၢၢ်တဖၣ် ဘၣ်ဃ့ၢ်ပူၤဖျဲးသးန့ၣ်လီၤ.
တကးဘၣ် သုးကီၣ်ကးသုးကျိၤတဖၣ် လဲၤနုၥ်လီၤသုးကျိၤဆူဒူသ၀ီတဖၣ်ပူၤ, တၢ်ဖီၣ်န့ၢ်လီၢ်က၀ီၤကမျၢၢ်တဖၣ်, တၢ်မၤသံမၤ၀ီတၢ်တဖၣ် ဒီး တၢ်ဟံးန့ၢ်ဆူၣ်ကမျၢၢ်စုလီၢ်ခီၣ်ခိၣ်တဖၣ်အဃိ လီၢ်က၀ီၤကမျၢၢ်တဖၣ် တဖံးအီၣ်မၤအီၣ်ဘၣ်တၢ်လၢ တၢ်သဘျ့အပူၤဘၣ်အဂ့ၢ် ပှၤလၢမၤစၢၤပှၤဃ့ၢ်သုးထံလီၢ်ကီၢ်ပူၤဂ့ၢ်ဂီတဖၣ် စံး၀ဲန့ၣ်လီၤ.
ဘၣ်ပျံၤဘၣ်ဖုး သုးကီၣ်ကးသုးတဖၣ်၀ံၤ သုးကီၣ်ကးသုးကလၢၤတဖၣ်မ့ၢ်တအိၣ်လၢၤဘၣ်န့ၣ် တၢ်ဂ့ၢ်ကီတအိၣ်နီတမံၤလၢၤဘၣ်အဂ့ၢ် ပှၤလီၢ်က၀ီၤဖိတဖၣ် စံး၀ဲန့ၣ်လီၤ.
ပှၤလီၢ်က၀ီၤဖိတဂၤ စံး၀ဲလၢ” သုးကီၣ်ကးအသးမ့ၢ်တအိၣ်လၢၤဘၣ်န့ၣ် တၢ်ဂ့ၢ်ကီတအိၣ်နီတမံၤလၢၤလၢ ပှၤလီၢ်က၀ီၤဖိတဖၣ်အဂီၢ်ဘၣ်. ဘၣ်ပျံၤလီၤ သုးကီၣ်ကးအသုးလီၤ. ပှၤPDFဖိတဖၣ် မ့ၢ်ဟဲနုၥ်လီၤန့ၣ် ဖံးအီၣ်မၤအီၣ်ဘၣ်တၢ်လၢ တၢ်သဘျ့အပူၤလီၤ. သုးကီၣ်ကးအသုးတဖၣ်မ့ၢ်ဟဲနုၥ်လီၤန့ၣ် လၢအ၀ဲသ့ၣ်တၢ်ဘၣ်သးအသိး မၤ၀ဲခဲလၢၥ်လီၤ. ပှၤဒူသ၀ီတဖၣ်အံၤ သုးကီၣ်ကးအသုးတဖၣ်မ့ၢ်တအိၣ်လၢၤဘၣ်န့ၣ် အိၣ်ဘၣ်လၢတၢ်သဘျ့အပူၤလီၤအဂ့ၢ်” စံး၀ဲန့ၣ်လီၤ.
ခီဖျိလၢ အပူၤကွံၥ် လါစဲးပထ့ဘၢၣ်တၢ်ထၢဆူၣ်သုးသဲးစတၢ်ဘျၢအဃိ ပှၤသုးဖိသီလၢ တၢ်ဘၣ်ကဲသုးတဖၣ် တအဲၣ်ဒိးလၢကကဲသုးဘၣ်အဃိ သုးဖိသီလၢဟဲပၥ်လီၤစုက၀ဲၤအိၣ်၀ဲ(၁၀)ဂၤန့ၣ်လီၤ.
လၢန့ၣ်အမဲၥ်ညါ ပှၤဃ့ၢ်သုးထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ် ဘၣ်ပၥ်တ့ၢ်အိၣ်ဆိးလီၢ်ကျဲဖံးအီၣ်မၤအီၣ်လီၢ်ကျဲးတဖၣ် တကးဘၣ် ခီဖျိလၢထံရူၢ်ကီၢ်သဲး တဂၢၤကျၢၤဘၣ်အဃိ ဘၣ်ကးတံၥ်ဃၣ်၀ဲ တၢ်သိၣ်လိကၠိတဖၣ်၀ံၤ ဖိသၣ်တဖၣ် ကဖံးလိမၤလိဘၣ်တၢ်အဂီၢ် ခွဲးယၥ်တဖၣ်လီၤမၢ်ကွံၥ်၀ဲအဂ့ၢ် ပှၤလၢမၤစၢၤထံလီၢ်ကီၢ်ပူၤပှၤဘၣ်ကီဘၣ်ခဲဖိဂ့ၢ်၀ီတဖၣ် စံး၀ဲန့ၣ်လီၤ.
Ref: DVB
