လါအီးကထိဘၢၣ်(၁၈)သီ,၂၀၂၄နံၣ်
ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် ဘိးဘၣ်ရၤလီၤ၀ဲလၢ လါအီးကထိဘၢၣ်(၁၇)သီအနံၤ, ဂီၤ(၄း၃၀)နၣ်ရံၣ်အဆၢကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုၥ်ဂၢၤသးကရၢ(K.N.D.O)ဒီးသုးပၥ်ဖှိၣ်တဖၣ်ထီၣ်ဒုးမၤန့ၢ်သုးကီၣ်ကးစွဲၤတီၤကိကျိဖးဒိၣ်သုးကလၢၤလၢအိၣ်ဖဲခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၆),ကီၢ်ရ့ၣ်ဒူပျၥ်ယၥ်,ကီးတရံးကီၢ်ဆၣ်, လ့က့ၣ်ကိၥ်ဝ့ၢ်ဃၢၤအဂ့ၢ်န့ၣ်လီၤ.
စွဲၤတီၤကိသုးကလၢၤအံၤမ့ၢ်သုးကလၢၤတဖျၢၣ်လၢမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်(ရတခ)အစုတီၤဖီလၥ်သုးတဖၣ် တီခိၣ်ရိၣ်၀ဲဒီး စးထီၣ်လၢ၂၀၀၃နံၣ်န့ၣ် ဟဲဆီလီၤပၥ်အသးလၢ ကၠီၣ်တဲၣ်-ကညီကီၢ်ဆၢ၀ံၤ ၂၀၂၁နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံသုးတြိၤ(၂၂), သုးတြိၤ(၄၄)ဒီး ပီၣ်လဲၢ်နံၤသုးတဖၣ် ဟဲဆီလီၤအိၣ်သုးကလၢၤန့ၣ်လီၤ.
သုးကလၢၤအံၤအိၣ်ဆီလီၤပၥ်သးလၢ ကၠီၣ်တဲၣ်-ကညီကီၢ်ဆၢဒီးတၢ်ပညိၣ်ဆီလီၤပၥ်အီၤ ဒ်သိးကန့ၢ်ပၢလီၢ်က၀ီၤဒီးကီၢ်ဆၢဘံၢ်ဘၢအဂီၢ်၀ံၤ စးထီၣ်လၢဟဲနုၥ်လီၤဒုး လ့က့ၣ်ကိၥ်၀့ၢ်သီန့ၣ် ပညိၣ်ခးလီၤကျိဖးဒိၣ်တဖၣ်ဆူ ရၤမတံဒီးဖလူဟီၣ်က၀ီၤဒီတကျိၤ၀ံၤ မၤကမၣ်ပှၤဟီၣ်ခိၣ်ဖိခွဲးယၥ်တဖၣ် တပယူၥ်ဃီအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၣ်၀ဲန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရီၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုးအီၤသုးကလၢၤအံၤ ယံၤ(၇)လါဃၣ်ဃၣ်မး တၢ်ထီၣ်ဒုးမၤန့ၢ်၀ဲဒီး တၢ်ထီၣ်ဒုးမၤန့ၢ်အပူၤ တၢ်ဖီၣ်န့ၢ်သုးကီၣ်ကးအပှၤသုးဖိတဖၣ်တကးဘၣ် တၢ်မၤန့ၢ်စ့ၢ်ကီး (၁၂၀-မမ)ကျိဖးဒိၣ်(၂)ခိၣ်, (၀.၅)(၁)ခိၣ်ဒီး စုက၀ဲၤအဆံးပၥ်ဃုၥ် ကျိချံပှၥ်သၣ်အါအါဂီၢ်ဂီၢ်န့ၣ်လီၤ.
ဖဲအပူၤကွံၥ် ၂၀၂၃နံၣ်, လါယူၤလံ(၂၀)သီအနံၤစ့ၢ်ကီး KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးလဲးခးတီၣ်သုးကလၢၤအဂ့ၢ်န့ၣ်လီၤ.
