လါအီးကထိဘၢၣ် (၁၆)သီအနံၤ, ၂၀၂၄နံၣ်
လါအီးကထိဘၢၣ်(၁၄)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် ပၥ်ဖျါဃၣ်၀ဲလၢ ဒ်ကရၢမိၢ်ပှၢ် အတၢ်အၢၣ်လီၤအီလီၤလၢ တၢ်ကမၤဂ့ၤထီၣ်တၢ်ပၢတၢ်ပြးဒီးတၢ်ကဲခိၣ်ကဲနၢ်ကံၢ်စီတဖၣ်အဂီၢ်အသိးန့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒုးအိၣ်ထီၣ် တၢ်မၤဂ့ၤထီၣ်ကံၢ်စီ(၁)လါတၢ်မၤလိလၢ ကီၢ်သူလ့ၤဟီၣ်က၀ီၤပူၤ စးထီၣ်လၢ လါစဲးပထ့ဘၢၣ်(၁၆)သီ တုၤလါအီးကထိဘၢၣ် (၁၁) သီ, ၂၀၂၄နံၣ်အတီၢ်ပူၤအဂ့ၢ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, နဲၣ်ရွဲၣ်ခိၣ်ကျၢၢ်သဃဲၤ (၂)ဒီးတၢ်မၤဂ့ၤထီၣ် တၢ်ပၢတၢ်ပြးကံၢ်စီကမံးတံာ်ခိၣ် ပဒိၣ်စီၤလးထိ ပာ်ဖျါတၢ်အိၣ်သးလၢ တၢ်မၤဂ့ၤထီၣ်တၢ်ပၢတၢ်ပြးကံၢ်စီအဂီၢ် ဒ်အမ့ၢ်, “တၢ်မၤလိအံၤ အတၢ်ပညိၣ် မ့ၢ်ဒ်သိး တၢ်တိာ်ကူၣ်ကျဲၤခိၣ်သ့ၣ်တဖၣ်အကျါ တၢ်ကဒုးအိၣ်ထီၣ် ကျဲတဘိလၢတၢ်ကမၤဂ့ၤထီၣ် တၢ်ကဲခိၣ်ကဲနၢ်လၢ ပှၤအါဂ ပၣ်ဃုာ်ပၣ်ဂီၢ်သကိးတၢ်ဒီး သးစၢ်ခိၣ်နၢ်တဖၣ် ကဒိးန့ၢ်ဘၣ် မူဒါအကါဒိၣ်လၢ ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢ အတၢ်ပၢတၢ်ပြး တၢ်သူၣ်ထီၣ်ဆီလီၤအပူၤအဂီၢ်န့ၣ်လီၤ.”
တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိအံၤမ့ၢ်၀ဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အခီၣ်ကါတခါလၢအဖျါ ဒ်အဂုာ်ကျဲးစၢးထဲးဂံၢ်ထဲးဘါ ကတီၤဆိပာ်စၢၤတၢ် ဒ်သိးဒီးကီၢ်ရ့ၣ်ဒီး၀ဲၤကျိၤခိၣ်နၢ်တဖၣ် အတၢ်သ့တၢ်ဘၣ်ကံၢ်စီကဂ့ၤထီၣ်အဂီၢ် ဒီးကကွၢ်ဆၢၣ်မဲာ်သဂၢၢ်၀ဲဒၣ် တၢ်ပၢတၢ်ပြးတၢ်တၤတၢ်တဖၣ် လၢထံရူၢ်ကီၢ်သဲးတၢ်အိၣ်သး တၢ်ဆီတလဲချ့သဒံးအပူၤအံၤ ကသ့အဂီၢ်အဂ့ၢ်စံး၀ဲန့ၣ်လီၤ.
တၢ်ကဲခိၣ်ကဲနၢ်, တၢ်ပၢတၢ်ပြးဒီးတၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိအံၤ ဘၣ်တၢ်မၤအီၤသၢ၀ီတ၀ီလံဒီး လၢကီၢ်သူလ့ၤဟီၣ်က၀ီၤအပူၤ တၢ်ပၢတၢ်ပြးလၢအအိၣ်ဒီးတၢ်တုၤလီၤတီၤလီၤဒီး တၢ်သးစွံကတုၤတဖၣ်အံၤ ဒ်သိးဒီးကကဲထီၣ်တၢ်မၤစၢၤလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အတၢ်မုၢ်လၢ်ကွၢ်စိလၢ တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ သနၢၣ်(၃)ထံၣ်အံၤအဂီၢ်န့ၣ်လီၤ.
ခိၣ်နၢ်ခၢၣ်စးလၢ အဟဲထီၣ်တၢ်မၤလိအံၤတဖၣ်ဒ်သိးဒီး ကက့ၤတီခိၣ်ရိၣ်မဲက့ၤ အနီၣ်ကစၢ်ကီၢ်ရ့ၣ်ဒီး၀ဲၤကျိၤသ့ၣ်တဖၣ်ဃုာ်ဒီး တၢ်နာ်န့ၢ်တၢ်, တၢ်အိၣ်ဖျိအိၣ်ဖျါ ဒီး တၢ်သ့ဟံးန့ၢ်မူဒါသ့ၣ်တဖၣ်ဒီး တၢ်ဆီၣ်ထွဲမၤစၢၤအီၤ ခီဖျိလၢတၢ်သ့တၢ်ဘၣ်, တၢ်ပီးတၢ်လီဒီးတၢ်မၤတၢ်ရဲၣ်တၢ်ကျဲၤသ့ၣ်တဖၣ်န့ၣ်လီၤ.
တၢ်မၤလိတကတီၢ်အံၤ ၀ံၤ၀ဲတဆၢကတီၢ်န့ၣ် ခိၣ်နၢ်ခၢၣ်စး ပှၤမၤလိတၢ် ခဲလၢာ် ပာ်ဖှိၣ် (၂၁၇) ဂၤ န့ၣ် တၢ်ဟ့ၣ်လီၤ တၢ်မၤလိ၀ံၤ၀ဲလံန့ၣ်လီၤ.
”ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူ၀့ ဟ့ၣ်ကူၣ်ဟ့ၣ်ဖး ဟ့ၣ်သဆၣ်ထီၣ်၀ဲဒၣ် ဖဲ တၢ်မၤလိ ပျၢ်တၢ်ရဲၣ်တၢ်ကျဲၤ ဒ်အမ့ၢ်, “ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအံၤ စးထီၣ်လၢ စုက၀ဲၤတၢ်ပၢၢ်ဆၢကတီၢ်အိၣ်ထီၣ်ကတီၢ်န့ၣ် အိၣ်ဒီးဟီၣ်က၀ီၤ, အိၣ်ဒီးကမျၢၢ်သ့ၣ်တဖၣ်အဃိ ဘၣ်ဒုးအိၣ်ထီၣ်၀ဲဒၣ် တၢ်ပၢတၢ်ပြးတၢ်ဖံးတၢ်မၤသ့ၣ်တဖၣ် ဒ် ပဒိၣ်တဖုအသိးဒီး ဆၢကတီၢ်အခဲအံၤစ့ၢ်ကီး ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢအံၤ ဒ်တၢ်ပၢၢ်ဆၢကတီၢ် ကီၢ်သူလ့ၤပဒိၣ်တဖုအသိး ကအိၣ်လၢပှဲၤဒီး အကံၢ်အစီဒီးတၢ်မၤကျိၤကျဲလီၤတံၢ် လီၤဆဲးသ့ၣ်တဖၣ်အဂီၢ် ခီဖျိလၢတၢ်မၤဂ့ၤထီၣ်တၢ်ပၢတၢ်ပြးကံၢ်စီ ကမံးတံာ်တၢ်မၤလိသ့ၣ်တဖၣ်အံၤန့ၣ် ပကဘၣ် ဂုာ်ကျဲးမၤ မၤ၀ဲဒၣ် တုၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အထံရူၢ်ကီၢ်သဲး အတၢ်မုၢ်လၢ်ကွၢ်စိတဖၣ် ဒီး အတၢ်ပညိၣ်တဖၣ် ကတုၤထီၣ် ထီၣ်ဘး၀ဲအဂီၢ်န့ၣ်လီၤ.”
တၢ်ရဲၣ်တၢ်ကျဲၤ ခံပတီၢ်တပတီၢ်အံၤအပူၤ ခိၣ်နၢ်ခၢၣ်စး(၃၈)ဂၤလၢ ကီၢ်ရ့ၣ်ဒူသထူၣ်, ကီၢ်ရ့ၣ် ဒူပျာ်ယာ်ဒီး ကီၢ်ရ့ၣ်ဖၣ်အၣ်တဖၣ်လၢ အမ့ၢ် ကီၢ်ရ့ၣ်သ့ၣ်တဖၣ် အကါဒိၣ်လၢ တၢ်တိာ်ကူၣ်ကျဲၤခိၣ်သ့ၣ် တၢ်လီၢ်သ့ၣ်တဖၣ် အဟဲထီၣ်၀ဲန့ၣ်လီၤ. တၢ်ကဲခိၣ်ကဲနၢ်, တၢ်ပၢတၢ်ပြး ဒီး တၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီ တၢ်မၤလိအံၤ အိၣ်ဒီးတၢ်ပညိၣ်ကွၢ်စိ လၢ ခိၣ်နၢ်တဖၣ်လၢ အဟဲထီၣ်တၢ်မၤလိတဖၣ် ကဟံးန့ၢ်မူဒါအကါဒိၣ်တဖၣ်လၢ တၢ်ပၢတၢ်ပြးဒီးတၢ်ပၢဆှၢကမျၢၢ် လၢအအိၣ်လၢ အဟီၣ်က၀ီၤပူၤသ့ၣ်တဖၣ်ဒီး ခိၣ်နၢ်ခၢၣ်စးသ့ၣ်တဖၣ်အံၤ အကံၢ်အစီကဂ့ၤဒိၣ်ထီၣ် အါထီၣ်အဂီၢ် န့ၣ်လီၤ.
ကၠိလၢ အမ့ၢ် တၢ်ပၢတၢ်ပြးဒီးတၢ်ပၢဆှၢရဲၣ်ကျဲၤကမျၢၢ်ဂ့ၢ်၀ီကၠိ လၢအမ့ၢ် တၢ်ကမၤဂ့ၤထီၣ် တၢ်ပၢတၢ်ပြးကံၢ်စီလၢ ကီၢ်ပယီၤအပူၤ အဂီၢ်တဖျၢၣ်အံၤ မၤစၢၤ၀ဲ ဒ်သိးဒီး တၢ်မၤလိအံၤ ကကဲထီၣ်အဂီၢ်န့ၣ်လီၤ.
