လါအီးကထိဘၢၣ်(၁၅)သီ,၂၀၂၄နံၣ်
ကညီကီၫ်စဲၣ်လၢ သုးဂ့ၫ်၀ီတၫ်သဘံၣ်သဘုၣ်ဖ့ၣ်ဆၢအဖၢမုၫ်, ကီးတရံး-ရၤမတံကျဲဒီတကျိၤ သုးကီၣ်ကးဒီးကလုာ်ဒူၣ် ဖီၣ်စုက၀ဲၤကရၢအတြဲၤခဲလၢာ်အိၣ်၀ဲ(၂၀)ဘျဲၣ်၀ံၤ ဖီၣ်သံကွၫ်သမံသမိးဃ့အီၣ်စ့အိၣ်၀ဲအဂ့ၫ် ပှၤလဲၤထီၣ်က့ၤလီၤဒီးပှၤကူၣ်လဲၤမၤကၤတၫ်ဖိတဖၣ်တဲ၀ဲလီၤ.
လၢကျဲဒီတဘိ တၫ်ဒုးကဲထီၣ်တလီၫ်လီၫ်အသိး မ့ၫ်ဟီၣ်က၀ီၤတဘ့ၣ်လၢသုးကီၣ်ကးဒီးပှၤဖီၣ်စုက၀ဲၤကရၢတဖၣ် ဒိၣ်စိအလီၫ်န့ၣ်လီၤ.
ကညီကီၫ်စဲၣ်,ဖၣ်အၣ်,ကီးတရံး,ရၤမတံကျဲတဖၣ်အဖီခိၣ် သုးကီၣ်ကးဒီးကလုာ်ဒူၣ်ဖီၣ်စုက၀ဲၤကရၢတဖၣ် အတၫ်သမံသမိးတြဲၤအိၣ်(၂၀)ဘျဲၣ်၀ံၤ တၫ်ဘၣ်ကဲသုးတၫ်ဘျၢသဲစးအဃိ သးစၫ်လၢပဒ့ၣ်ဟးဆှဲးအသးဒီးကလဲၤမၤတၫ်တဖၣ် လၢကျဲဒီတဘိသမံသမိး၀ဲဃံးဃံးန့ၣ်လီၤ.
လၢကျဲ ဘိၣ်ဘံးတီခိၣ်ရိၣ်မဲDKBAဒီးသုးကီၣ်ကးပာ်ဖှိၣ်ဆီလီၤသကိးတြဲၤ၀ံၤ သံကွၫ်သမံသမိးတၫ်အဂ့ၫ် သးစၫ်လၢ ကွၫ်ဆၢၣ်မဲာ်ဘၣ်၀ဲတဂၤတဲ၀ဲလီၤ.
“ကီးတရံး-ရၤမတံကျဲဒီတဘိ တၫ်ဆီလီၤသမံသမိးတြဲၤအိၣ်၀ဲ(၂၀)ဘျဲၣ်၀ံၤကလုာ်ဒူၣ်ဖီၣ်စုက၀ဲၤ ကရၢအတြဲၤတခီအိၣ်အါ၀ဲလီၤ.ကူသိးဃာ်DKBAယူၣ်နံၣ်ဖီ၀ံၤသမံသမိးတၫ်အိၣ်၀ဲလီၤ.သုးကီၣ်ကးအသုးတဖၣ်တခီ သမံသမိးသးစၫ်တဖၣ်အလီတဲစိ, သမံသမိး၀ဲအမံၤ ပာ်ဃုာ်လၢတၫ်ကဘၣ်ကဲသုးစရီပူၤဧါ တဖၣ်အိၣ်၀ဲလီၤ.လၢကျဲသုးဖိ လၢကူသိး ဃာ်DKBAယူၣ်နံၣ်ဖီအိၣ်၀ဲန့ၣ် ဘၣ်တၫ်ဟ့ၣ်ပလီၫ်ဃာ်၀ဲအိၣ်၀ဲလီၤ.”
ပှၤနီအီၣ်သိလ့ၣ်ဖိတဖၣ်တခီ ဃ့၀ဲတၫ်လဲၤထီၣ်က့ၤလီၤအပှ့ၤကလံၤ (၁)ကလီၫ်တခီ၀ံၤ လၢကျဲဒီတဘိတၫ်သမံသမိးတြဲၤတဖၣ် ဃ့စ့လၢသိလ့ၣ်ကစၫ်အိၣ်အါထီၣ်အဂ့ၫ်,ပှၤဟးထီၣ်ဟးလီၤအကျါ တၫ်သမံသမိးအါထီၣ်သးစၫ်တဖၣ်အဂ့ၫ် ပှၤကူၣ်လဲၤမၤကၤတၫ်ဖိတဂၤတဲ၀ဲလီၤ.
“တၫ်ဖိတၫ်လံၤမ့ၫ်ပာ်ဃုာ်န့ၣ် ဃ့၀ဲလၢအကလးလီၤ.မ့မ့ၫ်ထဲဒၣ်ပှၤနီၫ်တဂၤန့ၣ် တတြဲၤစုာ်စုာ် ဃ့၀ဲခံကထိ သၢကထိလီၤ.တၫ်ဖိတၫ်လံၤမ့ၫ်ပာ်တခီ ဃ့၀ဲတုၤလၢ(၂)ကလးတုၤ(၅)ကလးအိၣ်၀ဲလီၤ.”
တၫ်ဘၣ်ကဲသုးတၫ်ဘျၢသဲစးအဃိ သးစၫ်လၢဃ့ၫ်ပဒ့ၣ်ဟးထီၣ်တဖၣ်အကျါ သုးကီၣ်ကးအဒူၣ်အထၢတဖၣ် စ့ၫ်ကီးပာ်ဃုာ်၀ံၤတနီၤလဲၤပဒ့ၣ်ဟးဆှဲးအသးဆူ ကၠီၣ်တဲၣ်-ပယီၤကီၫ်ဆၢလီၤ.ပှၤတဒူၣ်အံၤတခီတၫ်သမံသမိးတြဲၤတဖၣ် တသံကွၫ်သမံသမိး၀ဲလီၤတံၫ်ဘၣ်အဂ့ၫ် ပှၤထံၣ်ဘၣ်လၢအမဲာ်တဂၤတဲ၀ဲလီၤ.
သုးကီၣ်ကးတခီ ကီးတရံး-ရၤမတံကျဲကပၢဆှၢမၤန့ၫ်က့ၤ၀ဲအဂီၫ် ဂဲၤလိာ်၀ဲ၀ံၤသူ၀ဲသုးခိးကီၫ်ဆၢဒီး DKBA သုးလၢထုးဖးအသးတဖၣ်၀ံၤ စိာ်ဆှၢခီသုးတၫ်ပီးတၫ်လီဒီးတၫ်အီၣ်တၫ်အီတဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
အ့ရှၢၣ်ကျဲမုၫ်တခီ ဖဲသုးကီၣ်ကးဒီးကညီဒီကလုာ်တၫ်ထူၣ်ဖျဲးသုးမုၫ်ဒိၣ် တၫ်ဒုးဆူၣ်ထီၣ်အကတီၫ် ၂၀၂၃နံၣ်,လါနိၣ်၀့ဘၢၣ်အပူၤ KNUတကပၤ ဘိးဘၣ်ရၤလီၤဃာ်၀ဲလၢ တဟ့ၣ်တၫ်ပျဲလၢ တၫ်ကလဲၤထီၣ်က့ၤလီၤအဂီၫ်ဘၣ်န့ၣ်လီၤ.
Ref: VOA
