လါအီးကထိဘၢၣ်(၁၅)သီ,၂၀၂၄နံၣ်
လါအီးကထိဘၢၣ်(၁၄)သီအနံၤ, ခ့ၣ်အဲၣ်ယူၣ်-လီၢ်ခၢၣ်သးဘိးဘၣ်ရၤလီၤ၀ဲလၢ လါအီးကထိဘၢၣ်(၁၂)သီအနံၤ, ဟါ(၀၈း၀၆)နၣ်ရံၣ်အဆၢကတီၢ် သုးကီၣ်ကး မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်အစုတီၤဖီလၥ် သုးတၢ်တိၤကူၣ်ကျဲၤခိၣ်သ့ၣ်(ခလရ – ၂၈၄)လၢအိၣ်ဖဲ နိၣ်တကီသုးတၢ်တိၤကူၣ်ကျဲခိၣ်သ့ၣ်တၢ်လုၢ်ခိၣ် ခးလီၤ(၈၁-မမ)ကျိဖးဒိၣ်ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, နိၣ်တကီကီၢ်ဆၣ်အပူၤအဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ တခးကျိ(ကိး)၀ဲးစံၣ်ကိးသ၀ီပူၤအဃိ သးနံၣ်(၁၀)အိၣ်ပိၥ်မုၣ်(၁)ဂၤပၥ်ဃုၥ်ကမျၢၢ်(၂)ဂၤဘၣ်သံ၀ဲဒီး ဘၣ်ဒိ၀ဲ(၂)ဂၤအဂ့ၢ်န့ၣ်လီၤ.
ကမျၢၢ်လၢသံတဖၣ်အံၤ မ့ၢ်ပှၤ၀ဲးစံၣ်ကိးသ၀ီဖိလၢ သးနံၣ်(၁၀)အိၣ်ပိၥ်မုၣ်တဂၤဒီးသးနံၣ်(၆၄)နံၣ်အိၣ်ပိၥ်ခွါတဂၤ၀ံၤ ပိၥ်ခွါဖိလၢသးနံၣ်အိၣ်(၁၃)နံၣ်တဂၤတခီ ဒိးန့ၢ်ဘၣ်တၢ်ဘၣ်ယိၣ်တၢ်ဘၣ်ဒိဘၣ်ထံးဒီးဒိးကူစါသးအသိး ပိၥ်မုၣ်ဖိလၢသးနံၣ်အိၣ်(၁၇)နံၣ်တဂၤစ့ၢ်ကီး ကျိဖးဒိၣ်အက့အခီဘၣ်အီၤအဃိ ဘၣ်ဒိးကူစါယါဘျါအသးအဂ့ၢ် ပၥ်ဖျါဃၣ်၀ဲန့ၣ်လီၤ.
ကတီၢ်အံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A)ဒီးတၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုး သုးကီၣ်ကးအသုးကလၢၤတဖၣ်လၢ အိၣ်ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၆), ကီၢ်ရ့ၣ်ဒူပျၥ်ယၥ်ဟီၣ်က၀ီၤအပူၤအဂ့ၢ် စံး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးတပၤစ့ၢ်ကီးသူ၀ဲကျိဖးဒိၣ်ဒီးကဘီယူၤတဖၣ်၀ံၤ တၢ်ဒုးကဲထီၣ်သးအိၣ်မ့ၢ်ဂ့ၤ တအိၣ်မ့ၢ်ဂ့ၤန့ၣ် ပညိၣ်ခးလီၤကျိဖးဒိၣ်ဒီးဟဲတ့ၢ်လီၤမ့ၢ်ပိၢ်တဖၣ် ဆူကမျၢၢ်အိၣ်ဆိးလီၢ်ကျဲဖံးအီၣ်မၤအီၣ်လီၢ်ကျဲတဖၣ်အပူၤန့ၣ်လီၤ.
ခီဖျိလၢသုးကီၣ်ကး မၤ၀ဲကလံၤကျါတၢ်ဒုးတဖၣ်အဃိ ဘၣ်ဒိ၀ဲ လီၢ်က၀ီၤကမျၢၢ်တနီၤ၀ံၤ ဘၣ်ဟးဂီၤကွံၥ်၀ဲစ့ၢ်ကီး ကမျၢၢ်စုလီၢ်ခီၣ်ခိၣ်တၢ်အိၣ်ယၢၤတဖၣ်န့ၣ်လီၤ.
လၢန့ၣ်အမဲၥ်ညါ ခီဖျိလၢသုးကီၣ်ကးဟဲတ့ၢ်လီၤမ့ၣ်ပိၢ်အဃိ ဘၣ်ဟးဂုၥ်ဟးဂီၤ၀ဲစ့ၢ်ကီး တၢ်ဆါဟံၣ်ဒီးကသ့ၣ်ဒၢးတဖၣ်, တၢ်သိၣ်ကၠိတဖၣ်ဒီး တၢ်ဘူၣ်တၢ်ဘါတၢ်သူၣ်ထီၣ်တဖၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
