လါအီးကထိဘၢၣ်(၁၄)သီ,၂၀၂၄နံၣ်
ကီၢ်ပယီၤပူၤတၢ်ဒုးတဖၣ် ကပတုၥ်ကွံၥ်တဘျီဃီ၀ံၤ ထံလီၢ်ကီၢ်ပူၤတၢ်ဒုးတၢ်ယၤကကတၢၢ်ကွံၥ်အဂီၢ် တၢ်ကတၢၣ်ပီၣ်တဲသကိး ပှၤခဲလၢၥ်ပၥ်ဃုၥ်တၢ်မုၥ်တၢ်ခုၣ်တၢ်တၢၣ်ပီၣ်တဲသကိးတခါအဂီၢ် အ့ရှၢမုၢ်ထီၣ်ကလံၤထံး ခိၣ်နၢ်တဖၣ် ဃ့ထီၣ်၀ဲဖဲလါအီးကထိဘၢၣ်(၁၃)သီအနံၤန့ၣ်လီၤ.
တၢ်ကဒိးသန့ၤဘၣ်ဟီၣ်ခိၣ်ဒီဘ့ၣ်သဲစးတၢ်ဘျၢ၀ံၤ တၢ်ကတူၢ်လိၥ်ဘၣ်စ့ၢ်ကီး တကဲၥ်ပ၀းတၢ်သိၣ်တၢ်သီလၢဘၣ်ထွဲ ကလံၤထံးတရူးပီၣ်လဲၢ်ဂ့ၢ်ဂီအဂီၢ် ဆီၣ်တခူထီၣ်ဃၣ်၀ဲန့ၣ်လီၤ.
အၣ်စံၣ်ယၣ်-အ့ရှၢမုၢ်ထီၣ်ကလံၤထံးထံကီၢ်ကရၢ တၢ်အိၣ်ဖှိၣ်လၢ တၢ်မၤအီၤဖဲကီၢ်လၣ်အိၣ်အံၤ၀ံၤ၀ဲ ဖဲလါအီးကထိဘၢၣ်(၁၁)သီအနံၤဒီး တၢ်အိၣ်ဖှိၣ်တၢ်အၢၣ်လီၤတဖၣ်လၢ အၣ်စံၣ်ယၣ်ပှၤပၢၤလီၢ်ဆ့ၣ်နီၤ ဘိးဘၣ်ရၤလီၤတဖၣ် ခၢၣ်စး၀ဲအဂ့ၢ် ရဲၣ်တၣ်တၢ်ကစီၣ်သန့ ပၥ်ဖျါဃၣ်၀ဲန့ၣ်လီၤ.
အမဲရကၤကီၢ်စၢဖှိၣ်, ရှၢရှါ, တရူး,ယပၣ်,အ့ဒံယါဒီးကလံၤထံးကီၢ်ခိရံယါမီၢ်သီတဖၣ်စ့ၢ်ကီး ဟဲထီၣ်၀ဲတၢ်အိၣ်ဖှိၣ်အံၤန့ၣ်လီၤ.
ကီၢ်ပယီၤပူၤ တၢ်မၤပျီၢ်မၤဂီၤတဖၣ် ကပတုၥ်ကွံၥ်တဘျီဃီဒီးတၢ်ကဟ့ၣ်မၤစၢၤပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်ကန့ၢ်အဂီၢ် ကဘၣ်ဂုၥ်ကျဲးစၢး၀ဲအဂ့ၢ်စ့ၢ်ကီး အၣ်စံၣ်ယၣ် ဆီၣ်တခူထီၣ်ဃၣ်၀ဲန့ၣ်လီၤ.
ကီၢ်ပယီၤပှၤနီၣ်ဂံၢ် ခဲလၢၥ်ပၥ်ဖှိၣ် သၢပူတပူဘျဲၣ်(၁၈.၆)ကကွဲၢ်ဃၣ်ဃၣ် လိၢ်ဘၣ်၀ဲတၢ်မၤစၢၤတဖၣ်အဂ့ၢ် တယၣ်ဃၣ်၀ဲန့ၣ်လီၤ. ၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ အၣ်စံၣ်ယၣ်တၢ်အၢၣ်လီၤ(၅)ထံၣ်လၢဟဲအိၣ်ထီၣ်အံၤ သုးကီၣ်ကးတမၤဖျါထီၣ်အမိၢ်လံမိၢ်ပှၢ်ဘၣ်ဒီး ဖီၣ်စုက၀ဲၤတၢ်ပၢၢ်ဆၢထီဒါတဖၣ် ဟဲလဲၢ်ထီၣ်၀ဲန့ၣ်လီၤ.
တနံၣ်အံၤနံၣ်ဘူးကတၢၢ်န့ၣ် တၢ်ကတၢၣ်ပီၣ်တဲသကိးကီၢ်ပယီၤဂ့ၢ်၀ီတခါလၢ အၣ်စံၣ်ယၣ်ထံကီၢ်ကရၢတဖၣ်ပၥ်ဃုၥ်၀ဲအံၤလၢ ကီၢ်ကၠီၣ်တဲၣ်ကရဲၣ်ကျဲၤမၤ၀ဲအဖီခိၣ် အၣ်စံၣ်ယၣ်တူၢ်လိၥ်မုၥ်၀ဲန့ၣ်လီၤ.
Ref: RFA
