လါအီးကထိဘၢၣ်(၁၄)သီ,၂၀၂၄နံၣ်
ယိၤဒိၣ်ကီၢ်စဲၣ်ကလံၤထံး, ပအိးနီၢ်ကစၢ်တၢ်ပၢလီၤသးဟီၣ်က၀ီၤ, ပ့ၣ်လီကီၢ်ဆၣ်အပူၤ စးထီၣ်လၢလါအီးကထိဘၢၣ်(၁၂)သီအနံၤ ဂီၤအဆၢကတီၢ် တၢ်ဒုးဆူၣ်ထီၣ်လၢ ပအိးဒီကလုၥ်သုးမုၢ်ဒိၣ်/ပအိးဂၢၤကီၢ်သုး(PNA), နစကသုးပၥ်ဖှိၣ်ဒီး လီၢ်က၀ီၤတၢ်ပၢၢ်ဆၢသုးတဖၣ်အဘၢၣ်စၢၤအဃိ လီၢ်က၀ီၤကမျၢၢ်(၂)ကလးဘျဲၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤ.
ပ့ၣ်လီကီၢ်ဆၣ်, နီၣ်၀ိ,ပ့ၣ်စိၣ်, နါဖၣ်မုၢ်, ကီၣ်သဲၣ်, ဘါမီးဒီး နးဖၣ်မုၢ်သ၀ီအကပၤ တၢ်ဒုးဆူၣ်လၢဟီၣ်ခီၣ်မဲၥ်ဖံးခိၣ်အသိး ဟဲခးလီၤတၢ်လၢကလံၤကျါဒီး ခးလီၤကျိဖးဒိၣ်တဖၣ်စ့ၢ်ကီးအိၣ်၀ဲ၀ံၤ PNO သုးရိၣ်မဲခိၣ်ကျၢၢ်(၂) အူန့ၢ်၀့ထိနီၢ်ကစၢ်ဒၣ်၀ဲ တီခိၣ်ရိၣ်မဲဒုး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“လီၢ်က၀ီၤကမျၢၢ်(၂)ကလးဘျဲၣ်တခီ လဲၤဃ့ၢ်ပူၤဖျဲးသးဆူ သ၀ီလၢအဘူးဒီးပ့ၣ်လီ၀့ၢ်တဖၣ်လံ. ပှၤလၢလဲၤဃ့ၢ်ပူၤဖျဲးသးဆူ ပှၢ်ပူၤဒီးတၢ်သူၣ်တၢ်ဖျးလီၢ်တဖၣ်စ့ၢ်ကီးအိၣ်၀ဲလီၤ. အသီမ့ၢ်ယံၤဒု ကလိၢ်ဘၣ်၀ဲ ထံအီဒီးတၢ်အီၣ်တၢ်အီတဖၣ်လီၤ. ခဲအံၤန့ၣ် ဘၣ်အိၣ်ဒၣ်လၢ တၢ်လၢအိၣ်ဒီးအီၤတဖၣ်လီၤအဂ့ၢ်” ပ့ၣ်လီလီၢ်က၀ီၤဖိတဂၤ စံး၀ဲန့ၣ်လီၤ.
တၢ်ဒုးတဖၣ်အပူၤ ခံခီခံကပၤတၢ်ဘၣ်ဒိဘၣ်ထံးဒီးတၢ်သံတၢ်ပှၢ်အိၣ်၀ဲအဂ့ၢ် လီၢ်က၀ီၤကမျၢၢ်တဖၣ်တဲ၀ဲဘၣ်ဆၣ် ခံခီခံကပၤတၢ်ကရၢကရိတဖၣ်တခီ တထုးထီၣ်ပၥ်ဖျါဃၣ်၀ဲ ဘၣ်ထွဲတၢ်ဒုးတၢ်အိၣ်သးတၢ်ဂ့ၢ်တၢ်ကျိၤတဖၣ်ဘၣ်.
စးထီၣ်လၢအပူၤကွံၥ် လါစဲးပထ့ဘၢၣ်(၁၇)သီအနံၤန့ၣ် တၢ်ဒုးကဲထီၣ်သးလၢ ဟီၣ်က၀ီၤတဖၣ်အံၤအပူၤ၀ံၤ ခးလီၤကျိဖးဒိၣ်တဖၣ်ဆူဒူသ၀ီပူၤတဖၣ်အဃိ ဘၣ်ဒိ၀ဲလီၢ်က၀ီၤကမျၢၢ်(၁)ဂၤအသိး ဘၣ်ဟးဂီၤကွံၥ်၀ဲကမျၢၢ်အိၣ်ဟံၣ်(၅)ဖျၢၣ်န့ၣ်လီၤ.
ပအိးလီၢ်က၀ီၤအပူၤ ဘၣ်ကွၢ်ဆၢၣ်မဲၥ်ဘၣ်ဒီး သုးဂ့ၢ်၀ီတၢ်တတၢၥ်တနါတဖၣ်ဒီးထံတၢ်လီၤဘၣ်ယိၣ်တဖၣ်၀ံၤ လိၣ်လၢတၢ်ကဘၣ်မၤက့ၤတၢ်မၤပူၤဖျဲးထံတၢ်လီၤဘၣ်ယိၣ်ဒီးတၢ်က့ၤသူၣ်ထီၣ်ဆီလီၤတၢ်ဖံးတၢ်မၤတဖၣ်ဘၣ်ဆၣ် ဘၣ်ဃ့ၢ်ပူၤဖျဲးသုးအဃိ တၢ်မၤအီၤတန့ၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: VOM
