လါအီးကထိဘၢၣ်(၁၀)သီ,၂၀၂၄နံၣ်
ကီၫ်ပယီၤဂ့ၫ်၀ီန့ၣ် ကီၫ်ကၠီၣ်တဲၣ်ပာ်ဃုာ် အၣ်စံၣ်ယၣ်ဟီၣ်က၀ီၤပူၤ တံၤသကိးလၢအရ့ဒိၣ်တဖၣ်ဒီးအမဲရကၤ ကမၤဘၣ်လိာ်ဖိးဒ့ကဒီး၀ဲအဂ့ၫ်ဒီး စံးဘျူးဘၣ်ကၠီၣ်တဲၣ် လၢမၤစၢၤကီၫ်ပယီၤပှၤလီၫ်အိၣ်ကမှံဖိတဖၣ်အဂ့ၫ် မုၫ်ထီၣ်အ့ရှၢၣ်ဒီးပစံးဖ့းဂ့ၫ်၀ီ နဲၣ်ရွဲၣ်သဃဲၤ Daniel Kritenbrinkတဲလီၤ၀ဲအီးကထိဘၢၣ်(၈)သီနံၤ ဖဲအမဲရကၤထံဂုၤကီၫ်ဂၤ၀ဲၤကျိၤမၤတၫ်ဘှါဆှဲတၫ်ကစီၣ်တၫ်ဂ့ၫ်တၫ်ကျိၤအကတီၫ်န့ၣ်လီၤ.
“ကီၫ်ပယီၤပူၤ တၫ်သဘံၣ်သဘုၣ်တဖၣ်အဃိ ပှၤလၢဟဲဃ့ၫ်အိၣ်ကဒုအါအါဂီၫ်ဂီၫ်တဖၣ် ကၠီၣ်တဲၣ်မၤစၢၤဆီၣ်ထွဲ၀ဲ အဖီခိၣ် စံးဘျူးဘၣ်၀ဲလီၤ.ကီၫ်ပယီၤထံဖိကီၫ်ဖိအတၫ်အိၣ်မူအိၣ်ဂဲၤ ကလဲၤထီၣ်လဲၤထီအဂီၫ်ဒီး ကီၫ်ပူၤတၫ်အိၣ်သး ကဂ့ၤထီၣ်အဂီၫ် ဖီၣ်လိာ်စုမၤသကိးတၫ်ကသ့ဒ်လဲၣ်န့ၣ် ဒ်ပတၢၣ်ပီၣ်တဲသကိးတ့ၫ်အသိး ပကမၤထွဲလီၤ.တၫ်ဂ့ၫ်အံၤ ကတၢၣ်ပီၣ်တဲသကိး၀ဲလၢမဲာ်သကိးမဲာ်တဘျီဃီအသိး, ကပာ်ဖှိၣ်မၤသကိးတၫ်ဒီးအၣ်စံၣ်ယၣ် တံၤသကိးတဖၣ်ဒီး ကၠီၣ်တဲၣ်ကိတိာ်ခိၣ်ကျၢၫ်အပဒိၣ်သီတဖၣ်”အိၣ်၀ဲအဂ့ၫ်န့ၣ်လီၤ.
ဘၣ်ထွဲဒီးကီၫ်ပယီၤဂ့ၫ်၀ီ ကၠီၣ်တဲၣ်ကိတိာ်ခိၣ်ကျၢၫ် Paetongtarn Shinawatraတဲ၀ဲလၢ ကီၫ်ပယီၤအထံလီၫ်ကီၫ်ပူၤ တၫ်ဒုးတၫ်ယၤကကတၢၫ်ကွံာ်အဂီၫ်ဒီးကီၫ်ပယီၤကဒိးန့ၫ်တၫ်မုာ်တၫ်ခုၣ်အဂီၫ် လိၣ်လၢအၣ်စံၣ်ယၣ်ကပာ်ဃုာ်လၢ တၫ်လီၫ်လၢအရ့ဒိၣ်အလီၫ်န့ၣ်လီၤ.
သုးကီၣ်ကးန့ၣ် အၣ်စံၣ်ယၣ်တၫ်အၢၣ်လီၤ(၅)ထံၣ် ဒုးအိၣ်ထီၣ်၀ဲအမိၫ်လံၤမိၫ်ပှၫ်တန့ၫ်ဒံးအသိး တၫ်ဃုထၢတၫ်အိၣ်သးစ့ၫ်ကီးတၫ်ဘံၣ်တၫ်ဘၢတအိၣ်အဃိ တၫ်အံၤတမ့ၫ်တၫ်ဃုထၢလၢ ကဲထီၣ်ခၢၣ်စးလၢ ကီၫ်ပယီၤထံဖိကီၫ်ဖိတဖၣ်အဂီၫ်ဘၣ်အဂ့ၫ် Mr. Kritenbrinkတဲ၀ဲလီၤ.လၢကတီၫ်အံၤတၫ်ဃုထၢအဃိ တၫ်မၤပျီၫ်မၤဂီၫ် အိၣ်အါထီၣ်ဒီး မ့ၫ်တၫ်မၤယံာ်ထီၣ်စ့ၫ်ကီး တၫ်သဘံၣ်သဘုၣ်တဖၣ်အဂ့ၫ် ဟ့ၣ်ပလီၫ်၀ဲ၀ံၤ သုးကီၣ်ကးန့ၣ်တၫ်မုာ်တၫ်ခုၣ်ဒီးကလုာ်တၫ်ဘၣ်လိာ်ဖိးမံ တချူးအိၣ်ထီၣ်ထံးဘၣ်အကတီၫ်န့ၣ် တကြၢးမၤတၫ်ဃုထၢဘၣ်အဂ့ၫ် တဲ၀ဲလီၤ.
အမဲရကၤထံဂုၤကီၫ်ဂၤကိတိာ် Antony Blinkenလၢကလဲၤထီၣ် အမဲရကၤ-အၣ်စံၣ်ယၣ်တၫ်အိၣ်ဖှိၣ် လၢဘၣ်တၫ်မၤ၀ဲ ဖဲကီၫ်လၣ်အိၣ်စ့ၫ်ကီး တဲဃာ်၀ဲလၢ ကတၢၣ်ပီၣ်တဲသကိးကီၫ်ပယီၤဂ့ၫ်၀ီဒ်တၫ်ဂ့ၫ်လၢအရ့ဒိၣ်အဂ့ၫ်န့ၣ်လီၤ.
Ref: VOA
