ကလုာ်ဒူၣ်(၉)ဖု ဘိးဘၣ်ရၤလီၤလၢ ကသူၣ်ထီၣ်ဖဲၣ်ဒရဲၣ်ကီၢ်စၢဖှိၣ်လၢ အိၣ်ဒီးကျဲသနူလၢအဂံၢ်ဆူၣ်

လါစဲးပထ့ဘၢၣ်(၂၀)သီ,၂၀၂၄နံၣ်

လါစပထ့ဘၢၣ်(၁၉)သီအနံၤ, KNU၊ KNPP ဒီးCNFပၥ်ဃုၥ် ကလုၥ်ဒူၣ်(၉)ဖု ဘိးဘၣ်ရၤလီၤဃၣ်၀ဲတၢ်ကစီၣ်လၢ တၢ်ကသူၣ်ထီၣ်ဖဲၣ်ဒရဲၣ်ဒံၣ်မိၣ်ခြ့ၣ်စံၣ်ကီၢ်ဆၢဖှိၣ်အဂီၢ် တၢ်ကလဲၤ၀ဲဒ် (Bottom up Federalism)ကျဲသနူအသိးအဂီၢ် တၢ်ပၥ်လီၤန့ၢ်၀ဲ တၢ်အၢၣ်လီၤ(၄)ထံၣ်အဂ့ၢ်န့ၣ်လီၤ.

ကီၢ်စဲၣ်ဒီးဖဲၣ်ဒရဲၣ်ယူၣ်နံး ထံဖိကမျၢၢ်ဖိတဖၣ်မ့ၢ် ထံကီၢ်တၢ်စိတၢ်ကမီၤအခီၣ်ထံးခီၣ်ဘိနီၢ်ကစၢ်လီၤဒီး တၢ်ကမၤ၀ဲကျဲသနူဒ်တၢ်စိတၢ်ကမီၤလၢဟံးန့ၢ်ခီၣ်တဃၣ်လၢတၢ်ထဲသိးတုၤသိးဒီးနီၢ်ကစၢ်တၢ်စံၣ်ညီၣ်ပၢလီၤသးခွဲးယၥ်,ကအိၣ်ဃူအိၣ်ဖိးအဂီၢ်, တၢ်နီၤဟ့ၣ်လီၤတၢ်စိတၢ်ကမီၤလၢ ပှၤန့ၢ်ပၢတၢ်လၢအဘူးဒီးကမျၢၢ်တဖၣ်အဂ့ၢ်န့ၣ်လီၤ.

လံၥ်ဘိးဘၣ်ရၤလီၤအပူၤ ဘိးဘၣ်ပၥ်ဖျါဃၣ်၀ဲစ့ၢ်ကီးလၢ ဖဲၣ်ဒရဲၣ်ဒံၣ်မိၣ်ကခြ့ၣ်စံၣ်ကီၢ်စၢဖှိၣ်အဂံၢ်ကဆူၣ်အဂီၢ် ကလုၥ်ဒူၣ်(၉)ဖု ခါဆူညါကဖှိၣ်လိၥ်စုမၤသကိးတၢ်လၢ တၢ်အၢၣ်လီၤတဖၣ်အသိးအဂ့ၢ်န့ၣ်လီၤ.

တၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ တၢ်မၤကျဲသနူလၢ တၢ်ကပၥ်ဖှိၣ်မၤသကိးတၢ်အဂီၢ် တၢ်တၢၣ်ပီၣ်ဆၢတဲၥ်လီၤ၀ဲန့ၢ်အဂ့ၢ်စ့ၢ်ကီး စံး၀ဲန့ၣ်လီၤ.

ကလုၥ်ဒူၣ်တၢ်ပၢၢ်ဆၢကရၢလၢ အၢၣ်လီၤတ့ၢ်တၢ်အၢၣ်လီၤတဖၣ်အကျါ ပၥ်ဃုၥ်၀ဲ ကညီဒီကလုၥ်စၢဖှိၣ်ကရၢ(KNU), ကရ့ၣ်နံၣ်ဒီကလုၥ်တၢ်လဲၤထီၣ်လဲၤထီပၣ်တံၣ်(KNPP),ခၠီဒီကလုၥ်သုးမုၢ်ဒိၣ်(CNF),ကရ့ၣ်နံၣ်ကီၢ်စဲၣ်တၢ်ကူၣ်လိၥ်တၢၣ်ပီၣ်ကီၣ်ကး(KSCC), ပအိးဒီကလုၥ်ဖဲၣ်ဒရဲၣ်ကီၣ်ကး(PNFC), တလၢၤကီၢ်သီပၣ်တံၣ် တၢ်ဒုးလီၤပှီၢ်သုးမီၤစိရိၤ(NMSP-AD),တလၢၤကီၢ်စဲၣ်ဖဲၣ်ဒရဲၣ်ကီၣ်ကး(MSFC),တအီထံရူၢ်ကီၢ်သဲးတၢ်ကူၣ်လိၥ်တၢၣ်ပီၣ်ကီၣ်ကး(TPCC)ဒီးကီၢ်ပယီၤပိၥ်မုၣ်ကရၢခိၣ်ကျၢၢ်(WLB)တဖၣ်န့ၣ်လီၤ.