လါစဲးပထ့ဘၢၣ်(၁၃)သီ, ၂၀၂၄နံၣ်
၂၀၂၄နံၣ်, လါစဲးပထ့ဘၢၣ်(၉)သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ၀ဲၤလီၢ်ခိၣ်သ့ၣ် တၢ်ကစီၣ်ပၥ်ဖျါထီၣ်၀ဲဒၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ-လီၢ်ခၢၣ်သး၀ဲၤလီၢ်ခိၣ်သ့ၣ်အိးထီၣ်၀ဲဒၣ် (၁၀)၀ီတ၀ီစၢၤသွဲၣ်သီခိၣ်နၢ်တၢ်တီခိၣ်ရိၣ်မဲကၠိအမူးတၢ်ရဲၣ်တၢ်ကျဲၤန့ၣ်လီၤ.
စၢၤသွဲၣ်သီိခၣ်နၢ်တၢ်တီခိၣ်ရိၣ်မဲကၠိအံၤ မ့ၢ်ကၠိတဖျၢၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, တီခိၣ်ရိၣ်မဲအိးထီၣ်တ့ၢ်၀ဲ၀ံၤ အိၣ်၀ဲဒၣ်လၢ ကီၢ်သူလ့ၤတၢ်ပၢဟီၣ်က၀ီၤပူၤဒီး ပှၤဟဲထီၣ်တဖၣ်မ့ၢ်၀ဲလီၢ်ခၢၣ်သးခၢၣ်စး, ကီၢ်ရ့ၣ်ခၢၣ်စး,ကီၢ်ဆၣ်ခၢၣ်စး,သုး၀ဲၤလီၢ်ခိၣ်သ့ၣ်ခၢၣ်စး, သုးက့ခၢၣ်စး, သုးရ့ၣ်ခၢၣ်စး, ကညီသးစၢ်ကရၢခၢၣ်စးဒီး ကညီပိၥ်မုၥ်ကရၢ ခၢၣ်စးသးစၢ်တဖၣ်ဟဲထီၣ်ကၠိ၀ဲအံၤန့ၣ်လီၤ.
လၢတၢ်သိၣ်လိအပူၤ လံၥ်ညိၣ်သိၣ်ဒိၣ်လၢတၢ်သိၣ်လိအီၤအိၣ်၀ဲဒၣ်(၂)ပတီၢ်အဂ့ၢ် စဲၤသွဲၣ်သီကၠိ ပှၤဘၣ်မူဘၣ်ဒါတဂၤ တဲ၀ဲဒ်အံၤန့ၣ်လီၤ.
“ပတီၢ်(၁)ဘၣ်ထွဲဒီးတၢ်ပၢၢ်ဆၢခီၣ်တဃၣ်, တၢ်တူၢ်ခီၣ်ဘၣ်သး, ၁-ကညီ-ကညီတၢ်ပၢၢ်ဆၢဒီးကလုၥ်ဒူၣ်တၢ်ပၢၢ်တၢ်စံၣ်စိၤတဲစိၤ, ၂-ခ့ၣ်အဲၣ်ယူၣ်-ခီၣ်တဃၣ်ကျဲသနူဒီးတၢ်မၤကျဲ, ၃-ခ့ၣ်အဲၣ်ယူၣ်-တၢ်ဘျၢခိၣ်သ့ၣ်ဒီးတၢ်နဲၣ်ကျဲ, ၄-၀ဲၤကျိၤ၀ဲၤဒ့တဖၣ်အတၢ်မၤကျဲသနူ, ၅-ကမံးတံၥ်တဖၣ်တၢ်မၤကျဲသနူ, ပတီၢ်(၂)- ထံရူၢ်ကီၢ်သဲး, တၢ်ပၢတၢ်ပြး, တၢ်ဘံၣ်တၢ်ဘၢ, ဟီၣ်ခိၣ်ဂ့ၢ်၀ီခွဲးယၥ်, ခိၣ်နၢ်တၢ်တီခိၣ်ရိၣ်မဲတဖၣ်အဂ့ၢ်” စံး၀ဲန့ၣ်လီၤ.
စၢၤသွဲၣ်သီခိၣ်နၢ်တၢ်တီခိၣ်ရိၣ်မဲကၠိအံၤ မ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၣ်လါဖါတီခိၣ်ရိၣ်မဲအိးထီၣ်၀ဲ၀ံၤ တၢ်စးထီၣ်အိးထီၣ်အီၤ အဆိကတၢၢ်တဘျီ ဖဲ ၂၀၀၁နံၣ် ကီၢ်ရ့ၣ်ဒူပျၥ်ယၥ်, ၀ီၢ်လ့ၢ်ခံတၢ်လီၢ်န့ၣ်လီၤ.
ဖဲအပူၤကွံၥ် ၂၀၂၄နံၣ်, လါယနူၤအါရံၤ(၂၂)သီအနံၤန့ၣ် တၢ်မၤ၀ဲ(၉)၀ီတ၀ီ စၢၤသွဲၣ်သီခိၣ်နၢ်တၢ်တီခိၣ်ရိၣ်မဲ တၢ်သိၣ်လိကၠိးပျၢ်အမူး၀ံၤ အခဲအံၤန့ၣ်တၢ်စးထီၣ်အိးထီၣ်က့ၤ၀ဲ (၁၀)၀ီတ၀ီ စဲၤသွဲၣ်သီခိၣ်နၢ်တၢ်သိၣ်လိကၠိအမူးတၢ်ရဲၣ်တၢ်ကျဲၤန့ၣ်လီၤ.
