လါစပထ့ဘၢၣ်(၉)သီ,၂၀၂၄နံၣ်
တၢ်စူၤခါအဆၢကတီၢ် ဖဲဖၣ်ပူၣ်လီၢ်က၀ီၤအပူၤ ခီဖျိလၢ၀ံစိၥ်တီဆှၢကီခဲ၀ဲအဃိ ပှၤဃ့ၢ်သုးပှၤလီၢ်အိၣ်ကမှံၤဖိတဖၣ် တၢ်အီၣ်တၢ်အီတလၢတလီၢ်ကဲထီၣ်သးအဂ့ၢ် တၢ်သ့ၣ်ညါဘၣ်လၢ ပှၤလၢမၤစၢၤ ပှၤဃ့ၢ်သုးပှၤလီၢ်အိၣ်ကမှံၤဂ့ၢ်၀ီတဖၣ်အအိၣ်န့ၣ်လီၤ.
တၢ်အီၣ်တၢ်အီတဖၣ် ကလဲၤတုၤဆူ ပှၤဃ့ၢ်သုးပှၤလီၢ်အိၣ်ကမှံတဖၣ်အအိၣ် ကီခဲ၀ဲခီဖျိလၢ မ့ၢ်တၢ်ဆူၣ်ခါအဆၢကတီၢ်အဃိ မူခိၣ်စူၤဒိၣ်ဒီးထံဒိၣ်နိယွၤတဖၣ် ကဲထီၣ်တ့ၢ်သး၀ံၤ ကျဲဒီးတိၤတဖၣ်ဘၣ်ဟးဂီၤကွံၥ်၀ဲအဃိအဂ့ၢ် တၢ်သ့ၣ်ညါဘၣ်န့ၣ်လီၤ.
“ခီဖျိလၢ ၀ံစိၥ်တီဆှၢအဃိ တၢ်ကဆှၢဘၣ်တၢ်အီၣ်တၢ်အီအဂီၢ် ကီခဲ၀ဲန့ၣ်လီၤ. တၢ်ဆီၣ်ထွဲမၤစၢၤစ့ၢ်ကီး တလၢတလီၢ်ဘၣ်. တၢ်လိၣ်ဘၣ်အအါကတၢၢ်မ့ၢ် တၢ်အီၣ်တၢ်အီဒီးကသံၣ်သီတဖၣ်လီၤ. မ့ၢ်လၢတၢ်စူၤခါအဆၢကတီၢ်အဃိ ပှၤလၢတူၢ်ဘၣ်တၢ်ညၣ်ဂိၢ်တၢ်ဆါတဖၣ်စ့ၢ်ကီးအိၣ်လီၤ. ပှၤလၢတူၢ်ဘၣ် ဟၢဖၢလူတၢ်ဆါအိၣ်ဘၣ်ဆၣ် တအါထဲသိး ပှၤဘၣ်တၢ်ညၣ်ဂိၢ်ဘၣ်.”အဂ့ၢ် ကရၢလၢအမၤစၢၤ ပှၤဃ့ၢ်သုးပှၤလီၢ်အိၣ်ကမှံဖိဂ့ၢ်၀ီ ပှၤဘၣ်မူဘၣ်ဒါတဲ၀ဲန့ၣ်လီၤ.
စးထီၣ်လၢ လါမးရှးအတီၢ်ပူၤ သုးကီၣ်ကးအသုးဒီး(KNLA)သုးပၥ်ဖှိၣ်အဘၢၣ်စၢၤ တၢ်ဒုးတဖၣ်ကဲထီၣ်သးအဃိ လီၢ်က၀ီၤကမျၢၢ်လၢဘၣ်ဃ့ၢ်ပူၤဖျဲးသးတဖၣ်ဟဲအါထီၣ်၀ံၤတုၤကတီၢ်ခဲအံၤန့ၣ်က့ၤအိၣ်က့ၤဆိးလၢအလီၢ်အကျဲတန့ၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“မ့မ့ၢ်လၢတၢ်ကိၢ်ခါန့ၣ် တၢ်ဆီၣ်ထွဲမ့တန့ၢ်ဒၣ်လဲၣ် တၢ်လဲၤဃုအီၣ်တၢ်ညီလီၤ. အခဲအံၤန့ၣ် အကဲတၢ်ဆူၣ်ခါအဆၢကတီၢ်အဃိ တၢ်လဲၤတၢ်က့ၤတညီဘၣ်. ခီဖျိလၢတၢ်ဒုးတဖၣ် တဂၢၢ်ဒံးဘၣ်အဃိ ပှၤဃ့ၢ်သုးပှၤလီၢ်အိၣ်ကမှံတဖၣ် က့ၤအိၣ်က့ၤဆိးလၢအလီၢ်အကျဲတန့ၢ်ဒံးဘၣ်. ဘၣ်လဲၤအိၣ်ဒၣ်လၢ ပှၤကျါအဃိ အ၀ဲသ့ၣ်လိၣ်ဘၣ်၀ဲ တၢ်ဒီသဒၢမူၤခိၣ်ထံ, ကသံၣ်ကသီဒီး တၢ်အီၣ်တၢ်အီတဖၣ်” စံး၀ဲန့ၣ်လီၤ.
ကီၢ်ရ့ၣ်မုၢ်တြီၢ်ဟီၣ်က၀ီၤပူၤ KNLAသုးပၥ်ဖှိၣ်ဒီး သုးကီၣ်ကးအဘၢၣ်စၢၤ ခံခီခံကပၤ သုးဂ့ၢ်၀ီတၢ်ဖ့ၣ်ဆၢလိၥ်သးအိၣ်ဒံးလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၄နံၣ် တုၤလၢလါယူၤန့ၣ် ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ ပှၤဃ့ၢ်သုးပှၤလီၢ်အိၣ်ကမှံၤ ပှၤနီၣ်ဂံၢ်အိၣ်ထီၣ်တုၤ (၉)ကလးဃၣ်ဃၣ်၀ံၤ လိၣ်ဘၣ်ပှၤဟီၣ်ခီၣ်တၢ်ဆီၣ်ထွဲမၤစၢၤတဖၣ်အဂ့ၢ် တၢ်သ့ၣ်ညါဘၣ်လၢ ခ့ၣ်အဲၣ်ယူၣ်-လီၢ်ခၢၣ်သး အလါယူၤလံအတၢ်ထုးထီၣ်ပၥ်ဖျါအဖီခိၣ်န့ၣ်လီၤ.
Ref: VOM
