လါစဲးပထ့ဘၢၣ်(၃)သီ,၂၀၂၄နံၣ်
ချၢၣ်လွံၫ်ထူၣ်ကီၫ်ရ့ၣ်,ဆီထံးကီၫ်ဆၣ်ပူၤ သုးကီၣ်ကးအသုး ကိမၠံးသၣ်ယၣ်တၫ်မဲာ်ညါသုးကလၢၤ ထီၣ်ဒုးမၤန့ၫ်၀ဲအဂ့ၫ် ဒီကလုာ်ဃူဖိးပဒိၣ်(NUG)အတၫ်ဒီသဒၢ၀ဲၤကျိၤ ဘိးဘၣ်ပာ်ဖျါဃာ်၀ဲ ဖဲလါစဲးပထ့ဘၢၣ်(၁)သီ နံၤန့ၣ်လီၤ.
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA),ကမျၢၫ်တၫ်ဒီသဒၢသုး(PDF)ဒီးသုးပာ်ဖှိၣ်တဖၣ် ဖဲလါအီကူး(၃၁)သီနံၤန့ၣ် ထီၣ်ဒုးမၤန့ၫ်၀ဲအဂ့ၫ်တဲ၀ဲလီၤ.
တၫ်ဒုးတဘျီ၀ဲန့ၣ်အပူၤ သုးကီၣ်ကးအသုးလီၫ်လၤအိၣ်ခိၣ်နၫ်တဂၤပာ်ဃုာ် သံ(၅)ဂၤဃၣ်ဃၣ်၀ံၤ မၤန့ၫ်တၫ်စုက၀ဲၤ ကျိချ့ပှာ်သၣ်တဖၣ်ဒီးမၤန့ၫ်ဃုာ် ဟုသးအထၢၣ်(၄၀၀)ဃၣ်ဃၣ်န့ၣ်လီၤ.
တၫ်အံၤအပူၤကွံာ်သုးကီၣ်ကးအသုးလၢအိၣ်ဆီလီၤဃာ်အသး ဖဲဘီကထးသုးကလၢၤ တၫ်ပၢၫ်ဆၢသုးပာ်ဖှိၣ် ထီၣ်ဒုးမၤန့ၫ်ကွံာ်အဃိ ဃ့ၫ်ဖျိးကွံာ်၀ံၤ ဖဲဟဲက့ၤဆီလီၤက့ၤအသးဖဲကိမၠံးသၣ်ယၣ်သ၀ီ တၫ်မဲာ်ညါသုးကလၢၤကအတီၫ် ထီၣ်ဒုးမၤန့ၫ်ကဒီး၀ဲအဂ့ၫ်တဲ၀ဲလီၤ.
သုးကီၣ်ကးအခိၣ် မ့အီၣ်လဲၣ်တခီ KNU,သုးက့နီၫ်ဂံၫ်(၁,၃,၅)သၢဘ့ၣ်ပာ်ဖှိၣ်လိာ်သး၀ံၤ ဂုၫ်ကျဲးစၢး ဒုးအိၣ်ထီၣ်တၫ်ဒုး ဖဲပကိမုၫ်ထီၣ်တကပၤ ပရဲလိာ်ကျိက၀ီၤအပူၤအဂ့ၫ် ဖဲလါအီကူး(၅)သီနံၤ တဲလီၤ၀ဲလၢ ထံကီၫ်ပၢတၫ်ကစီၣ်သန့တဖၣ်တဆီန့ၣ်လီၤ.
NUGတၫ်ဒီသဒၢ၀ဲၤကျိၤစ့ၫ်ကီး တၫ်ပၢဆှၢ ပရဲလိာ်ကျိဒီးတၫ်နုာ်လီၤပကိရိမးကန့ၫ်ကဂီၫ် ဒ်သုးတၫ်ရဲၣ်တၫ်ကျဲၤအသိး မၤသုးတၫ်ဟူးတၫ်ဂဲၤတဖၣ်အဂ့ၫ် ဖဲလါအီကူး(၂၄)သီနံၤန့ၣ် ထုးထီၣ်ဘိးဘၣ်ရၤလီၤ၀ဲလီၤ.
