မလ့ရှါကိတိာ်ခိၣ်ကျၢၫ်လီၫ်လံၤ(၂) ဘၣ်တၫ်သမံသမိးအီၤခီဖျိဘၣ်ထွဲဒီး ကီၫ်ပယီၤပူၤပှၤကူၣ်လဲၤမၤကၤ ပှၤကူပှၤကညီကဲတဖၣ်

လါစဲးပထ့ဘၢၣ်(၂)သီ,၂၀၂၄နံၣ်

ကီၫ်ပယီၤ, ကညီကီၫ်စဲၣ်, ပှၤကူၣ်လဲၤမၤကၤပှၤကညီကဲတဖၣ်အပူၤ မလ့ရှါကိတိာ်ခိၣ်ကျၢၫ်လီၫ်လံၤ(၂) Datuk Mashitah Ibrahimပာ်ဃုာ်အဖီခိၣ် ပၢၤကီၫ်တဖၣ် စးထီၣ်သံကွၫ်သမံသမိးအီၤအဂ့ၫ် ထံလီၫ်ကီၫ်ပူၤကိတိာ်တဲပာ်ဂၢၫ်ပာ်ကျၢၤ၀ဲဖဲလါစဲးပထ့ဘၢၣ်(၁)သီနံၤန့ၣ်လီၤ. တၫ်မူးတၫ်ရၤ၀ဲအံၤ ပၢၤကီၫ် ဟံးထီၣ်ဖီၣ်ထီၣ်၀ဲကန့ၫ်ဂ့ၤဂ့ၤန့ၣ် နာ်၀ဲအဂ့ၫ် ပှၤဟံးန့ၫ်တၫ်ကစီၣ်ဖိတဖၣ်တဲ၀ဲလီၤ.

လၢကီၫ်လၣ်အိၣ်,တယံၤဒံးဘၣ်မၤ၀ဲ အၣ်စံၣ်ယၣ်-မုၫ်ထီၣ်ကလံၤထံးထံကီၫ်တဖၣ်ကရၢ ကိတိာ်ပတီၫ် ဘၣ်ထွဲတၫ်ခီဂာ် ကီၫ် မၤကမၣ်ကွီၫ်မ့ၣ် တၫ်အိၣ်ဖှိၣ်အပူၤ ထံကီၫ်လၢဟဲထီၣ်ခဲလၢာ် ဘၣ်ထွဲဒီးတၫ်ကူၣ်လဲၤမၤကၤပှၤကညီတၫ်ဂ့ၫ်တဖၣ် တၢၣ်ပီၣ်တဲသကိး၀ဲန့ၣ် ကိတိာ်တဲ၀ဲအဂ့ၫ် MalayMailတၫ်ကစီၣ်သန့ကွဲးဖျါဃာ်၀ဲလီၤ.

မလ့ရှါ(၂၀၀၇)နံၣ် တၫ်ဒုးလီၤပှီၫ်တၫ်ကူၣ်လဲၤမၤကၤပှၤကညီဒီးပှၤသုးလီၫ်သုးကျဲတဖၣ် တၫ်သွီနုာ်လၢထံကီၫ်ပူၤ  လၢတဖိးသဲစးတဖၣ် တၫ်ကမၤလီၤမၫ်ကွံာ်အဂီၫ် တၫ်ဘျၢတဖၣ်ပာ်ဃုာ် အၣ်စံၣ်ယၣ်ကရၢထံကီၫ်ခဲလၢာ်ဃၣ်ဃၣ် ပာ်လီၤဃးတၫ်ဘျၢလၢ တၫ်ဒုးလီၤပှီၫ်ကွံာ် တၫ်ကူၣ်လဲၤမၤကၤပှၤကညီစ့ၫ်ကီး ကိတိာ်တဲ၀ဲလီၤ.လၢတၫ်ပာ်ဃုာ်လၢ တၫ်ကူၣ်လဲၤမၤကၤပှၤကညီအပူၤ မလ့ရှါပၢၤကီၫ်တဖၣ် ကတြီဆၢ၀ဲ၀ံၤ ပာ်ဃုာ်ပာ်ဂီၫ်၀ဲ တၫ်ပာ်ဂၢၫ်ပာ်ကျၢၤမ့ၫ်န့ၫ်န့ၣ် ဒ်တၫ်ဘျၢအသိး တၫ်ကမၤထွဲ၀ဲအဂ့ၫ် တဲ၀ဲလီၤ.

မလ့ရှါ ထံဂုၤကီၫ်ဂၤ ဟီၣ်ခိၣ်ဖိတၫ်မၤစၢၤကရၢန့ၣ် ဖဲအပူၤကွံာ် လါအီကူး(၂၈)သီနံၤန့ၣ် ဆှၢထီၣ်လံာ်တဘ့ၣ်ဆူ တၫ်ဒုး လီၤပှီၫ်ကွံာ်တၫ်အီၣ်ကဘျံးကဘျၣ် ခီၣ်မံးရှၢၣ်အိၣ်န့ၣ်လီၤ.ကိတိာ်ခိၣ်ကျၢၫ်လီၫ်လံၤ(၂)ဒီးအ၀ၤတဖၣ် ဘၣ်ထွဲဒီး ကီၫ်ပ ယီၤပူၤ ပှၤကူၣ်လဲၤမၤကၤပှၤကညီကဲတဖၣ်န့ၣ် တၫ်ကဃုသ့ၣ်ညါသမံသမိးဘၣ်အဂီၫ် လံာ်တၫ်ဆှၢထီၣ်အပူၤ ဃ့ထီၣ် ဃာ်၀ဲလီၤ.

Ref: FRA