လါစပထ့ဘၢၣ် (၂)သီ, ၂၀၂၄နံၣ်
သုးဟံးန့ၢ်ဆူၣ်ထံကီၢ်တၢ်စီတၢ်ကမီၤအတီၢ်ပူၤ ထံကီၢ်ဒီတဘ့ၣ်ပိၥ်မုၣ်(၁၁၃၂)ဂၤ ဘၣ်တၢ်မၤသံအီၤ၀ံၤ (၅)ကထိဘျဲၣ်ဘၣ်တၢ်ဖီၣ်န့ၢ်ဆူၣ်အီၤအဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၣ်ပူၤကရၢ(AAPP) ဘိးဘၣ်ပၥ်ဖျါဃၣ်၀ဲန့ၣ်လီၤ.
ခီဖျိလၢတၢ်ခးလီၤကျိဖးဒိၣ်ဒီးဟဲခးလီၤတၢ်လၢကလံၤကျါအဃိ ပိၥ်မုၣ်တဖၣ်ဘၣ်သံ၀ံၤ တၢ်ဖီၣ်န့ၢ်ဆူၣ်အီၤ၀ံၤအလီၢ်ခံ ဘၣ်တၢ်မၤသံအီၤ လၢဃိၣ်ပူၤ, ပၢၤကီၢ်သုးကလၢၤ ဒီး သုးတၢ်သမံးသမိးသုးကလၢၤတဖၣ်အပူၤအဂ့ၢ် စံး၀ဲန့ၣ်လီၤ.
ပိၥ်မုၣ်တဖၣ်လၢ တၢ်ဖီၣ်ဃၣ်အီၤလၢဃိၣ်ပူၤဒီးသုးတၢ်သမံသမိးတၢ်လီၢ်ပူၤတဖၣ် ဘၣ်ကွၢ်ဆၢၣ်မဲၥ်ဘၣ် သးသမူတၢ်လီၤဘၣ်ယိၣ်အဂ့ၢ် ပိၥ်မုၣ်ထံရူၢ်ကီၢ်သဲးပှၤလီၤဃိၣ်ဖိကရၢ(WOPP)ပှၤဘၣ်မူဘၣ်ဒါ မစူစူမ့ၤယိ(မဇူးဇူးမေယွန်း) စံး၀ဲန့ၣ်လီၤ.
“ပိၥ်မုၣ်လၢအိၣ်လၢဃိၣ်ပူၤတဖၣ် ဘၣ်ကွၢ်ဆၢၣ်မဲၥ်ဘၣ်ဒီးသးသမူတၢ်လီၤဘၣ်ယိၣ်လီၤ. လၢသုးတၢ်သမံသမိးအပူၤ ပိၥ်မုၣ်နီၢ်ခိက့ၢ်ဂီၤတဖၣ် တၢ်တီၢ်မၤဆူၣ်မၤဆါအီၤလၢ နီၢ်တီၢ်, ကျိခံတဖၣ်အဃိ ခိၣ်သၣ်ခံဒီးနီၢ်ခိအက့ၢ်အဂီၤတဖၣ် ဘၣ်ဒိၣ်နးနးကျံးကျံး၀ံၤ ဒိးကူစါယါဘျါသးလၢဃိၣ်ပူၤတၢ်ဆါဟံၣ်တဖၣ်အဂ့ၢ်န့ၣ်လီၤ. လၢတၢ်သမံသမိးအပူၤ ပိၥ်မုၣ်လၢသံတဖၣ်အိၣ်၀ဲဘၣ်ဆၣ် တၢ်တသ့ၣ်ညါအီၤတဖၣ်စ့ၢ်ကီးအိၣ်၀ဲလီၤ.”
ပိၥ်မုၣ်တဖၣ်အံၤ ဘၣ်ကွၢ်ဆၢၣ်မဲၥ်ဘၣ်အၢအၢသီသီလၢ သုးကီၣ်ကးအတၢ်မၤသံမၤ၀ီ,ဖီၣ်န့ၢ်ဆူၣ်,မၤဆူၣ်မၤဆါဒီး တၢ်မၤတရီတပါနီၢ်ခိက့ၢ်ဂီၤတဖၣ်ဘၣ်ဆၣ် လၢတၢ်ထီဒါပၢၢ်ဆၢသုးမီၤစိရိၤသနူအပူၤ ထီဒါ၀ဲတၢ်သူၣ်ဒူသးဒူဖီခိၣ် ပၥ်ပနီၣ်ပၥ်ကဖၢလၢသးအဂ့ၢ် AAPPထုးထီၣ်ပၥ်ဖျါဃၣ်၀ဲန့ၣ်လီၤ.
တၢ်ကဟံးန့ၢ်ဂ့ၢ်၀ီလၢသုးကီၣ်ကးအတၢ်မၤကမၣ်တဖၣ်အဂီၢ် တၢ်ဟ့ၣ်သဆၣ်ထီၣ်ဆူ ထံဂုၤကီၢ်ဂၤအအိၣ်အဂ့ၢ် AAPPတဲ၀ဲန့ၣ်လီၤ. သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအတီၢ်ပူၤ ပှၤဟူးဂဲၤဒံၣ်မိၣ်ခြ့ၣ်စံၣ်တဖၣ်ဒီး ထံဖိကမျၢၢ်ဖိခဲလၢၥ်ပၥ်ဖှိၣ် (၅၅၈၈)ဂၤ ဘၣ်တၢ်မၤသံအီၤအဂ့ၢ် တၢ်သ့ၣ်ညါဘၣ်လၢ AAPP လါအီကူး(၃၁)သီအနံၤ, လံၥ်ပၥ်ဖျါစရီအပူၤန့ၣ်လီၤ.
