လါအီကူး(၂)သီ,၂၀၂၄နံၣ်
လၢတနီသရံးကီၢ်ဆၣ် (၃)သီအတီၢ်ပူၤ သုးကီၣ်ကးအသုးတၢ်အီၣ်တၢ်အီတီၣ်သိလ့ၣ်ကျိၤ,သုးကျိၤဒီးသိလ့ၣ်ကျိၤတဖၣ် တၢ်ထုးအီၤလၢမ့ၣ်ပိၢ်အဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးပၥ်ဖှိၣ်တဖၣ်အအိၣ်န့ၣ်လီၤ.
လါစပထ့ဘၢၣ်(၁)သီအနံၤ, ဂီၤ(၇)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးတၢ်အီၣ်တၢ်အီတီၣ်သိလ့ၣ်ကျိၤ လၢဟဲထီၣ်၀ဲဆူ စ၀ဲ(ဇဝဲ)သုးရ့ၣ်တဖၣ် တၢ်ခိးထုးအီၤလၢမ့ၣ်ပိၢ်ဖဲ ပၠ့ၣ်၀ါဒီးယါဖိၣ်သ၀ီ(ပြင်ဝန်းရွာနှင့် ရမ်းဖို)အဘၢၣ်စၢၤအဂ့ၢ်, မုၢ်ထူၣ်(၁)နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ဘၣ်သဂၢၢ်ခးလိၥ်သးအိၣ်ထီၣ်ဒီး သုးကီၣ်ကးအသုး ဖဲ ပၠ့ၣ်၀ါဒီးယါဖိၣ်သ၀ီအဘၢၣ်စၢၤ (၅)မံးနံးအဆၢကတီၢ်၀ံၤအလီၢ်ခံ သုးကီၣ်ကးတပၤခးလီၤ၀ဲ(၄၀)မမကျိဖးဒိၣ်ပၥ်ဃုၥ် ကျိဖိတဖၣ်အဂ့ၢ် လီၢ်က၀ီၤကမျၢၢ်တဖၣ်ဒီးတၢ်ပၢၢ်ဆၢကရၢတဖၣ်တဲ၀ဲန့ၣ်လီၤ.
ဖဲလါအီကူး(၃၀)သီအနံၤ,ဂီၤအဆၢကတီၢ် သုကီၣ်ကးတၢ်အီၣ်တၢ်အီတီၣ်သိလ့ၣ်တခိၣ်လၢ အိၣ်ဟးထီၣ်၀ဲဒၣ်ဖဲ ၀့ၢ်ဘျံးစ့ၢ်ကီး တၢ်ထုးအီၤလၢမ့ၣ်ပိၢ်ဖဲ ဘါလမိးသ၀ီကရူၢ်(ဘန်းလမွတ်), ခၠီညံၣ်ကိၣ်သ၀ီအကပၤ(၁)ဘျီ ဒီးရါဖိၣ်သ၀ီအကပၤ(၁)ဘျီ ခဲလၢၥ်(၂)ဘျီန့ၣ်လီၤ.
လၢန့ၣ်အမဲၥ်ညါ ဖဲလါအီကူး(၃၁)သီအနံၤ, ဂီၤ(၇)နၣ်ရံၣ်အဆၢကတီၢ် သုးကီၣ်ကးခီၣ်သုးကျိၤလၢအိၣ်ဟးထီၣ်၀ဲဒၣ်ဖဲ စ၀ဲ(ဇဝဲ)သုးရ့ၣ်စ့ၢ်ကီး တၢ်ထုးအီၤလၢမ့ၣ်ပိၢ်ဖဲ သုးရ့ၣ်အကပၤလီၤအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးဖိတနီၤအအိၣ်န့ၣ်လီၤ.
လၢတၢ်ထုးအီၤလၢမ့ၣ်ပိၢ်တဖၣ်အပူၤ သုးကီၣ်ကးအသုးသံ၀ဲ(၄)ဂၤ၀ံၤ ဘၣ်ဒိၣ်၀ဲအါအါဂီၢ်ဂီၢ်အဂ့ၢ် အ၀ဲစံး၀ဲန့ၣ်လီၤ.
(၃)သီအတီၢ်ပူၤ တၢ်လဲၤထုးသုးကီၣ်ကးအသုးလၢမ့ၣ်ပိၢ်တဖၣ်အပူၤ ဘျံးကီၢ်ဆၣ်ကမျၢၢ်တၢ်ဒီသဒၢသုး-ဘျံးပကဖ, တနီသရံးကီၢ်ဆၣ် ပကဖဟီၣ်က၀ီၤဒိၣ်(၃),တနီသရံးရိမး ကမျၢၢ်တၢ်ဒီသဒၢသုးပၥ်ဖှိၣ်ဒီး ဟီၣ်က၀ီၤဒိၣ်(၅) တီဘိကၠံ(တောဗုံးကြီး)ကမျၢၢ်တၢ်ဒီသဒၢသုးတဖၣ်ပၥ်ဖှိၣ်ဒုး၀ဲန့ၣ်လီၤ.
Ref: Dawei Watch
