လါအီကူး(၂၉)သီ,၂၀၂၄နံၣ်
ရခၢၣ်ကီၫ်စဲၣ်,၀့ၫ်သၣ်တွဲ, သုးကီၣ်ကးအမီၣ်ရွှ့ၣ်လ့ထံသုးကလၢၤလၢအိၣ်တ့ၫ်အလီၫ်ခံကတၢၫ်တဖျၢၣ်အံၤ ရခၢၣ်သုးမုၫ်ဒိၣ်(AA) ထီၣ်ဒုးမၤန့ၫ်ကွံာ်၀ဲလံအဂ့ၫ် တၫ်သ့ၣ်ညါဘၣ်လၢ တၫ်ကစီၣ်လၢဘူးဒီးAAတဖၣ်န့ၣ်လီၤ.
“ထီၣ်ဒုးမၤန့ၫ်၀ဲန့ၣ် မ့ၫ်လီၤ.အိၣ်ဒံးဒၣ်လၢ တဘိးဘၣ်ပာ်ဖျါ၀ဲ သုးဂ့ၫ်၀ီတၫ်အိၣ်သးဒံးဘၣ်အဂ့ၫ် တၫ်ကစီၣ်လၢဘူးဒီး AAတဖၣ်တဲ၀ဲလီၤ.
သုးကလၢၤအလီၫ်ခံကတၢၫ်တဖျၢၣ် တၫ်ထီၣ်ဒုးမၤန့ၫ်ကွံာ်အဃိ ၀့ၫ်သၣ်တွဲဒီတ၀့ၫ် လီၤ၀ဲဆူရခၢၣ်သုးမုၫ်ဒိၣ်(AA)အစုပူၤန့ၣ်လီၤ.၀့ၫ်သၣ်တွဲတၫ်ဒုးန့ၣ် ဆူၣ်ဒိၣ်န့ၫ်ဒံး တၫ်ထီၣ်ဒုး၀့ၫ်အဂၤအဂ့ၫ် AAတဲဆိဃာ်၀ဲလီၤ.
ကၠံးတလံၣ်(ကျိန္တလီ),မီၣ်ရွှ့ၣ်အ့(မောင်ရွှေအေး),ကွ့၀ဲ(ကွင်း၀ိုင်း)တၫ်လီၫ်တဖၣ်လၢအိၣ်ဘူးဒီး၀့ၫ်သၣ်တွဲအံၤ တၫ်ဒုးဆူၣ်ထီၣ်၀ံၤ သုးကီၣ်ကးတကပၤ ခီၣ်ဆၢတၫ်လၢခိ,ထံ,ကလံၤသုးတဖၣ်အဃိ တၫ်ဒုးဘၣ်ဆူၣ်ထီၣ်၀ဲအဂ့ၫ် AAတၫ်ဘိးဘၣ်ရၤလီၤပူၤ ပာ်ဖျါ၀ဲလီၤ.
သုးကီၣ်ကးန့ၣ် ခီဖျိလၢကဘီ(၈)ခိၣ် လၢထံကျဲတၫ်ဒုးကဲထီၣ်တၫ်လီၫ်တဖၣ်အပူၤ မၤအါထီၣ်တၫ်စုက၀ဲၤ,သုးဖိ ဂံၫ်ဘါဒီးခးစိကျိဖးဒိၣ်လၢကဘီပူၤ တပယူာ်ဃီအဂ့ၫ် AAတဲ၀ဲလီၤ.
လၢကတီၫ်အံၤ ရခၢၣ်သုးမုၫ်ဒိၣ်(AA)န့ၣ် ရခၢၣ်ကီၫ်စဲၣ်ပူၤ ၀့ၫ်အါတက့ၫ်ထီၣ်ဒုးမၤန့ၫ်ဃာ်၀ဲ၀ံၤ မုၫ်နုာ်ကီၫ်ခီ သုး၀ဲၤလီၫ်ခိၣ်သ့ၣ်အိၣ်အလီၫ် ၀့ၫ်အါ(အမ်းမြို့)ဒီး၀့ၫ်တီၣ်ကိး(တောင်ဂုတ်မြို့),၀့ၫ်ကွး(ဂွမြို့),၀့ၫ်မီတီတဖၣ်အပူၤ တၫ်ထီၣ်ဒုးမၤန့ၫ်၀့ၫ်တဖၣ်အဂီၫ် တၫ်ဒုးဆူၣ်၀ဲလီၤ.
ရခၢၣ်သုးမုၫ်ဒိၣ်တကပၤ ဒ်အပူၤကွံာ်သုးဂ့ၫ်၀ီတၫ်မုၫ်လၫ်အသိး ရခၢၣ်ကီၫ်စဲၣ်ပူၤ ၀့ၫ်လၢအိၣ်တ့ၫ်တဖၣ် ထီၣ်ဒုးပၢ၀ဲအကတီၫ် တပာ်လီၤစုက၀ဲၤဟ့ၣ်အဃၣ်ဘၣ်အမဲာ်ညါ သုးကီၣ်ကးအသုးကလၢၤလၢခီၣ်ဆၢတၫ်ခဲလၢာ် ကဒုးဖျိးကွံာ်၀ဲအဂ့ၫ် ဘိးဘၣ်ရၤလီၤဃာ်၀ဲလီၤ.
