လါအီကူး(၂၉)သီ,၂၀၂၄နံၣ်
KNLAတီခိၣ်ရိၥ်မဲတၢ်ပၢၢ်ဆၢသုးတဖၣ် က၀ီၤကးတံၥ်ဒုးအီၤ စွဲၣ်တီၣ်ကိ(ကိး)ကျိဖးဒိၣ်တၢ်လူၢ်ခိၣ်အဃိ သုးကီၣ်ကးတပၤခးလီၤနါစိၤကျိဖးဒိၣ်ဆူ ဒူသ၀ီလၢအဘူးဒီးဖဲန့ၣ်တဖၣ်အပူၤအဂ့ၢ် တၢ်သ့ၣ်ညါဘၣ်လၢ ဟီၣ်ခိၣ်မဲၥ်ဖံးခိၣ်တၢ်ပၢၢ်ဆၢသုးတဖၣ်အအိၣ်လီၤ.
တၢ်ဒုးကဲထီၣ်သးဖဲ ကီၢ်ရ့ၣ်ဒူပျၥ်ယၥ်, ၀့ၢ်ရၤမတံအကပၤ စွဲၣ်တီၣ်ကိ(ကိး)ကျိဖးဒိၣ်တၢ်လူၢ်ခိၣ်အကပၤအဃိ သုးကီၣ်ကးအသုး ခးလီၤ၀ဲကျိဖးဒိၣ်အိၣ်ထီၣ်၀ဲ ကိးမုၢ်နံၤလီၤအဂ့ၢ် တဲ၀ဲန့ၣ်လီၤ.
“တၢ်ဟံးခီၣ်တဃၣ် လ့က့ၤကိၤ၀့ၢ်အကပၤဟီၣ်က၀ီၤကန့ၢ်အဂီၢ် ဖဲအပူၤကွံၥ် လါယူၤလံၤလံၤန့ၣ်ဂုၥ်ကျဲးစၢး၀ဲဒီး တၢ်ကးတံၥ်ဃၣ်၀ဲကျဲဒီတကျိၤလံအဃိ တၢ်ဒုး၀ဲစွဲၣ်တီၣ်ကိးလီၤ. သုးကလၢၤဒီဖျၢၣ်ဒု လီၤကြဲလၢၤလံ. အ၀ဲသ့ၣ်တပၤစ့ၢ်ကီး ခးက့ၤ၀ဲအဃိ ခံခီခံကပၤတၢ်ခးလိၥ်သးတဖၣ်ကဲထီၣ်၀ဲအဂ့ၢ်” ဟီၣ်ခိၣ်မဲၥ်ဖံးခိၣ်တၢ်ပၢၢ်ဆၢသုးတဲ၀ဲန့ၣ်လီၤ.
သုးကီၣ်ကးတပၤ ခးလီၤနါစိၤကျိဖးဒိၣ်ဆူ ဒူသ၀ီတဖၣ်အပူၤအသိး KNLAတီခိၣ်ရိၣ်မဲတၢ်ပၢၢ်ဆၢသုးပၢဆှၢဃၣ် လဲးခးတီၣ်ဖယါကိသုးကလၢၤတပၤစ့ၢ်ကီး ခး၀ဲလၢကျိဖးဒိၣ်အါန့ၢ် အဘျီ(၁၀)အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“တၢ်နၢ်ဟူဘၣ်၀ဲ တၢ်ခးကျိဖးဒိၣ်အကလုၢ်လီၤ. လီၤဂၥ်လၢတၢ်ခးအီၤဘူးဘူးဖိလီၤ. ဆိမိၣ် သိထးကွ့း(မ့တမ့ၢ်)လဲးခးတီၣ်တပၤလီၤ. စှၤသီအတီၢ်ပူၤ တၢ်နၢ်ဟူဘၣ်၀ဲ တၢ်ခးလီၤကျိဖးဒိၣ်ကလုၢ်အါမးလီၤ”အဂ့ၢ် ပှၤဘှီကျဲဖိတဂၤ စ့ၢ်ကီးတဲ၀ဲန့ၣ်လီၤ.
မ့မ့ၢ်လၢလါအီကူး(၂၈)သီအနံၤ, ဂီၤအဆၢကတီၢ်တခီ လၢလ့က့ၤကိၤ, ဖလူကလ့, ယသ့းကူၣ်, ကၠီးကူၣ်သ၀ီတပၤန့ၣ် လီၢ်က၀ီၤကမျၢၢ်တၢ်လ့ၤလိၤဟးထီၣ်တဖၣ်စှၤလီၤ၀ဲအသိး လဲၤသုးလီၢ်သုးကျဲလဲၤအိၣ်၀ဲဆူ ပှၤဃ့ၢ်သုးပှၤဘၣ်ကီဘၣ်ခဲဒဲက၀ီၤတဖၣ်အအိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: မောင်း
