လါအီကူး(၂၈)သီ,၂၀၂၄နံၣ်
တရူး-ပံၤယီၤကီၢ်ဆၢ လၢတရူးကီၢ်တပၤ တရူးသုးမုၢ်ဒိၣ် စးထီၣ်ဂဲၤလိ၀ဲ သုးတၢ်ဂဲၤလိ(၃)သီအတီၢ်ပူၤ ကသူ၀ဲစုက၀ဲၤဒီးကျိချံအနီၢ်ကီၢ်န့ၣ်လီၤ.
ခံခီခံကပၤ ပှၤဘၣ်မူဘၣ်ဒါတဖၣ် တၢၣ်ပီၣ်တဲသကိး၀ဲဘၣ်ထွဲတၢ်ဘံၣ်တၢ်ဘၢဂ့ၢ်၀ီအဖီခိၣ်၀ံၤ တရူးကမျၢၢ်တၢ်ထူၣ်ဖျဲးသုးမုၢ်ဒိၣ် စးထီၣ်ဂဲၤလိ၀ဲ သုးတၢ်ဂဲၤလိလၢ စုက၀ဲၤဒီးကျိချံအနီၢ်ကီၢ်န့ၣ်လီၤ.
ယူၣ်နၣ်ဟီၣ်က၀ီၤပှၤဘၣ်မူဘၣ်ဒါတဖၣ်တခီ သုးတၢ်ဂဲၤလိလၢတၢ်ကမၤအီၤတုၤ မုၢ်လ့ၤဧိၤအနံၤန့ၣ် မ့ၢ်ဒၣ်ကိးနံၤဒဲးတၢ်မၤညီနုၥ်လီၤအဂ့ၢ် တဲ၀ဲန့ၣ်လီၤ. လၢသုးတၢ်ဂဲၤလိအံၤအပူၤ တၢ်ကဂဲၤလိ၀ဲဘၣ်ထွဲ တၢ်ပၢဆှၢရဲၣ်ကျဲၤတၢ်ကွၢ်ဟုၣ်ကွၢ်စုၣ်,တၢ်ဟ့ၣ်ပလီၢ်စိ,တၢ်ပၢဆှၢကလုၥ်ကလုၥ်ကံၢ်စီဒီးတၢ်ဒုးတၢ်ယၤကံၢ်စီတဖၣ်အဂ့ၢ် ပၥ်ဖျါဃၣ်၀ဲဖဲ တရူးသုးမုၢ်ဒိၣ် ကလံၤထံးသုးဟီၣ်က၀ီၤတၢ်ဘိးဘၣ်ရၤလီၤအပူၤန့ၣ်လီၤ.
သုးတၢ်ဂဲၤလိလၢတၢ်ဂဲၤလိအီၤအံၤ အိၣ်ဘူးလိၥ်သးဒီး ဖဲအပူၤကွံၥ်လါယူၤအတီၢ်ပူၤ တၢ်ဒုးတၢ်ယၤကဲထီၣ်တ့ၢ်သး လၢယိၤဒိၣ်ကီၢ်စဲၣ်ကလံၤစိးတၢ်လီၢ်တဖၣ်အသိး ယိၤဒိၣ်ကီၢ်စဲၣ်အံၤ မ့ၢ်အရ့ဒိၣ်တၢ်လီၢ်တခါလၢ တၢ်ကိးအီၤလၢ ခ့းသ့းပိကျဲမုၢ်(ခေတ်သစ်ပိုးလမ်းမ)( BRI)တၢ်တိၤကျၢၤအဂီၢ်န့ၣ်လီၤ.
ပှၤဃုထံၣ်သ့ၣ်ညါတဖၣ်တခီ တဲ၀ဲလၢ တရူးအံၤမ့ၢ်ထံကီၢ်တဘ့ၣ်လၢ ဆီၣ်ထွဲမၤစၢၤစုက၀ဲၤတဖၣ်ဆူ သုးမီၤစိရိၤသုးမုၢ်ဒိၣ်အအိၣ်ဘၣ်ဆၣ် ပၢၤဃၣ်၀ဲတၢ်ရ့လိၥ်မုၥ်လိၥ်ဒီး ကလုၥ်ဒူၣ်ဖီၣ်စုက၀ဲၤတဖၣ်လၢ ပၢၢ်ဆၢထီဒါသုးကီၣ်ကးန့ၣ်လီၤ.
သုးကီၣ်ကးခိၣ်နၢ်ဒိၣ်ထီဒီးတရူးထံဂုၤကီၢ်ဂၤကိတိၥ်တဖၣ် မၤ၀ဲတၢ်ထံၣ်လိၥ်တၢၣ်ပီၣ်တဲသကိးတခါ ဖဲတလါအံၤလါစးထီၣ်အဆၢကတီၢ်န့ၣ်လီၤ. ဖဲအပူၤကွံၥ် လါအ့ဖြ့ၣ်အတီၢ်ပူၤစ့ၢ်ကီး တရူးကမျၢၢ်တၢ်ထူၣ်ဖျဲးသုးမုၢ်ဒိၣ် မၤ၀ဲသုးတၢ်ဂဲၤလိတဖၣ် ဖဲတရူးကီၢ်ဆၢတကပၤလၢ အစဲဘူးလိၥ်သးဒီးကခၠ့ၣ်ကီၢ်စဲၣ်, လွဲၢ်ကၠဲၣ်၀့ၢ်တပၤန့ၣ်လီၤ.
Ref: VOA
