လါအီကူး(၂၈)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဘျံး-ဒ၀ဲၢ်ဟီၣ်က၀ီၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ထီၣ်ဒုးမၤန့ၢ် သုးခိၣ်စးလိအိၣ်သုးကလၢၤပၥ်ဃုၥ် KTLAသုးကလၢၤ(၂)ဖျၢၣ်အဂ့ၢ် ကီၢ်ရ့ၣ်ဘျံး-ဒ၀ဲၢ် နဲၣ်ရွဲၣ်ပဒိၣ်စီၤအဲၣ်နၤတဲ၀ဲန့ၣ်လီၤ.
သုးကလၢၤတဖၣ်အံၤအိၣ်ဆီလီၤပၥ်သး ဖဲကၠီၣ်တဲၣ်-ပံၤယီၤကီၢ်ဆၢအကပၤ ထံခံကလံၤထံးတပၤန့ၣ်လီၤ. စးထီၣ်ဖဲ တလါအံၤ(၁၉)သီအနံၤန့ၣ် တၢ်ခးအီၤလၢကျိဖးဒိၣ်၀ံၤ ဖဲ(၂၁)သီအနံၤန့ၣ် တၢ်ထီၣ်ဒုးမၤန့ၢ်၀ဲအဂ့ၢ် အ၀ဲတဲ၀ဲန့ၣ်လီၤ.
“ဘၣ်ထွဲဒီး တၢ်ခိးဒုး ပပှၤလၢကျဲတီၤအဃိ(၆)ဂၤဘၣ်ဒိ၀ဲအဖီခိၣ် တၢ်လဲၤရှဲပျီကွံၥ်အီၤလီၤ. သုးကလၢၤန့ၣ် တမ့ၢ်ဖးဒိၣ်ဘၣ်. အ၀ဲသ့ၣ်အိၣ်၀ဲလၢဒၢဖိတဖၣ်လီၤ. သုးခိၣ်စးလိသုးကလၢၤန့ၣ် မ့ၢ်ဒၣ် KTLAသုးကလၢၤလီၤ.”အဂ့ၢ် ကီၢ်ရ့ၣ်ဘျံး-ဒ၀ဲၢ် နဲၣ်ရွဲၣ်ပဒိၣ်စီၤအဲၣ်နၤ တဲ၀ဲန့ၣ်လီၤ.
တၢ်လဲၤဒုး KTLAသုးကလၢၤတဖၣ်အဆၢကတီၢ် ခံခီခံကပၤတၢ်ခးလိၥ်သးကဲထီၣ်၀ံၤအလီၢ်ခံ KTLAအပှၤသုးဖိတဖၣ် ဃ့ၢ်ပဒ့ၣ်အသးအဂ့ၢ် ပဒိၣ်စီၤအဲၣ်နၤစံး၀ဲန့ၣ်လီၤ. တနီၤန့ၣ် လဲၤဃ့ၢ်ဆူကၠီၣ်တဲၣ်တပၤအဂ့ၢ် အ၀ဲစံးကဒီး၀ဲန့ၣ်လီၤ.
ကီၢ်သူလ့ၤသုးမုၢ်ဒိၣ် သုးခိၣ်စးလိအံၤ ဖဲအပူၤကွံၥ် လါယူၤလံအတီၢ်ပူၤန့ၣ် ဟဲသုးအိၣ်၀ဲဆူ သုးက့နီၣ်ဂံၢ်(၄)ဟီၣ်က၀ီၤအပူၤအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသိၣ်ဒူတဖၣ်တဲ၀ဲအဖီခိၣ်န့ၣ်လီၤ.
သုးခိၣ်စးလိဟဲတုၤအိၣ်၀ံၤအလီၢ်ခံ ကီၢ်သူလ့ၤသုးမုၢ်ဒိၣ် ဆၣ်ကဆီသုးတြိၤ သုးခိၣ်အဲၣ်ခွံ(ကီၢ်လၤဖိ)အသုးဒ့ဒီတဒ့အံၤ လဲၤပၥ်ဖှိၣ်ထီၣ်သးဒီးသုးခိၣ်စးလိအဂ့ၢ် ပဒိၣ်အဲၣ်နၤစံး၀ဲန့ၣ်လီၤ.
တၢ်ထီၣ်ဒုးမၤန့ၢ် သုးကလၢၤ(၂)ဖျၢၣ်အပူၤ KTLAတပၤသံ၀ဲ(၁)ဂၤ၀ံၤ (၃)ဂၤဘၣ်ဒိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. တနံၤဃီကတီၢ် ဖဲ၀့ၢ်မတါ-ထံခံကျဲမုၢ်အဖီခိၣ် အဲၣ်၀ဲ(အိုင်ဝိုင်း)(သ၀ီလီၢ်လံၤ)အကပၤ KTLAခိးခး၀ဲအဃိ KNLAသုးရ့ၣ်(၁၀)အပှၤသုးဖိတဂၤ သံ၀ဲန့ၣ်လီၤ.
သုးခိၣ်အဲၣ်ခွံ(ကီၢ်လၤဖိ)အပှၤသုးတဖၣ်အံၤ ဟူးဂဲၤ၀ဲဖဲ ကီၢ်ဆၢကျဲဒီတကျိၤ၀ံၤ ခိးခး၀ဲဒၣ်လၢကျဲတီၤအဃိ တၢ်ကမၤရှဲပျီကွံၥ်အဂ့ၢ် သုးက့နီၣ်ဂံၢ်(၄)တပၤ တဲ၀ဲန့ၣ်လီၤ.
“အ၀ဲသ့ၣ်မ့ၢ်အိၣ်လၢ ဟီၣ်က၀ီၤပူၤန့ၣ် ပဟူးဂဲၤ၀ဲတန့ၢ်နီတမံၤဘၣ်အဃိ ဘၣ်မၤရှဲပျီကွံၥ်လီၤ. ဘၣ်ဟံးတၢ်ဆၢကတီၢ်ဒီးဘၣ်မၤရှဲပျီလီၤ. ပမ့ၢ်မၤတၢ်ရှဲပျီန့ၣ် အ၀ဲသ့ၣ် လဲၤဃ့ၢ်ဆူကၠီၣ်တဲၣ်တပၤ၀ံၤ လဲၤအိၣ်ကဒု၀ဲလီၤ. မ့ၢ်၀ံၤန့ၣ် ဟဲက့ၤနုၥ်လီၤ၀ဲအဂ့ၢ်” ပဒိၣ်အဲၣ်နၤ စံးကဒီး၀ဲန့ၣ်လီၤ.
စးထီၣ်ဖဲအပူၤကွံၥ်နံၣ်စးထီၣ်န့ၣ် သုးက့နီၣ်ဂံၢ်(၄)ဟီၣ်က၀ီၤပူၤ (KNLA)ဒီးKTLAအဘၢၣ်စၢၤ တၢ်ဒုးတဖၣ်စးထီၣ်ကဲထီၣ်၀ဲ၀ံၤ ကတီၢ်ခဲအံၤစ့ၢ်ကီး တၢ်ခးလိၥ်သးတဖၣ် ကဲထီၣ်၀ဲခဲအံၤခဲအံၤန့ၣ်လီၤ.
Ref: The Tanintharyi Times
