လါအီကူး(၂၆)သီ,၂၀၂၄နံၣ်
အံၣ်ယၣ်၀တံၣ်ကီၫ်ခီ,ပသံၣ်ကီၫ်ရ့ၣ်,သၣ်ပီကီၫ်ဆၣ်ပူၤ Non CDM ကၠိသရၣ်တဂၤ တဲ၀ဲလၢကမျၢၫ်တၫ်ဘၣ်ကဲသုး၀ံၤ တၫ်မၢဖီၣ်တၫ်ဖး ဖဲသုးကီၣ်ကးအစုတီၤဖီလာ် ပၢပြးဘၣ်မူဘၣ်ဒါ အူလးမၠံးအဟံၣ်အဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အိၣ်န့ၣ်လီၤ.
Non CDMကၠိသရၣ်လၢ တၫ်မၢဖီၣ်တၫ်ဖးအံၤ အသးနံၣ်အိၣ်(၄၀)ဘျဲၣ်၀ံၤ မ့ၫ်၀ဲတီၤဖုၣ်ကၠိသရၣ်တဂၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“ကတီၫ်အံၤ သးနံၣ်ဒိၣ်ဒိၣ်ဆံးဆံး မၢကဲသုးခဲလၢာ်န့ၣ်လီၤ.အပူၤကွံာ်သးနံၣ်(၁၈)နံၣ်တုၤ(၃၅)နံၣ်အတီၫ်ပူၤလီၤ.အခဲအံၤ အၢထီၣ်လံ.ပထံၣ်ဘၣ်လၢကိးအါထီၣ်၀ဲပှၤကညီနီၫ်ဂံၫ်နီၫ်ဒွးတဖၣ်လီၤ.ပဒိၣ်ပှၤမၤတၫ်ဖိတဖၣ်စ့ၫ်ကီး မၢဖီၣ်တၫ်ဖးလီၤ. တၫ်ပာ်ပနီၣ်ဃာ်တအိၣ်ဘၣ်,ဘၣ်ဖီၣ်တၫ်ဖးကိးဂၤဒဲးအဂ့ၫ် သ၀ီသးပှၫ်တဲ၀ဲလီၤ.
သၣ်ပီကီၫ်ဆၣ်,လၢအနါကိသ၀ီ(အနန်းကုန်းကျေးရွာ)န့ၣ် ဖဲလါအီကူး(၂၂)သီနံၤ သးစၫ်လၢသးနံၣ်ပှဲၤ(၃၂)ဂၤ မၢဖီၣ်တၫ်ဖး၀ံၤ လၢအကျါသးနံၣ်(၄၀)နံၣ်အိၣ် Non CDMကၠိသရၣ်တဂၤပာ်ဃုာ်၀ံၤ ဖီၣ်တၫ်ဖးဘၣ်လၢကဘၣ်ကဲသုးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ဖဲ(၂၄)သီနံၤစ့ၫ်ကီး သ၀ီသးပှၫ်ကိးတၫ်အိၣ်ဖှိၣ် ဖဲတ့ကိးကၠံသ၀ီ(တင်းကုတ်ကြီးကျေးရွာ) သီခါဖၠၣ်အဃိဘၣ်လဲၤထီၣ်လီၤ.ဟံၣ်တဖျၢၣ်တဂၤထဲပိၣ်ခွါတဖၣ်လီၤ.မ့ၫ်လိၣ်လၢတၫ်ဘၣ်ကဲသုးန့ၣ် ကဘၣ်နုာ်လီၤပာ်ဃုာ်အဂီၫ် မၢဆဲးလီၤ စုမုၫ်ကျၢၫ်အဂ့ၫ် တ့ကိးကၠံသ၀ီဖိတဂၤတဲ၀ဲလီၤ.
အပူၤကွံာ်လါယူၤလံအပူၤ အနါကိသ၀ီပာ်ဃုာ် ကွ့ပီးသ၀ီ(ကွင်းပေါက်ကျေးရွာ),တ့ကိးကၠ့သ၀ီ(တင်းကုတ်ကြီး ကျေးရွာ),ကၠၣ်ကၣ်သ၀ီ(ကြာကန်ကျေးရွာ)တဖၣ် တဲ၀ဲလၢ ကမျၢၫ်တၫ်ဘၣ်ကဲသုးအဂီၫ်၀ံၤ က၀ီၤဒ့ပၢပြးဘၣ်မူ ဘၣ်ဒါဒီးအပှၤတဖၣ် လူၤထၢ၀ဲဟံၣ်တဟံၣ်စ့(၃)ကလးကၠးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
သၣ်ပီကီၫ်ဆၣ်အပူၤ သုးကီၣ်ကးအစုတီၤဖီလာ် Non CDMပဒိၣ်ပှၤမၤတၫ်ဖိ တၫ်စးထီၣ်ဒုးဖီၣ်တၫ်ဖးတကးဘၣ် သးနံၣ်(၅၀)နံၣ်ဘျဲၣ်တဖၣ် ကဘၣ်ဖီၣ်တၫ်ဖးအဂီၫ် တၫ်ရဲၣ်တၫ်ကျဲၤတဖၣ်အဃိ လီၫ်က၀ီၤဖိတဖၣ် ဘၣ်ယိၣ်ဘၣ် ဘှီတၫ်န့ၣ်လီၤ.
Ref: Ayeyarwaddy Times
