လါအီကူး(၂၃)သီ,၂၀၂၄နံၣ်
တံးဘဲးတၫ်ဘူၣ်တၫ်ဘါခိၣ်နၫ် သီခါဖးဒိၣ်ဒလဲလါမါန့ၣ် လၢတၫ်ဂ့ၫ်ဒ်လဲၣ်ဂ့ၤ ထံကီၫ်လၢတူၫ်လိာ်အီၤန့ၣ် ထီဒါ၀ဲတုၤလီၤတီၤလီၤအဂ့ၫ် တရူးထံဂုၤကီၫ်ဂၤကိတိာ်၀ဲၤကျိၤ ပှၤတဲတၫ်ပၢတဲလီၤ၀ဲ ဖဲလါအီကူး(၂၂)သီအနံၤန့ၣ်လီၤ.
အမဲရကၤထံဂုၤကီၫ်ဂၤကိတိာ်၀ဲၤကျိၤဒီးဟံၣ်၀ါပတီၫ်ထီခိၣ်နၫ်တဖၣ် ထံၣ်လိာ်တၢၣ်ပီၣ်တဲသကိးတၫ်ဒီးဒလဲလါမါ ဖဲ၀့ၫ်နယူယီးအပူၤ၀ံၤ တၫ်ကသုးထီထီၣ် ပှၤတံးဘဲးဖိတဖၣ် အပှၤဂ့ၫ်၀ီခွဲးယာ်အဂီၫ် အမဲရကၤတဲပာ်ဂၢၫ်ပာ်ကျၢၤကဒ၀ဲ အတၫ်အၢၣ်လီၤတဖၣ်န့ၣ်လီၤ.
သးနံၣ်(၈၉)နံၣ်အိၣ် တံးဘဲးတၣ်ဘူၣ်တၫ်ဘါခိၣ်နၫ် ဒလဲလါမါလၢလဲၤတုၤဆူကီၫ်ချၢအံၤ တရူးပာ်ပနီၣ်ဃာ်အီၤဒ် ပှၤထုးဖးသးလၢလီၤဘၣ်ယိၣ်တဂၤအသိး၀ံၤ ထံၣ်လိာ်သးဒီးထံဂုၤကီၫ်ဂၤပှၤဘၣ်မူဘၣ်ဒါတဖၣ်န့ၣ် ထီဒါ၀ဲလီၤ.
တၫ်ထံၣ်လိာ်သးတဘျီညါအံၤစ့ၫ်ကီး ထီဒါ၀ဲအမဲရကၤဆူၣ်ဆူၣ်ကလဲာ်၀ံၤ လၢအမဲရကၤ ထံရူၫ်ကီၫ်သဲးတၫ်ထုးဖးသး တၫ်ဟူးတၫ်ဂဲၤအပူၤ တဟ့ၣ်တၫ်ပျဲလၢ ဒလဲလါမါ ကပာ်ဃုာ်ဘၣ်အဂ့ၫ် တရူးထံဂုၤကီၫ်ဂၤကိတိာ်၀ဲၤကျိၤ ပှၤတဲတၫ်ပၢ မီၣ်န့(မော်နင်း)တဲလီၤ၀ဲလီၤ.
ဘၣ်ထွဲဒီးတၫ်ဃ့ထီၣ် တံးဘဲးနီၫ်ကစၫ်စံၣ်ညီၣ်ပၢလီၤသးဟီၣ်က၀ီၤအဖီခိၣ် တၫ်ဂ့ၫ်လိာ်ဘှီလိာ်တဖၣ် တၫ်ကဘှါဆှဲန့ၫ်အဂီၫ် အမဲရကၤတကပၤ ပာ်လီၤဃာ်တၫ်ဘျၢတတီၤလၢ ဟ့ၣ်ဃးတၫ်ဆီၣ်သနံးစ့ၫ်ကီး တရူးတကပၤထီဒါ၀ဲ၀ံၤ ကဒီသဒၢန့ၫ် နီၫ်ကစၫ်တၫ်ဘၣ်ဘျူးအဂ့ၫ်တဲ၀ဲလီၤ.
အမဲရကၤတကပၤပာ်လီၤဃာ် ဘၣ်ထွဲတံးဘဲး ပှၤတၢၣ်ပီၣ်တၫ်လီၤဆီတဂၤစ့ၫ်ကီး မ့ၫ်တၫ်တံာ်တာ် တရူးထံလီၫ်ကီၫ်ပူၤဂ့ၫ်၀ီအဂ့ၫ် တရူးထံဂုၤကီၫ်ဂၤကိတိာ်၀ဲၤကျိၤတဲ၀ဲလီၤ.
Ref: Reuters
