လါအီကူး(၂၃)သီ,၂၀၂၄နံၣ်
ရခၢၣ်ကီၫ်စဲၣ်,ကွးကီၫ်ဆၣ်,ဖဲကၠ့ၣ်တလံၣ်၀့ၫ်(ကျိန္တလီမြို့) ခံကပၤတၫ်ဒုးကဲထီၣ်အဃိ ကွး၀့ၫ်လီၫ်က၀ီၤကမျၢၫ်(၅)ကထိဂၤဃၣ်ဃၣ် ဘၣ်ဃ့ၫ်ပူၤဖျဲးသးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
စးထီၣ်ဖဲလါအီကူး(၁၂)သီနံၤ ပှၤပာ်တ့ၫ်ဟံၣ်ဃီဃ့ၫ်ပူၤဖျဲးသးအိၣ်၀ဲ၀ံၤ ၀့ၫ်ပူၤပှၤအိၣ်စှၤအဃိ တၫ်ဖံးတၫ်မၤခဲလၢာ် ပတုာ်ကွံာ်၀ဲအဂ့ၫ် ပှၤကွးဖိလၢလဲၤအိၣ်ကဒုဖဲ၀့ၫ်တကူၣ်တဂၤတဲ၀ဲလီၤ.
“တၫ်ဒုးတၫ်အိၣ်သးတခီတတုၤလၢပ၀့ၫ်ဒံးဘၣ်.ကဲထီၣ်အသးန့ၣ်ဖဲကၠ့ၣ်တလံၣ်(ကျိန္တလီပေါ့)လီၤ.ကၠ့ၣ်တလံၣ်(ကျိန္တလီပေါ့)ဒီးကွး၀့ၫ်န့ၣ် အိၣ်စီၤစုၤ မံးလာ်(၄၀)ဃၣ်ဃၣ်လီၤ.ဘူးထီၣ်ဘူးလီၤအဃိ ကမျၢၫ်တဖၣ်ပျံၤတၫ်ဖုးတၫ်ဒီး ဃ့ၫ်ဖျိးကွံာ်လီၤ.တၫ်ဖံးတၫ်မၤခဲလၢာ် တၫ်ဘၣ်ပတုာ်ကွံာ်ဃာ်၀ဲလီၤ.”
ကၠ့ၣ်တလံၣ်၀့ၫ်လၢ အိၣ်စီၤစုၤဒီးကွး၀့ၫ်အတၢၣ်(၄၀)ဃၣ်ဃၣ်အံၤအပူၤ သုးကီၣ်ကးအသုးကလၢၤတဖၣ် စးထီၣ်ဖဲလါအီကူး(၁၂)သီနံၤန့ၣ် ရခၢၣ်သုးမုၫ်ဒိၣ်(AA)ထီၣ်ဒုး၀ဲလီၤ.
ဖဲလါအီကူး(၁၄)သီနံၤ ကၠ့ၣ်တလံၣ်၀့ၫ်, နီၫ်ဂံၫ်(၁)ဒီး(၃)က၀ီၤဒ့တဖၣ်အပူၤ သုးကီၣ်ကးအသုးကလၢၤ(၂)ဖျၢၣ် လၢဆီလီၤဃာ်၀ဲနၣ် (AA)ထီၣ်ဒုးမၤန့ၫ်ကွံာ်၀ံၤအလီၫ်ခံ တၫ်ဒုးဆူၣ်ထီၣ်တပယူာ်ဃီလီၤ.
တၫ်န့ၣ်အဃိ လီၫ်က၀ီၤဖိတဖၣ်ဘၣ်ယိၣ်၀ဲလၢတၫ်ဒုးကဟဲခီဃီၤဆူ ကွး၀့ၫ်အအဃိ ဘၣ်လဲၤဃ့ၫ်အိၣ်ကဒုဆူ အ့ၣ်ယၣ်၀တံၣ်ကီၫ်ခီ, ယ့ၣ်ကၠံၣ်(ရေကြည်),ကၠိၣ်ပၠီၣ်(ကျုံပျော်),ငသဲခၠီ၀့ၫ်(ငသိုင်းချောင်း)ဒီး၀့ၫ်တကူၣ်တဖၣ်န့ၣ်လီၤ.
၂၀၁၄နံၣ် ဖးဖီမုၫ်စရီအဖီခိၣ် ပှၤအိၣ်ဖဲကွး၀့ၫ် ပှၤနီၫ်ဂံၫ်အိၣ်၀ဲတကလးတခီ(၉၅၁၀)ဂၤဃၣ်ဃၣ်အဃိ လၢကတီၫ်အံၤ ၀့ၫ်ပူၤပှၤနီၫ်ဂံၫ်အိၣ်တ့ၫ်ထဲတ၀ာ်ဃၣ်ဃၣ်လီၤ.
တၫ်ဒုးအဃိ ရွှ့ၣ်ယတံၣ်ပီၣ်လဲၣ်နံၤဟံၣ်ဃီတၫ်တိာ်ကျဲၤ လၢအိၣ်စၤစုၤဒီးကွး၀့ၫ်(၃)မံးလာ်အံၤ တၫ်ဘၣ်ပတုာ်ဃး၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ရခၢၣ်သုးမုၫ်ဒိၣ်(AA)န့ၣ် ခၠီကီၫ်စဲၣ်,ပလဲး၀းကီၫ်ဆၣ်ပာ်ဃုာ် ရခၢၣ်ကီၫ်စဲၣ်ပူၤ ကီၫ်ဆၣ်(၉)ဘ့ၣ်ဒီး တီၣ်ပၠိၣ်လဲး၀ဲ (တောင် ပြိုလက်ဝဲ), မအံၣ်(မအီ),ကါထီကၠံ(ကမ်းထောင်းကြီး)ဒီးကၠ့ၣ်တလံၣ်(ကျိန္တလီ)ကီၫ်ဆၣ်အဒ့တဖၣ် ထီၣ်ဒုးမၤန့ၫ်ဃာ်၀ဲလီၤ.
Ref: FRA
