လါအီကူး(၂၀)သီ,၂၀၂၄နံၣ်
ဟီၣ်ခိၣ်ဒီဖျၢၣ်တၢ်အိၣ်ဆူၣ်အိၣ်ချ့ကရၢ ဘိးဘၣ်ရၤလီၤဃၣ်၀ဲ တၢ်အုးလၢၢ်တၢ်ဆါလၢဂ့ၢ်ဂီၤအူတၢ်အိၣ်သးအံၤ တၢ်ထံၣ်န့ၢ်၀ဲ တၢ်ဆါတၢ်ဘၣ်ကူဘၣ်ဂၥ်လၢအဆိကတၢၢ်အဂ့ၢ် ပှၤဘၣ်မူဘၣ်ဒါတဖၣ် တဲလီၤ၀ဲဖဲလါအီကူး(၁၉)သီအနံၤန့ၣ်လီၤ.
တၢ်ကသ့ၣ်ညါဘၣ်၀ဲ ဘၣ်ထွဲ တၢ်ဆါတၢ်ဂ့ၢ်တၢ်ကျိၤလီၤတံၢ်လီၤဆဲးအဂီၢ် တၢ်အိၣ်ခိးကွၢ် တၢ်သမံသမိးကသံၣ်အဆၢတဖၣ်၀ံၤ တၢ်အံၤဖဲအပူၤကွံၥ် လါဒံၣ်စ့ၣ်ဘၢၣ်အလီၢ်ခံ ထံကီၢ်အပူၤ တၢ်ဘၣ်ကူဘၣ်ဂၥ် တၢ်အုးလၢၢ်တၢ်ဆါအဆိကတၢၢ်န့ၣ်လီၤ.
ပှၤဆါအံၤအပူၤကွံၥ်တၢ်လဲၤလိၤဟးထီၣ်တအိၣ် ပှၤဖံးလံးပံးဖိလၢ သးနံၣ်(၃၃)နံၣ်အိၣ်တဂၤအဂ့ၢ် တၢ်အိၣ်ဆူၣ်အိၣ်ချ့ကိတိၥ်၀ဲၤကျိၤ ထုးထီၣ်ပၥ်ဖျါဃၣ်၀ဲန့ၣ်လီၤ. ကိၣ်ကိၣ်(ကွန်ဂို)ပၥ်ဃုၥ် အၣ်ဖရံးကၣ်ထံကီၢ်တဖၣ်အပူၤ တၢ်ဘၣ်ကူဘၣ်ဂၥ်ဟဲအါထီၣ်၀ံၤအလီၢ်ခံ ဟီၣ်ခိၣ်ဒီဖျၢၣ်တၢ်အိၣ်ဆူၣ်အိၣ်ချ့ကရၢ ဘိးဘၣ်ရၤလီၤ၀ဲ တၢ်ဆါအံၤလၢ ဂ့ၢ်ဂီၤအူတၢ်အိၣ်သးအသိးန့ၣ်လီၤ.
လၢန့ၣ်အမဲၥ်ညါ ပၣ်က့ၣ်စတၣ်ထံကီၢ်ပူၤ ပှၤတဂၤလၢဟဲက့ၤလၢ ပီၣ်လဲၢ်ကျီၣ်ဟီၣ်က၀ီၤစ့ၢ်ကီး တၢ်ထံၣ်န့ၢ်၀ဲ တၢ်အုးလၢၢ်တၢ်ဆါတၢ်ဘၣ်ကူဘၣ်ဂၥ်အီၤအဂ့ၢ် ပှၤဘၣ်မူဘၣ်ဒါတဖၣ် တဲလီၤ၀ဲမဟါအနံၤန့ၣ်လီၤ.
ဘဲရဲး(ဗိုင်းရပ်စ်)တၢ်ဘၣ်ကူဘၣ်ဂၥ်အံၤ ဘၣ်ကူဘၣ်ဂၥ်သ့လၢ တၢ်အိၣ်ဘူးလိၥ်သးအဃိ ထံကီၢ်တဖၣ်ဘၣ်ယိၣ်၀ဲလၢ တၢ်ဘၣ်ကူဘၣ်ဂၥ်တဖၣ် ကဟဲအါထီၣ်၀ံၤ ကတီၢ်ခဲအံၤ တၢ်ထံၣ်န့ၢ်ဘၣ်၀ဲစ့ၢ်ကီး တၢ်ဆါကလုၥ်လီၤဆီတခါဟဲအိၣ်ထီၣ်၀ဲန့ၣ်လီၤ.
တၢ်ဆါတၢ်မ့ၢ်ဘၣ်ကူဘၣ်ဂၥ်န့ၣ် လၢနီၢ်ခိတၢ်လီၢ်သကုၤ တၢ်ပူၤလီၢ်တဖၣ်ကကဲထီၣ်၀ဲ၀ံၤ တၢ်ဆိက့ဆူၣ်ဆူၣ်ကလၢၤဒီး ပှၤလၢတၢ်ဘၣ်ကူဘၣ်ဂၥ်အီၤ အဂၤ(၁၀၀)အကျါ သံ၀ဲ(၄)ဂၤန့ၣ်လီၤ.
Ref: CNA
Photo: Getty Images
