လါအီကူး(၂၀)သီ,၂၀၂၄နံၣ်
သုးကီၣ်ကးအသုး ခမရ-၅၄၅ဒီး၅၄၆လီၢ်လၤအိၣ်သုးခိၣ်နၢ်တနီၤ လၢအိၣ်ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, ကီၢ်ဆၣ်ကီးတရံး, ကြုၢ်တုအံၤ ဘၣ်ယိၣ်လၢတၢ်ကလဲၤဒုးအီၤအဃိ လၢမုၢ်နၤခီတပၤ သုးလီၢ်သုးကျဲလဲၤမံလၢတၢ်လီၢ်အဂၤအိၣ်၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ပၢၢ်ဆၢတၢ်ကစီၣ်အအိၣ်န့ၣ်လီၤ.
ကြုၢ်တုဟီၣ်က၀ီၤအပူၤ လၢမုၢ်ဆါတပၤ တၢ်ဆီလီၤပၥ်အပှၤသုးဖိတဖၣ်ဒ်ညီနုၥ်အသိးဘၣ်ဆၣ် ဘၣ်ယိၣ်လၢတၢ်ပၢၢ်ဆၢသုးတဖၣ်တၢ်ကလဲၤဒုးအီၤအဃိလၢမုၢ်နၤခီတပၤသုးလီၢ်သုးကျဲဆီတလဲမံလၢတၢ်လီၢ်အဂၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“ကြုၢ်တုတပၤန့ၣ် တၢ်အိၣ်သးဒ်ညီနုၥ်အသိးလီၤ. တၢ်လ့ၤလိၤဟးထီၣ်ဒ်ညီနုၥ်အသိးလီၤ. ဘၣ်ဆၣ်လၢမုၢ်နၤခီတပၤ ခမရ-၅၄၅ဒီး၅၄၆လီၢ်လၤအိၣ်သုးခိၣ်နၢ်တနီၤ ဘၣ်ယိၣ်လၢတၢ်ကလဲၤဒုးအီၤအဃိ လဲၤခီ၀ဲကၠဲတိၤ(ဂျိုင်းတံတား)၀ံၤ လဲၤဆီတလဲမံတၢ်လီၢ်အိၣ်၀ဲလီၤ. မဟါအနၤ(၇)နၣ်ရံၣ်ဘျဲၣ်အဆၢကတီၢ် ခမရ-၅၄၅ဒီး၅၄၆လီၢ်လၤအိၣ်သုးခိၣ်နၢ်တဖၣ် လဲၤခီ၀ဲကၠဲတိၤ”အဂ့ၢ် ဂံၢ်ခီၣ်ထံးတၢ်ပၢၢ်တၢ်ကစီၣ်စံး၀ဲန့ၣ်လီၤ.
အီၣ်စ့ၣ်ယၣ်ဒုးယၤရဲၣ်ကျဲၤအဂီၢ် သုးကီၣ်ကးမၤပှဲၤအါထီၣ်သုးအဂံၢ်အဘါတဖၣ်၀ံၤ တၢ်ဖ့ၣ်ဆၢကဲထီၣ်သးဒီးတၢ်ပၢၢ်ဆၢသုးတဖၣ်န့ၣ်လီၤ.
ဖဲအပူၤကွံၥ် လါအီကူး(၁၈)သီအနံၤန့ၣ် အ့ရှၢကျဲမုၢ် တီနီၢ်ကစၢၢ်အဆှၢခိၣ် သုးကီၣ်ကးဒီးတၢ်ပၢၢ်ဆၢသုးအဘၢၣ်စၢၤ တၢ်ဒုးကဲထီၣ်သးအိၣ်ထီၣ်၀ဲ၀ံၤ သုးကီၣ်ကးတပၤတၢ်သံတၢ်ပှၢ်အိၣ်၀ဲဒီး တၢ်ဖီၣ်န့ၢ်စ့ၢ်ကီး မူဒံးတဖၣ်စ့ၢ်ကီး အိၣ်၀ဲန့ၣ်လီၤ.
Ref: Salween Press
