လါအီကူး(၁၉)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ စးထီၣ်လၢလါအီကူး(၁)သီတုၤ(၁၅)သီအနံၤ, (၁၅)သီအတီၢ်ပူၤKNLAဒီးသုးကီၣ်ကးအဘၢၣ်စၢၤတၢ်ဒုးကဲထီၣ်သး(၅၇)ဘျီ,သုးကီၣ်ကးအပှၤသံ(၂၀)ဂၤဒီးဘၣ်ဒိ(၄)ဂၤအဂ့ၢ် ခ့ၣ်အဲၣ်ယူၣ်-မုၢ်တြီၢ်ထုးထီၣ်ပၥ်ဖျါဃၣ်၀ဲန့ၣ်လီၤ.
မ့မ့ၢ်လၢ KNLAဒီးသုးပၥ်ဖှိၣ်တခီ တၢ်ဘၣ်ဒိဘၣ်ထံး ဒီးတၢ်သံတၢ်ပှၢ်တအိၣ်၀ဲဘၣ်အဂ့ၢ်စံး၀ဲန့ၣ်လီၤ.
တၢ်ဒုးကဲထီၣ်သးလၢ ခံခီခံကပၤအံၤအပူၤ သုးကီၣ်ကးတပၤသူ၀ဲကလံၤကျါတၢ်ဒုးမ့ၢ်ဂ့ၤဒီး ဆှၢန့ၢ်အပှၤသုးဖိတၢ်အီၣ်လၢကဘီယူၤအိၣ်၀ဲဒၣ်စ့ၢ်ကီးအဂ့ၢ် စံး၀ဲန့ၣ်လီၤ.
တကးဘၣ် ခီဖျိလၢသုးကီၣ်ကးခးလီၤကျိဖးဒိၣ်(၅)ဖျၢၣ်အဃိ လီၢ်က၀ီၤကမျၢၢ်ဖိ(၁)ဂၤဘၣ်ဒိ၀ဲဒီး ကျီၢ်(၁)ဒုစ့ၢ်ကီးဘၣ်ဒိ၀ဲအဂ့ၢ် ပၥ်ဖျါဃၣ်၀ဲန့ၣ်လီၤ.
ဖဲအပူၤကွံၥ်လါယူၤလံ(၁)လါအတီၢ်ပူၤစ့ၢ်ကီး ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A),တၢ်ပၢၢ်ဆၢသုးပၥ်ဖှိၣ်ဒီး သုးကီၣ်ကးအဘၢၣ်စၢၤ တၢ်ဒုးကဲထီၣ်တ့ၢ်၀ဲ(၁၀၁)ဘျီ၀ံၤ သုးကီၣ်ကးတပၤသံ၀ဲ(၅၂)ဂၤဒီးဘၣ်ဒိ၀ဲ(၁၂)ဂၤန့ၣ်လီၤ.
လၢန့ၣ်အမဲၥ်ညါ ဖဲလၢတၢ်ဒုးတဖၣ်အပူၤ သုးကီၣ်ကးသူ၀ဲကလံၤကျါတၢ်ဒုးတဖၣ်, ခးလီၤကျိဖးဒိၣ်တဖၣ်အဃိ လီၢ်က၀ီၤကမျၢၢ် ဟံၣ်ဃီတၢ်သူၣ်ထီၣ်, တၢ်မၤအီၣ်လီၢ်ကျဲတဖၣ်ဟးဂီၤကွံၥ်အိၣ်ထီၣ်၀ဲ ကိးမုၢ်နံၤဃၣ်ဃၣ်န့ၣ်လီၤ.
