လါယူၤလံ(၂၅)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, မူကီၢ်ဆၣ်အပူၤ သုးကီၣ်ကးအသုးတဖၣ် ခးလီၤကျိဖးဒိၣ် ကိးမုၢ်နံၤဃၣ်ဃၣ်အဃိ လီၢ်က၀ီၤကမျၢၢ်တၢ်ဘၣ်ဒိဘၣ်ထံးတဖၣ် အိၣ်ထီၣ်၀ဲကိးမုၢ်နံၤဃၣ်ဃၣ်န့ၣ်လီၤ.
လါယူၤလံ(၂၃)သီအနံၤ, ဂီၤ(၁၀း၃၀)နၣ်ရံၣ်အဆၢကတီၢ် သုးကီၣ်ကးအသုး(ခလရ−၆၀)အံၤ ခးလီၤကျိဖးဒိၣ်ဆူ အီၣ်စိမိသ၀ီပူၤအဃိ ကမျၢၢ်ဟံၣ်(၃)ဖျၢၣ်ဟးဂီၤကွံၥ်၀ဲအသိး အူမီၣ်ယ့း,သးနံၣ်(၅၂)နံၣ်စ့ၢ်ကီး ဘၣ်ဒိ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဃၣ်၀ဲန့ၣ်လီၤ.
လါယူၤလံ(၁၂)သီအနံၤ, ဟါ(၇)နၣ်ရံၣ်အဆၢကတီၢ် သုးကီၣ်ကးအသုးလၢအိၣ်ဆီလီၤအသးဖဲ ၀့ၢ်မုၢ်ဃါပျီအံၤ ခးလီၤကျိဖးဒိၣ်ဆူ သ့ၣ်ဂ့ၤလူၢ်သ၀ီပူၤအဃိ သ၀ီဖိ(၂)ဂၤလၢအမ့ၢ် နီၢ်လံၣ်စၣ် ဒီးစီၤအဲၣ်ဒိၣ်ထူ နီၢ်ဒီမၤ၀ၤခံဂၤစ့ၢ်ကီးဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ဖဲအပူၤကွံၥ်လါယူၤလံ(၁၃)သီအနံၤစ့ၢ်ကီး ဟါအဆၢကတီၢ်န့ၣ် သုးကီၣ်ကးအသုးလၢအိၣ်ဆီလီၤအသးဖဲ၀့ၢ်မုၢ်ဃါပျီအံၤ ခးလီၤကျိဖးဒိၣ်(၆)ဖျၢၣ် ဆူယ့ၣ်လဲသ၀ီပူၤအဃိ လဲၤလီၤတဲၥ်ပိၥ်ဖးဒိၣ်ထီၣ်၀ဲဖဲသ၀ီပူၤဘၣ်ဆၣ် တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၄နံၣ်, လါယနူၤအါရံၤအတီၢ်ပူၤ သုးကီၣ်ကးဒီးတၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ တၢ်ဒုးကဲထီၣ်တ့ၢ်၀ဲ (၆၆၆)ဘျီ ဒီး သုးကီၣ်ကးတပၤ သံ၀ဲ(၈၃၃)ဂၤ၀ံၤ ဘၣ်ဒိ၀ဲ(၆၂၀)ဂၤအဂ့ၢ် ညၣ်လ့သ့းတၢ်ဃိထံၣ်သ့ၣ်ညါကရၢ ထုးထီၣ်ပၥ်ဖျါဃၣ်၀ဲန့ၣ်လီၤ.
ဖဲလၢတၢ်ဒုးတဖၣ်အပူၤ ခီဖျိလၢသုးကီၣ်ကးခးလီၤကျိဖးဒိၣ်, ဒြိဒီးဟဲခးလီၤတၢ်လၢကဘီယူၤအဃိ လီၢ်က၀ီၤကမျၢၢ်သံ၀ဲ(၅၅)ဂၤ ဒီးဘၣ်ဒိ၀ဲ(၅၀)ဂၤအဂ့ၢ် စ့ၢ်ကီးပၥ်ဖျါဃၣ်၀ဲန့ၣ်လီၤ.
