လါယူၤလံ(၂၄)သီ,၂၀၂၄နံၣ်
မူခိၣ်စူၤဒိၣ်ဒီးထံကျိထံဒိၣ်ထီၣ်အဃိ ၀့ၫ်တကူၣ်ကီၫ်ခီပာ်ဃုာ် ကီၫ်ခီဒီးကီၫ်စဲၣ်(၅)ဘ့ၣ်အပူၤ တၫ်ကပလီၫ်ကဒီးသးလၢ ထံတၫ်လီၤဘၣ်ယိၣ်အဂီၫ် ဒီကလုာ်ဃူဖိးပဒိၣ်, ဟီၣ်ခိၣ်ဖိတၫ်မၤစၢၤဒီးတၫ်ပၢဆှၢရဲၣ်ကျဲၤန့ဆၢၣ်တၫ်လီၤဘၣ်ယိၣ် ၀ဲၤကျိၤ(MOHADM)ဟ့ၣ်ပလီၫ်၀ဲလီၤ.
လါယူၤလံ(၂၂)သီတုၤ(၂၈)သီနံၤအတီၫ်ပူၤ မကွ့ကီၫ်ခီ,ပကိကီၫ်ခီ,အ့ၣ်ယၣ်၀တံၣ်ကီၫ်ခီ,၀့ၫ်တကူၣ်ဒီးတလၢၤကီၫ်စဲၣ် တဖၣ်အပူၤ တၫ်ကဘၣ်ပလီၫ်သးလၢထံဒိၣ်နိယွၤန့ၣ်လီၤ.ဖဲနံၤသီတဖၣ်အံၤအပူၤ ရခၢၣ်ပီၣ်လဲၣ်နံၤ,အ့ၣ်ယၣ်၀တံၣ် ကီၫ်ခီတၫ်လီၫ်တဖၣ်,တလၢၤကီၫ်စဲၣ်ဒီး တနီသရံၣ်ပီၣ်လဲၣ်နံၤတဖၣ် မူခိၣ်စူၤဖးဒိၣ်သ့၀ံၤ လၢတၫ်အဆၢခိၣ် ထံကျိထံ တဖၣ် ဟဲယွၤလီၤ၀ဲသ့အဂ့ၫ် ဟ့ၣ်ပလီၫ်ဃာ်၀ဲလီၤ.
“ထံန့ၣ်တလီၤဒ်သိးဒီးအပူၤကွံာ်လၢၤဘၣ်.ဟဲထီၣ်ကဒါက့ၤလီၤ.ပဘၣ်လဲၤအိၣ်လၢသီခါဖၠၣ်လီၤ.တၫ်စူၤစ့ၫ်ကီးတပတုာ်ဘၣ်အဂ့ၫ်” အ့ၣ်ယၣ်၀တံၣ်ကီၫ်ခီ,၀့ၫ်စလိၣ်(ဇလွန်မြို့)ကမျၢၫ်တဂၤတဲ၀ဲလီၤ.
သုးကီၣ်ကး မူခိၣ်ကလံၤသီၣ်ဂီၤ၀ဲၤကျိၤ အတၫ်ပာ်ဖျါဖဲလါယူၤလံ(၂၃)သီအနံၤ ဘၣ်ထွဲဒီးထံကျိထံဒိၣ်ထီၣ် တၫ်အိၣ် သးန့ၣ် အ့ၣ်ယၣ်၀တံၣ်ထံကျိထံန့ၣ် လၢ၀့ၫ်ပခိးကူၣ်(ပခုက္ကူမြို့),၀့ၫ်ညီၣ်အူ(ညောင်ဦးမြို့),၀့ၫ်ဟ့သဒး(ဟင်္သာတမြို့) ,၀့ၫ်ဆ့းသၣ်(ဆိပ်သာမြို့),ဒီး၀့ၫ်စလိၣ်(ဇလွန်မြို့)တဖၣ်အပူၤ အိၣ်လၢတၫ်ဘၣ်ယိၣ်အပနီၣ်အဖီခိၣ်အဂ့ၫ် တဲ၀ဲလီၤ.
လါယူၤလံ(၂၃)သီတုၤ(၂၅)သီအတီၫ်ပူၤစကဲကီၫ်ခီအဆၢခိၣ်,ကခၠ့ၣ်ကီၫ်စဲၣ်,ရခၢၣ်ကီၫ်စဲၣ်,ပကိကီၫ်ခီ,အ့ၣ်ယၣ်၀တံၣ်ကီၫ်ခီ,၀့ၫ်တကူၣ်ကီၫ်ခီ,န့ၣ်ပၠံၣ်တီၣ်,ကညီကီၫ်စဲၣ်,တလၢၤကီၫ်စဲၣ်ဒီးတနီသရံၣ်ကီၫ်ခီတဖၣ်အပူၤ မူခိၣ်စူၤအါသ့၀ံၤ လီၫ်က၀ီၤလၢထံကျိထံဒိၣ်တဖၣ် ကဘၣ်ပလီၫ်သးလၢန့ဆၢၣ်တၫ်လီၤဘၣ်ယိၣ်အဂီၫ် ပှၤဃုသ့ၣ်ညါမူခိၣ်ကလံၤသီၣ်ဂီၤ အူ၀့နဲၣ် ဟ့ၣ်ဒုးသ့ၣ်ညါ၀ဲလီၤ.
စးထီၣ်လၢလါယူၤလံထီၣ်သီ,ကီၫ်ပယီၤပူၤ တၫ်လီၫ်လၢအိၣ်လၢတၫ်ဆၢခိၣ်တဖၣ် ထံကျိထံဒိၣ်အဃိ လီၫ်က၀ီၤကမျၢၫ် လၢအကလီၫ်ဂၤ ကွၫ်ဆၢၣ်မဲာ်ဘၣ်ထံတၫ်မၤဘၣ်ဒိဘၣ်ထံးတဖၣ်၀ံၤ တၫ်သူၣ်အီၣ်ဖျးအီၣ်အလီၫ်တဖၣ် ထံလုၫ်ဘၢ ဟးဂီၤကွံာ်န့ၣ်လီၤ.လၢကတီၫ်အံၤ ကီၫ်ပယီၤပူၤ တၫ်ခၢၣ်သးတၫ်လီၫ်တဖၣ်ဒီးတၫ်ဆၢလာ်တၫ်လီၫ်တဖၣ် လၢအိၣ်ဘူးဒီး ထံကျိနံၤတဖၣ် ဘၣ်ကွၫ်ဆၢၣ်မဲာ်ထံဒိၣ်နိယွၤန့ၣ်လီၤ.
