လါယူၤလံ(၂၃)သီ, ၂၀၂၄နံၣ်
သုးကီၣ်ကးအကီၢ်ခိၣ်ပတြီၤအူမၠ့းဆွ့ၣ်အံၤ အလီၢ်လၤမူဒါကီၢ်ခိၣ်ပတြီၤအလီၢ်န့ၣ် ဆီတလဲဟ့ၣ်လီၤမူဒါဆူ သုးမီၤစိရိၤအခိၣ်မ့အီၣ်လဲၣ်အအိၣ် ဖဲလါယူၤလံ(၂၂)သီအနံၤအဂ့ၢ်န့ၣ် သုးကီၣ်ကးတၢ်ကစီၣ်သန့တဖၣ် ထုးထီၣ်ပၥ်ဖျါဃၣ်၀ဲန့ၣ်လီၤ.
အူမၠ့းဆွ့ၣ်အံၤတအိၣ်ဆူၣ်အိၣ်ချ့ဘၣ်ဒီး တၢ်ဘၣ်ကူစါယါဘျါသးအဃိ ဒ်သိးတၢ်ကမၤ၀ဲ ဒီကလုာ်တၫ်ဒီသဒၢဒီးတၫ်ဘံၣ်တၫ်ဘၢကီၣ်ကးတၢ်ဖံးတၢ်မၤတဖၣ်အဂီၢ် ဆီတလဲဟ့ၣ်၀ဲလီၤမူဒါအဂ့ၢ် ထုးထီၣ်ပၥ်ဖျါဃၣ်၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအံၤ အလီၢ်လၤမူဒါလၢမၤထီထီၣ်ဃၣ်၀ဲန့ၣ် ဘူးကလၢၥ်ထီၣ်အဆၢကတီၢ် ဆီတလဲဟံးန့ၢ်မူဒါဒ်အံၤန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးကီၣ်ကးအံၤ ဟ့ၣ်လီၤဃၣ်မူဒါဒံး NLDပဒိၣ်အစိၤကီၢ်ခိၣ်(ခံ)(၂)ဂၤလၢအမ့ၢ် အူမၠ့းဆွ့ၣ်ဒီးအူဟ့ၣ်နရံၣ်ဘၣ်ထံယူၣ်တဖၣ်၀ံၤ မ့မ့ၢ်အူမၠ့းဆွ့ၣ်တခီဟ့ၣ်လီၤအီၤမူဒါဒ် ကီၢ်ခိၣ်ပတြီၤလီၢ်လၤန့ၣ်လီၤ. ဘၣ်ဆၣ်မ့မ့ၢ် အူဟ့ၣ်နရံၣ်ဘၣ်ထံယူၣ်တခီ ဖဲအပူၤကွံၥ်လါအ့ဖြ့ၣ်(၂၂)သီအနံၤန့ၣ် ခီဖျိလၢတၢ်အိၣ်ဆူၣ်အိၣ်ချ့အဖီခိၣ် ဟံးန့ၢ်တၢ်အိၣ်ဘှံးအဂ့ၢ် သုးကီၣ်ကးထုးထီၣ်ပၥ်ဖျါ၀ဲလီၤ.
ကီၢ်ခိၣ်ပတြီၤအူမၠ့းဆွ့ၣ်စ့ၢ်ကီး တၢ်အိၣ်ဆူၣ်အိၣ်ချ့တဂ့ၤဘၣ်အမဲၥ်ညါ ကိးမုၢ်နံၤတၢ်ဖံးတၢ်မၤတဖၣ် မၤ၀ဲတကဲထီၣ်လိၥ်ထီၣ်ဘၣ်အဃိ တၢ်ဘၣ်ကူစါယါဘျါကဟုးကယၤအီၤဘူးဘူးတံၢ်တံၢ်လီၤအဂ့ၢ်စ့ၢ်ကီး ဘိးဘၣ်ရၤလီၤဃၣ်၀ဲဖဲလါယူၤလံ(၁၈)သီအနံၤန့ၣ်လီၤ.
တၢ်ဘိးဘၣ်ရၤလီၤ၀ဲဒ်သိးအံၤ တပှဲၤထီၣ်(၁)နွံအတီၢ်ပူၤန့ၣ် သုးကီၣ်ကးအခိၣ် သုးရိၣ်မဲခိၣ်ကျၢၢ်မ့အီၣ်လဲအံၤ ဆီတလဲဟံးန့ၢ်မူဒါဒ် ကီၢ်ခိၣ်ပတြီၤလီၢ်လၤမူဒါအဂ့ၢ် ထုးထီၣ်ပၥ်ဖျါဃၣ်၀ဲန့ၣ်လီၤ.
