တၫ်စိာ်ဆှၢန့ၫ် တၫ်ပၢၫ်ဆၢသုးတဖၣ် တၫ်စုက၀ဲၤအပူၤ RCSSပာ်ဃုာ်

လါယူၤလံ(၁၆)သီ,၂၀၂၄နံၣ်

ကီၫ်ကရ့ၣ်နံၣ်အပူၤ တၫ်ပၢၫ်ဆၢသုးတဖၣ်အဂီၫ် တၫ်စိာ်ဆှၢန့ၫ်တၫ်စုက၀ဲၤအပူၤ ယိၤကီၫ်စဲၣ်တၫ်က့ၤသူၣ်ထီၣ်ဆီလီၤကီၣ်ကး(RCSS)အစုတီၤဖီလာ်သုးဖိ ပာ်ဃုာ်၀ဲအဂ့ၫ် ဖဲလါယူၤလံ(၁၄)သီနံၤန့ၣ် သုးကီၣ်ကးဘိးဘၣ်ပာ်ဖျါ၀ဲလီၤ.

RCSSသုက့(၇၉၅),သုးဒ့ခိၣ်ပတီၫ် စဲနိၣ်မ့(စိုင်းနွံမိန်း),သုးဖိ စဲဆူး(စိုင်းဆု),စဲကီၣ်(စိုင်းကောင်),ဘိၣ်ဘိၣ်ဟၣ်ဒီး စဲနိၣ်လဲ(စိုင်းနွံလှိုင်း)တဖၣ် ဘၣ်တၫ်ဖီၣ်န့ၫ်အီၤဃုာ်ဒီးတၫ်စုက၀ဲၤတဖၣ် ဖဲယိၤဒိၣ်ကီၫ်စဲၣ်ကလံၤထံးတကပၤ ကီၫ်ဆၣ်နးစၣ်(နမ့်စန်မြို့နယ်),နါရဲသ၀ီ(နားရိုင်းကျေးရွာ)ကျဲဖးဒ့အဂ့ၫ် တဲ၀ဲလီၤ.

လၢယိၤဒိၣ်ကီၫ်စဲၣ်ကလံၤထံး,အိးထီၣ်ဃာ်၀ဲသုး၀ဲၤခိၣ်သ့ၣ် ဖဲလွဲၣ်တဲလွၣ်(လွိုင်တိုင်းလျန်)၀ံၤ RCSSလၢမၤဃာ် တၫ်ပတုာ်တၫ်ခးဒီး သုးကီၣ်ကးအံၤစ့ၫ်ကီး တဲ၀ဲလၢ ပှၤလၢသုးကီၣ်ကးဖီၣ်န့ၫ်တဖၣ် မ့ၫ်အ၀ဲသ့ၣ်အသုးဖိအဂ့ၫ်, အ၀ဲသ့ၣ်ဃ့ဃာ်တၫ်အိၣ်ဘှံး,အ၀ဲသ့ၣ်အနီၫ်ကစၫ်ဒၣ်၀ဲ မၤ၀ဲလီၤအဂ့ၫ် ထုးထီၣ်ပာ်ဖျါ၀ဲ ဖဲတနံၤဃီ၀ဲန့ၣ်လီၤ.

အ၀ဲသ့ၣ် ပာ်ဖှိၣ်လိာ်သးဒီးအတံၤသကိးတဖၣ်၀ံၤ အ၀ဲသ့ၣ်အနီၫ်ကစၫ်ဒၣ်၀ဲ ဆါ၀ဲတၫ်စုက၀ဲၤတဖၣ်လီၤအဂ့ၫ် RCSSတၫ်ဘိးဘၣ်ရၤလီၤပူၤ ပာ်ဖျါ၀ဲလီၤ.တၫ်ပှ့ၤဆါတၫ်စုက၀ဲၤလၢတဖိးသဲစး တၫ်တြီဃာ်၀ဃံးဃံး၀ံၤ ပှၤသုးဖိတဖၣ် သုးတမၤ၀ဲတဂ့ၤအဂီၫ် တၫ်ထုးထီၣ် ဃာ်တၫ်ဘျၢအဂ့ၫ် RCSSခိၣ်နၫ်တဂၤတဲ၀ဲလီၤ.

တၫ်ကဲထီၣ်အသးဒ်သိးအံၤ လၢအပူၤကွံာ်န့ၣ်တအိၣ်ဘၣ်.ဘၣ်ထွဲဒီးတၫ်စုက၀ဲၤတၫ်ဂ့ၫ်တဖၣ် တၫ်ဘျၢဃံးအဂ့ၫ် လၢတၫ်ဒုးသ့ၣ်ညါကဒါက့ၤကဒီအဖီခိၣ် ဘၣ်တၫ်ဘိးဘၣ်ရၤလီၤ၀ဲလီၤအဂ့ၫ် RCSSအနဲၣ်ရွဲၣ်သဃဲၤခံ သုးခိၣ်ဒိၣ် ဖိခါစၣ်(ဗိုလ်မှူးခမ်းစံ)တဲ၀ဲလီၤ.

သုးကီၣ်ကးအတၫ်ဘိးဘၣ်ရၤလီၤအပူၤ ပာ်ဖျါ၀ဲလၢ တၫ်စုက၀ဲၤတဖၣ်န့ၣ် တၫ်လဲၤမၤန့ၫ်လၢ ပအဲဒီကလုာ်တၫ်ထူၣ်ဖျဲး သုးမုၫ်ဒိၣ်-PNLAအိၣ်ဒီး မ့ၫ်ဒ်သိးကဆှၢ၀ဲဆူ ကရ့ၣ်နံၣ်ဒီကလုာ်တၫ်ဒီသဒၢသုး-KNDFဒီးကညီဒီကလုာ်တၫ်ထူၣ်ဖျဲး သုးမုၫ်ဒိၣ်-KNLAတဖၣ်အိၣ်ဒီး ဖဲကဟဲဆှၢ၀ဲအကတီၫ ဘၣ်တၫ်ဖီၣ်န့ၫ်၀ဲအဂ့ၫ် ပဲာ်အၢပဲာ်သီဃာ်၀ဲလီၤ.

ယိၤဒိၣ်ကီၫ်စဲၣ်ကလံၤထံးန့ၣ် ကီၫ်ပယီၤပူၤ လၢနွ့ၣ်အူတၫ်ဖီၣ်ထီၣ်စုက၀ဲၤ ပၢၫ်ဆၢထီဒါသုးဟံးန့ၫ်ထံကီၫ်တၫ်စိ တၫ်ကမီၤစးထီၣ်လံၤလံၤ မ့ၫ်ဟီၣ်က၀ီၤတခါလၢ သုးကီၣ်ကးဖီၣ်န့ၫ် တၫ်စုက၀ဲၤအါအါဂီၫ်ဂီၫ်နစှၤန့ၣ် (၃)ဘျီ ဘၣ်န့ၣ်လီၤ.

Ref: Myanmar Now