ယ့ၣ်ဖၠူၣ်ကီၫ်ဆၣ်ပူၤ သုးကီၣ်ကးဖီၣ်န့ၫ်ဆူၣ်ဒီးမၤသံမၤ၀ီကမျၢၫ်တဖၣ်အိၣ်ထီၣ်

၈.၇.၂၀၂၄

သုးကီၣ်ကးသုးကျိၤလၢဟဲနုာ်လီၤ ဖဲယ့ၣ်ဖၠူၣ်ကီၫ်ဆၣ်အံၤ ဖီၣ်န့ၫ်ဆူၣ်၀ဲလီၫ်က၀ီၤတဖၣ်အိၣ်၀ဲအသိး တနီၤန့ၣ်တၫ်မၤသံအီၤအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.

စၣ်ဒံၣ်ကရူၫ်ကမျၢၫ်လၢတၫ်ဖီၣ်န့ၫ်ဆူၣ်မၤသံတ့ၫ်အကျါ(၄)ဂၤအစိၣ်တခီ တၫ်က့ၤထံၣ်န့ၫ်အီၤ ဖဲ လါယူၤလံ(၃)သီဒီး(၄)သီအနံၤအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.

“အစိၣ်လၢတၫ်ထံၣ်န့ၫ်က့ၤအီၤတဖၣ်တခီ ပှၤလၢထံၣ်န့ၫ်အီၤတဖၣ်ခူၣ်လီၤန့ၫ်အီၤလီၤ.“အဂ့ၫ် လီၫ်က၀ီၤကမျၢၫ်ပိာ်မုၣ်တဂၤစံး၀ဲန့ၣ်လီၤ.

ဖဲလါယူၤလံ(၁)သီအနံၤ, သုးကီၣ်ကးသုးကျိၤလၢအိၣ်ဆီလီၤအသးဖဲ စၣ်ဒံၣ်ကရူၫ်အံၤ က့ၤဖီၣ်န့ၫ်ဆူၣ်၀ဲ စၣ်ဒံၣ်ဒီးခီၣ်ပၠၣ်သ၀ီပူၤ ဟံၣ်ဖိဃီဖိ(၃)ဂၤပာ်ဃုာ်ကမျၢၫ်(၈)ဂၤ၀ံၤ လဲၤနုာ်လီၤသုးကျိၤဆူ ဒ၀ဲၫ်မုာ်ကျိၤ၀ဲၤကွာ်လီၤဆီဟီၣ်က၀ီၤဒိၣ်ပူၤအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.

သုးကီၣ်ကးသုးကျိၤတဖၣ် လဲၤတုၤဖဲဒ၀ဲၫ်မုာ်ကျိၤ၀ဲၤကွာ်လီၤဆီဟီၣ်က၀ီၤဒိၣ်ပူၤအဆၢကတီၫ် က့ၤပျၫ်န့ၫ်က့ၤ၀ဲ ဟံၣ်ဖိဃီဖိ(၃)ဂၤ၀ံၤ မ့မ့ၫ်ပိာ်ခွါအဂၤတခီ တုၤခဲအံၤတၫ်ဆဲးကျိးအီၤတန့ၫ်လၢာ်ဘၣ်အဂ့ၫ်တဲ၀ဲန့ၣ်လီၤ.

တၫ်မၤသံမၤ၀ီကမျၢၫ်တဖၣ်အိၣ်၀ဲအသိး တကးဘၣ်တၫ်ဒွဲၣ်အူမၤဟးဂီၤကွံာ်စ့ၫ်ကီး စၣ်ဒံၣ်သ၀ီတၫ်သွၣ်ခိၣ်အကပၤဟံၣ်တဖၣ်အဃိ ကမျၢၫ်ဟံၣ်တၫ်သူၣ်ထီၣ်တစှၤန့ၫ်(၂)ဖျၢၣ် မ့ၣ်အူအီၣ်ဟးဂီၤကွံာ်၀ဲအဂ့ၫ် တၫ်သ့ၣ်ညါဘၣ်လၢလီၫ်က၀ီၤကမျၢၫ်တဖၣ်အအိၣ်န့ၣ်လီၤ.

“ပထံၣ်ဘၣ်မ့ၣ်အူလူာ်လၢအထီၣ်တဖၣ်လီၤ.တၫ်နုာ်လီၤလၢသ၀ီပူၤတဘူၣ်ဒံးဘၣ်အဃိ မတၤအဟံၣ်တဖၣ်ပာ်လၢန့ၣ်တၫ်တသ့ၣ်ညါဘၣ်ဒံးဘၣ်.“အဂ့ၫ် လီၫ်က၀ီၤပိာ်ခွါတဂၤ တဲ၀ဲန့ၣ်လီၤ.

စၣ်ဒံၣ်ကရူၫ်ပူၤ သုးကီၣ်ကးသုးကျိၤတဖၣ် ဖီၣ်န့ၫ်ဆူၣ်မၤသံမၤ၀ီကမျၢၫ်တဖၣ်အိၣ်၀ဲအသိး ဖဲလၢဒ၀ဲၫ်မုာ်ကျိၤ၀ဲၤကွာ်လီၤဆီဟီၣ်က၀ီၤပူၤ သ၀ီတဖၣ်အပူၤစ့ၫ်ကီး သုးကီၣ်ကးခးအီၤလၢကျိအဃိ လီၫ်က၀ီၤကမျၢၫ်လၢဘၣ်ဒိတဖၣ်စ့ၫ်ကီးအိၣ်၀ဲန့ၣ်လီၤ.

Ref: The Tanintharyi Times