လါယူၤလံ(၉)သီ,၂၀၂၄နံၣ်
ကလံၤထံးကီၫ်ခိၣ်ရံယါအပူၤ ဆၣ်ဆီအံၣ်လံၣ်ထရီနံး(ဆမ်ဆောင်းအီလက်ထရွန်းနစ်)တၫ်ဖံးတၫ်မၤ ပှၤမၤတၫ်ဖိ တဖၣ် ဘၣ်ထွဲဒီးလါလဲဒီးတၫ်ဖံးတၫ်မၤတၫ်အိၣ်သးတဖၣ် ဒ်သိးကဂ့ၤထီၣ်န့ၫ်အလီၫ်အဂီၫ် လၢ(၃)သီအတီၫ်ပူၤ တၫ်ပာ်ဖျါထီၣ်တၫ်ပာ်သးန့ၣ် စးထီၣ်၀ဲဖဲလါယူၤလံ(၈)သီအနံၤန့ၣ်လီၤ.
ဆၣ်ဆီ(ဆမ်ဆောင်း)တကပၤ အ၀ဲသ့ၣ်အတၫ်ဃ့ထီၣ်တဖၣ် တၫ်မ့ၫ်တတူၫ်လိာ်ဘၣ်န့ၣ် ကမၤကဒီး၀ဲတၫ်ပာ်ဖျါထီၣ် တၫ်ပာ်သးအဂ့ၫ် ပှၤပာ်ဖျါထီၣ်တၫ်ပာ်သးတဖၣ်တဲ၀ဲလီၤ.ပှၤမၤတၫ်ဖိတဖၣ်န့ၣ် ပှၤလၢနုာ်လီၤလၢကရၢပူၤတဖၣ်အဂီၫ် ကိးမုၫ်နံၤတၫ်ကဟ့ၣ်အါထီၣ်ဘၣ်တၫ်အိၣ်ဘှံးအနံၤဒီး တၫ်ဟ့ၣ်ကနၢၤတဖၣ်အဂီၫ် သးလီ၀ဲလီၤ.
ဆၣ်ဆီအံၣ်လံၣ်ထရီနံး(ဆမ်ဆောင်းအီလက်ထရွန်းနစ်) ပှၤမၤတၫ်ဖိကရၢန့ၣ် ကရၢဖိအိၣ်၀ဲ(၃)ကလးဂၤဘျဲၣ်၀ံၤ လၢကလံၤထံးခိၣ်ရံယါအပူၤ အဂံၫ်အဘါအိၣ်၀ဲ ၄ပူ၁ပူ လၢဆၣ်ဆီ(ဆမ်ဆောင်း)တၫ်ဖံးတၫ်မၤအပူၤန့ၣ်လီၤ. ဘၣ်ဆၣ်သနာ်က့ တၫ်ပာ်ဖျါထီၣ်တၫ်ပာ်သးအပူၤအဂံၫ်အဘါစှၤဒီးစဲးဖီကဟၣ်တၫ်မၤလီၫ်အပူၤ တၫ်ထုးထီၣ်တၫ်လၢ အကစၫ်ဒၣ်၀ဲသနူတဖၣ်အဃိ ပှၤမၤတၫ်ဖိ တၫ်ပာ်ဖျါထီၣ်သးတဘျီအံၤ တမ့ၫ်ကကဲထီၣ်တၫ်ဘၣ်ဒိဘၣ်ထံးလၢ ဆၣ်ဆီ(ဆမ်ဆောင်း)လၢ ထုးထီၣ် ခၠံး(ချစ်ပ်)အအါကတၢၫ်လၢဟီၣ်ခိၣ်ချၢအံၤဘၣ်အဂ့ၫ် ပှၤဃုသ့ၣ်ညါတၫ်တဖၣ် တဲ၀ဲလီၤ.
ဖဲအပူၤကွံာ်နံၣ် ဘၣ်ထွဲဒီးကိးမုၫ်နံၣ်တၫ်အိၣ်ဘှံးအနံၤ တၫ်ဂ့ၫ်လိာ်ဘှီလိာ်အဃိ ပှၤမၤတၫ်ဖိ ဟးထီၣ်လၢတၫ်မၤပူၤအိၣ် ၀ဲအါမး၀ံၤ တၫ်ဂ့ၫ်အံၤအဃိ တဘၣ်ဒိတၫ်ဖံးတၫ်မၤဘၣ်အဂ့ၫ် ဆၣ်ဆီ(ဆမ်ဆောင်း)တကပၤ ဘိးဘၣ်ပာ်ဖျါ၀ဲ၀ံၤ ဘၣ်ထွဲဒီးလၢကတီၫ်အံၤတၫ်ပာ်ဖျါထီၣ်သးတခီ တထုးထီၣ်တဲဖျါ၀ဲနီတမံၤဒံးဘၣ်.
ဖဲန့ၣ်ကတီၫ် ပှၤပာ်ဖျါထီၣ်တၫ်ပာ်သးအနီၫ်ဂံၫ်နီၫ်ဒွးတခီ ကရၢတကပၤ တထုးထီၣ်တဲဖျါ၀ဲဘၣ်ဆၣ် လၢကတီၫ်အံၤ တၫ်ပာ်ဖျါထီၣ်သးအပူၤတခီ ပှၤမၤတၫ်ဖိ(၆၅၀၀)ဂၤဘျဲၣ် ပာ်ဃုာ်၀ဲအဂ့ၫ်တဲ၀ဲလီၤ.လၢပှၤမၤတၫ်ဖိတဖၣ်အံၤအကျါ တၫ်ထုးထီၣ်ပနံာ်တၫ်ဖံးတၫ်မၤ,တၫ်ဃုသ့ၣ်ညါ,ဒီးတၫ်အိၣ်ခိးကွၫ် တၫ်ထုးထီၣ်လၢအကစၫ်ဒၣ်၀ဲသနူ ပှၤမၤတၫ်ဖိတဖၣ် ပာ်ဃုာ်၀ဲအဂ့ၫ် ဆၣ်ဆီ(ဆမ်ဆောင်း)ပှၤမၤတၫ်ဖိကရၢ ပာ်ဖျါဃာ်၀ဲလီၤ.
