၇.၃.၂၀၂၄
လါယူၤ(၂)သီအနံၤ, မုၫ်ထူၣ်အဆၢကတီၫ် သုးကီၣ်ကးလဲၤခးလီၤတၫ်ဒီးကဘီယူၤ ဖဲတနီးသရံးကီၫ်ဒိၣ်, တနီသရံးကီၫ်ဆၣ်, သၣ်ရဖိၣ်သ၀ီတၫ်သိၣ်ကၠိအကပၤအဃိ ကၠိဖိလၢသးနံၣ်အိၣ်(၁၀)နံၣ်ဒီး(၁၄)နံၣ် (၂)ဂၤဘၣ်ဒိ၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
တၫ်လဲၤဒုးအီၤလၢကလံၤကျါအပူၤ ကျိသၣ်(၆)ဖျၢၣ်လဲၤလီၤတဲာ်၀ဲ ဖဲအိၣ်စီၣ်စုာ်ဒီးကၠိကဲး(၁၀၀)အယံၤအဃိ ဖိသၣ်တဖၣ်ဘၣ်ဒိ၀ဲအဂ့ၫ် လီၫ်က၀ီၤကမျၢၫ်တဂၤတဲ၀ဲန့ၣ်လီၤ.
“ကၠိစံၣ်လီၤ၀ံၤ ဖဲ(၁၂)နၣ်ရံၣ်ဘျဲၣ်ကတီၫ် ကၠိထီၣ်က့ၤအဆၢကတီၫ်န့ၣ် ဟဲးခးလီၤတၫ်လၢကဘီယူၤလီၤ. ခဲလၢာ်အိၣ်၀ဲ(၆)ဖျၢၣ်န့ၣ်လီၤ. ခးလီၤတၫ်န့ၣ် ပညိၣ်ခးလီၤ၀ဲကၠိလီၤ. သနာ်က့ လဲၤလီၤတဲာ်၀ဲဒၣ်ဖဲကၠိအကပၤ ထံကျိၤပူၤလီၤ. (၁)ဖျၢၣ်န့ၣ် လီၤတဲာ်၀ဲဒၣ်ဖဲတၫ်လူၫ်ခိၣ်လီၤ. ဖိသၣ်တဖၣ် စံၣ်၀့ၤ၀ီၤကတီၫ်ဘၣ်ဒိ၀ဲဒီး တဂၤန့ၣ် စုတဘိကၤကွံာ်၀ဲလီၤ. (၉)တီၤကၠိဖိတဂၤ အစုဒုၣ်တီၤကျိသၣ်ဘၣ်ဒီး ဘၣ်ဒိ၀ဲလီၤ“
တနံၤဃီအဆၢကတီၫ် သုးကီၣ်ကးလဲၤခးလီၤတၫ်လၢကလံၤကျါ ဖဲကၠိစူးကီၫ်ဆၣ်, ၀ၣ်ယ့းသ၀ီပူၤအဃိ ပိာ်ခွါ(၂)ဂၤလၢသးနံၣ် (၆၀)အိၣ်စ့ၫ်ကီးဘၣ်ဒိ၀ဲ၀ံၤ ဟံၣ်(၁)ဖျၢၣ်စ့ၫ်ကီးမ့ၣ်အူအီၣ်ဟးဂီၤကွံာ်၀ဲအဂ့ၫ် လီၫ်က၀ီၤတဖၣ်တဲ၀ဲန့ၣ်လီၤ.
မ့မ့ၫ်လၢ ဘီမုၫ်စၢဖှိၣ်ကရၢဘၣ်ထွဲတၫ်ဟ့ၣ်ဟီၣ်ခိၣ်ဖိတၫ်မၤစၢၤ တၫ်တၢၣ်ပီၣ်တဲသကိး၀ဲၤဒၢး(UNOCHA)တခီ တၫ်လဲၤဒုးတၫ်သိၣ်ကၠိတဖၣ်အဃိ တၫ်ကူၣ်ဘၣ်ကူၣ်သ့တၫ်သူၣ်ထီၣ်တဖၣ် ဟးဂီၤကွံာ်၀ဲတကးဘၣ်ညီနုာ်တၫ်ဖံးလိမၤခိခွဲးယာ်တဖၣ်စ့ၫ်ကီး ဆံးလီၤစှၤလီၤ၀ဲအဂ့ၫ် လါယူၤ(၁၁)သီအနံၤထုးထီၣ် လံာ်ပာ်ဖျါအပူၤပာ်ဖျါဃၣ်၀ဲန့ၣ်လီၤ.
တနံၣ်အံၤ ကၠိက့ၤအိးထီၣ်အဆၢကတီၫ် ထံကီၫ်ဒီတဘ့ၣ်တၫ်ဒုးကဲထီၣ်သးဟီၣ်က၀ီၤတဖၣ်အပူၤ ကၠိခဲလၢာ်ပာ်ဖှိၣ်(၁)ကလး(၃)ကထိဘျဲၣ် တၫ်ဘၣ်ကးတံာ်ဃၣ်အီၤန့ၣ်လီၤ.
ref:rfa
