လါမ့ၤ(၂၁)သီ, ၂၀၂၄နံၣ်
ထံရူၫ်ကီၫ်သဲးပှၤလီၤဃိၣ်ဖိ ဖဲလွဲၫ်ကီၫ်ဃိၣ်(လွိုင်ကော်အကျဉ်းထောင်)ပူၤတဖၣ် ကွၫ်ဆၢၣ်မဲာ်ဘၣ် တၫ်အီၣ်တၫ်အီ တလၢတလီၫ်ဘၣ်အဃိ တၫ်အိၣ်ဆူၣ်အိၣ်ချ့ဘၣ်ဟးဂီၤ၀ဲအဂ့ၫ် ကီၫ်ပယီၤပှၤလီၤဃိၣ်ဖိပှာ်ဘျးစဲ (PPNM) ပာ်ဖျါ၀ဲလီၤ.
လွဲၫ်ကီၫ်ဃိၣ်ပူၤ ထံရူၫ်ကီၫ်သဲးပှၤလီၤဃိၣ်ဖိအဂၤ(၁၀၀)ပာ်ဃုာ် ပှၤလီၤဃိၣ်ဖိအိၣ်၀ဲ(၄၀၀)ဂၤဘျဲၣ်၀ံၤ စးထီၣ် ဖဲကီၫ်ကရ့ၣ်နံၣ် တၫ်ဒုးဆူၣ်ထီၣ်အကတီၫ် ဟံၣ်ဖိဃီဖိတဖၣ် လဲၤဃ့ထံၣ်လိာ်သးတန့ၫ်ဘၣ်အိၣ်လံ(၆)လါဘျဲၣ်၀ံၤ လၢကတီၫ်အံၤဘၣ်အီၣ်၀ဲ ဟုသးလၢအကံၫ်အစီတထီၣ်ဘးတဖၣ်ဒီးညၣ်အုၣ်ထံန့ၣ်လီၤ.
ပှၤဃိၣ်ဖိတဖၣ် တအီၣ်ဘၣ်တၫ်အီၣ်တၫ်အီလၢန့ၫ်ဂံၫ်န့ၫ်ဘါတဖၣ်အသိး ဆူၣ်ချ့အဂီၫ် ကမၤနီၫ်ကစၫ်တၫ်ဟူးတၫ်ဂဲၤ တဖၣ်စ့ၫ်ကီး ဘၣ်တၫ်တြီဃာ်အဃိ တၫ်အိၣ်ဆူၣ်အိၣ်ချ့ ဘၣ်ဒိဘၣ်ထံး၀ဲအဂ့ၫ် (PPNM) တဲ၀ဲလီၤ.
ဒ်သိးဒီးလွဲၫ်ကီၫ်ပှၤဃိၣ်ဖိတဖၣ် ကအီၣ်ဘၣ်တၫ်အီၣ်လၢန့ၫ်ဂံၫ်န့ၫ်ဘါတဖၣ်ဒီး တၫ်အိၣ်ဆူၣ်အိၣ်ချ့ ကဘၣ်လိာ်ဖိးဒ့အဂီၫ် တၫ်ဃ့ထီၣ်ဃာ် ထံဂုၤကီၫ်ဂၤဂာ်တဲာ်ဂီၤကရၢ လၢကမၤစၢၤ၀ဲန့ၣ်လီၤ. ဘီမုၫ်စၢဖှိၣ်ကရၢထံကီၫ်တဖၣ်ဒီး ထံဂုၤကီၫ်ဂၤ ပှၤဂ့ၫ်၀ီခွဲးယာ်ကရၢစ့ၫ်ကီး ကမၤစၢၤဆီၣ်ထွဲဘၣ်၀ဲအဂီၫ် ကီၫ်ပယီၤပှၤလီၤဃိၣ်ဖိပှာ်ဘျးစဲ (PPNM) တဲဆီၣ်တခူထီၣ်ဃာ်၀ဲလီၤ.
ref:rfa
